Jaku bebula ti disemburka beapi-api bisi ditemu nyadika saut enggau dalih dalam laman blog tu ba minggu nyin kemari bekaul enggau pemansang projek-projek ti diatur opis Menteri Pekara Pengarap Islam.
Lebih agi, Majlis Islam Sarawak (MIS) udah ngeluarka sepuchuk surat jaku bantah 5 limpir, udah dikeluarka dikena nimbal sembilan iti isu tauka jaku tanya ti dipilih baka ti dibangkitka dalam repot laman blog kami tu lalu udah nya dikena bebulaka semua jaku tuduh kami enggau bala pemacha kami.
Tang, dalam surat bantah 5 limpir nya nadai siti pan leka jaku bekaul enggau nama baka Eastbourne Corporation enggau Daud Abdul Rahman (Menteri Pekara Pengarap Islam) disebut.
Ditu kami deka betanya, nama kebuah pugu pansik kami, ti lebih agi ngagai pekara danjang tanggungpengawa tau dikaitka lebuh maya meri projek bebilion-bilion ringgit ngagai kompeni enggi Daud Abdul Rahman empu, enda dipasukka dalam saut ti dikarang TBS ti balat begerini nya?
Daud Abdul Rahman nya siku Menteri Pekara Pengarap Islam ti mega nyadi kaban bepenuduk tinggi dalam sebengkah wang turu Islam ti dikarapka. Kepala dalam gerempung Wang Turu Islam nya, ti endang tuai politik iya, Abdul Taib Mahmud, Kepala Menteri Sarawak.
Enggau nya, sebarang pekara silik bekaul enggau atur kereja ti dibangkitka bala temuai enggau pemacha (ti endang bedau disaut surat 5 limpir nya), Daud endang ngembuan kuasa atas semua pengawa ba projek-projek gerempung Islam nya.
Mayuh rekod nunjukka Lembaga Amanah Kebajikan Masjid Negeri Sarawak (LAKMNS), udah mujur meri kompeni Eastbourne Corporation enggi Daud Abdul Rahman sebuah kontrak ti berega RM253 juta dikena ngaga sebuah rumah palan dagang 18 tingkat ti baru di Kuching, iya nya rumah Baitul Makmur II, sereta tembu pengawa bepilihbesai ba bulan Lima tu tadi.
Sebuah agi kontrak RM9.75 juta ti udah mega diberi dulu ari tu ari LAKMNS ke tuju ti sama.
Sebulan udah nya sekeda rekod mega bisi nunjukka projek nya diserahka baru ngagai kompeni pengaga rumah Hock Seng Lee ba rega RM228, iya nya dikurangka RM25 juta.
Daud Abdul Rahman nya Menteri Pekara Pengarap Islam ti mega nyadi kaban bepenuduk tinggi dalam LAKMNS, ti betuaika Taib. Enggau tu, jaku tanya artikel dulu ari tu, ba pematut kontrak-kontrak pengawa nya diberi baka nya aja ngagai kompeni enggi iya empu, Eastbourne Corporation?
Kami mega deka nemu kini penunga laluh belanja RM25 juta, udah bekau beberapa iti jaku tanya ari raban penyakal bekaul enggau pemuntan gerempung LAKMNS nya ngeluar sereta nyelak surat akaun kira-kira belanja ti terang?
Rakyat menua Sarawak bisi kuasa deka nemu nama guna enggau laluh duitjali RM300 juta ti dikena ngaga palan nya?
Menteri nya empu udah nguji nyeliahka diri ari nyaut semua pugu jaku tanya lalu madahka iya diatu beserah ngagai Opis Penagang Penyalah Makai Suap Malaysia (SPRM) ti udah nerima repot nya. Tang udah nya iya lalu ngatur jurai suratberita ba minggu nyin kemari.
Bala pemesai ari opis Majlis Islam Sarawak udah enda senutuk ba penerang sida empu, enggau chara madahka projek nya dikereja ‘agensi-agensi bukai’ ti enda disebut sida nama, lalu saut ofisyel ti munyi nya udah nambahka penyaru runding mensia mayuh, kelimpah ari ti nyaut jaku tanya ti bekaul enggau nya.
Tang, terang bendar gerempung opis-opis pekara Islam nya ditumbuhka dikena ngatur mayuh macham wang turu enggau belanja ti mayuh datai ari Perintah Menua Sarawak enggau ti datai ari pemeri orang siku-siku enggau mega ari gerempung-gerempung korporat ti endang dikemataka sereta dikuasa sekeda orang ti betanggungpengawa ngagai Kepala Menteri.
Enggau nyadika Sapit Menteri Pekara Pengarap Islam, Daud mega nyadika proksi enggau orang ti ngaga pemutus runding ngarika Taib ba semua atur pengawa enggau opis-opis ti melanja projek-projek Islam nya.
dikaitka enggau Menteri Pekara Pengarap Islam nya lalu mega ba kuasa iya ti nyadi Menteri Pemansang Infrastruktur.
Eastbourne Corporation ke bendar iya udah bulih projek awam bebilion-bilion ringgit, tebal agi projek nya diterima lebuh iya megai syer ba penuduk dikena iya nyungkak sukung ari perintah menua ngagai sapa siti-siti projek nya patut diberika.
Ke bendar iya, Eastbourne Corporation udah ditumbuhka (nyadika ‘kompeni Bumiputera kelas A ti ke terubah’ di menua Sarawak) dalam taun 1991, iya nya lebuh maya Daud Abdul Rahman baru mangku pengawa menteri dalam parlimen menua Sarawak lalu iya patut ninggalka sebarang pengawa dagang ti tau meri penguntung ari kontrak-kontrak perintah menua.
Enti tu ukai penyalah danjang tanggungpengawa (ti mega nyadika sebengkah penyalah makai suap dalam politik) Menteri nya patu nerangka ngagai mensia mayuh baka ni? Nama kebuah iya enggai enda nganti “pemutus pansik” ari SPRM ti enda betaring nya?
Kami mega kala nuliska repot baka ni raban kompeni Eastbourne udah meri tanah-tanah kebun enggau lisin ngulihka kayu batang ti besai bendar rampa, sekumbang Daud bisi bekaul enggau Taib dalam Perintah Menua.
Atur meri kontrak baka nya nyadika sebengkah chura ti betumbuh dalam raban penyukung Taib di Sarawak. Enggau nya, mensia mayuh di Sarawak bisi kuasa deka nemu sekali ke kompeni Eastbourne nya nyadika proksi ke Taib empu?
Agi mega, Kepala Menteri nya diatu nyau makin nyadi kaya enggau nyelai, lalu nejuka pengawa nebang kampung enggau muka tanah dikereja bala menteri iya baka sida Daud Abdul Rahman, Naroden Majais, Alfred Jabu, Awang Tengah enggau sida ti bukai.
Ke bendar iya, enti menua Sarawak enda teparuk dalam penyalah makai suap enggau chara meri kontrak-kontrak belalai, kelimpah ari bejalaika atur tender tebuka, mudah bendar deka ngapuska pengirau ati mensia mayuh ba penyalah danjang tanggungpengawa.
Tang terang bendar Taib udah bebendar ngembuan kuasa penuh atas semua pekara wang ba menua nitihka peneka iya empu.
Iya ukai semina mangku pengawa Kepala Menteri, tang mega nyadi Menteri Pekara Belanja enggau Menteri Perambu Pengawa enggau Pengeraja Asal, tang iya mega mangku pengawa nyadi tuai dalam Lembaga Amanah Agama Islam lalu Daud Abdul Rahman nya mega nyadi Sapit Menteri Pekara Pengarap Islam.
Enggau nya, Taib disadang tauka dipelabaka udah ngemendarka perintah menua meri kontrak RM253 juta ngagai kompeni Eastbourne Corporation dikena ngaga palan Baitul Makmur II.
Taib mega, ba penuduk iya nyadi Pengerusi ‘Lembaga Lindungan dan Pembangunan Tanah’ (PELITA), ti udah meri lisin-lisin tanah kebun sawit ti bendar rampa, nyengkaum lisin ngulihka kayu batang di Sarawak ngagai gerempung-gerempung Islam.
Majlis Islam Sarawak udah ngaga gela ke semua macham pemeri nya “peransang ti chakah” dikena “ngemansangka ekonomi LAKMNS ba raban orang Islam di menua Sarawak lalu mega mai penguntung ti enda terus ke selampur rakyat menua nya”
Enggau agenda ‘dikena negapka atur penatai-pemisi’ ba gerempung-gerempung orang Islam di menua nya, rakyat Sarawak bisi kuasa nemu sekali ke wang turu nya ulih meri penguntung ngagai gerempung-gerempung pengarap bukai, lebih agi ngagai raban orang Kristian ti mayuh agi tubuh, sekumbang LAKMNS nyikap diri ngena “langgur strategic” dikena sida ngangkatka pemanah atur pengawa pelajar nembiak orang Islam lalu mai pemansang ba pengawa bukai.
Lalu bala orang Islam empu mega deka nemu enggau silik ni pemayuh semua duit ti dipelanja raban orang Islam enggau projek ke raban bansa ti begunaka bantu, bebanding enggau kontrak ti besai-besai ti diberi nengah jari bala menteri dikena sida begagaka palan-palan ti betingkat-tingkat?
Diatu udah datai ba maya iya Taib enggau bala bakih politik iya patut nyaut semua jaku tanya ti dikenataika raban penyakal dikena sida ngeluarka sereta nyelak akaun kira-kira Majlis Islam menua nya ngambika ulih diperati sereta diperetika mensia mayuh.