7 Sep 2013

 

Tabi basa ke nuan Menteri Besai – Baka ti udah ditemu nuan, menua Malaysia nyadi kaban Penetap enggau Kuasa Pengelantang Raban Bansa Asal dalam Gerempung Bansa (UNDRIP) lalu mega nyadi kaban dalam Penetap Kuasa Pengelantang Mensia Sedunya.

Malaysia mega nyadi kaban Gerempung Pekara Wang Entarabansa (ti nyadi penyedia formula ke langkar meruan ke Bank Dunya) lalu Sarawak Energy Berhad nyadika kaban dalam Gerempung Pengeluar Kuasa Elektrik Hidro Entarabansa, ti ngeluarka protokol-protokol mungkur pengawa-pengawa ngaga tekat-tekat hidro-elektrik.

Kesemua protokol tu bebasaka kuasa semua raban bansa ngambi ke dibai berunding dulu sebedau sida tau dipindahka pansut ari kandang menua asal sida dikena meri awak ngagai pengawa ngaga tekat-telat ai.

Ketegal ti diberi sida nya awakka projek-projek nya tau pulai ke penguntung raban-raban bansa ti dikeruga (lalu ukai ke penguntung sekeda orang politik) lalu mega ngeruga rampa menua nya patut dikurangka sereta dikemendarka.

Enti projek-projek nya amat-amat disetujuka tebal agi ari bala orang dalam raban bansa nya, iya patut diteruska, nitihka protokol-protokol, ti endur menua Malaysia nyadika kaban iya.

Tambah mega, sebarang sapa ti enda tau enda ninggalka tanah pesaka sida tauka ngelepas sereta ngelengkaka gaya idup sida ketegal kena keruga sebarang projek ti besai-besai patut diberi sukung undang-undang enggau pampas ti penuh nyadika ganti reta pesaka sida ti lenyau.

Bayar pampas nya patut DIJAMIN ENGGAU CHARA UNDANG-UNDANG, lalu ukai bepelasarka jaku semaya ti kabur.

 

Nadai agi sebarang kuasa ba atas tanah pesaka sida empu – raban bansa Penan udah angkat mantah ngambika didinga mensia mayuh di serata dunya

Tang, nadai siti pan prinsip ti disebut di atas nya tadi udah kala dititihka tuai menua Sarawak, Abdul Taib Mahmud, ke menua Murum.

Ba kandang menua nya siti ari raban bansa Asia ti idup ba pengawa ngasu-ngumpul ti diatu udu kena keruga deka dipejal ninggalka tanah pesaka sida ngagai sebengkah kandang menua ba tengah-tengah kebun sawit tinggal lalu sida udah ditangkan ngambika nelebaka diri ba gaya menua baru nya.

Sekali agi raban-raban bansa Penan enggau Kenyah udah nirika empang jalai dikena sida ngayanka bantah sida ba tapak ngaga tekat ai Murum ba minggu nyin kemari, tang udah nya sida diasuh ninggalka endur nya sereta disempulang enggau jaku semaya kabur ari sekeda bala pengari perintah.

Tebal agi ari raban bansa asal nya, enti enda semua sida udah mantah enggau ati ringat ke sekeda terma enggau kondisyen ti enda lurus (munyi ti diterangka siku peninga ti berandau ngena telefon enggau blog Radio Free Sarawak, ti nyadika sebengkah radio menua tasik ti disadang tau nusui berita ari piak ukai perintah).

Bala orang tu, kelimpah ari Taib empu, enda kala dibai bejurai dulu pasal pengawa ngaga tekat Murum, ti belabuh digaga enggau chara belalai lalu bedau bisi penerang pasal empas projek ngagai rampa menua.

Kepala Menteri tu udah ngereja pengawa sepeneka ati iya, taja pan Malaysia endang bisi tanggungpengawa ti berat bekaul enggau projek ti baka tu. Rangka ketegal ti deka bempu tanah pesaka orang bukai, iya disadang bisi pemedis ati ke penerang ti madahka kandang menua enggau tanah di Sarawak endang enggi orang bansa asal, kenyau ari sebedau Malaysia merintah diri. Pengawa iya ti nguji matak pulai kuasa raban bansa asal udah ditulak Kot Tinggi Perintah Besai Malaysia empu.

Lalu beduduk ari nya iya nguji deka ngampuhka semua kandang menua ti diuan raban bansa asal enggau chara ngerusak semua batang sungai sida. ‘Indu Langgur Pengawa Industri’ nya begunaka enda kurang ari 50 buah tekat deka digaga di serata menua Sarawak (ti semina meri kontrak ngagai semua kompeni enggi sida sebilik aja), lalu projek gajah burak ti deka muru bepuluh-puluh ribu orang bansa asal diri sebilik.

 

Kerita Rolls Royce ti tebilang di Sarawak – Taib enda kala mindah ngena kerita ti murah agi lalu iya seruran nepan bilun ti dipelanja ngena duit menua dikena iya mindah-mindah di serata dunya tu

Penyai iya ba rakyat iya empu bekaul enggau penyalah makai suap iya udah nyungkak pengirau ati mensia mayuh di serata dunya.

Diatu raban mensia di serata dunya benung alit ati baka ni sebengkah menua beperintah demokrasi tau ngemendarka tuai sida ti jai nya enda tau dirara.

Nuan empu, Menteri Besai, pan kala udah nemuai ngagai ‘palan pengentap pendiau’ Tekat Bakun di Sungai Asap sebedau pengawa bepilihbesai tu tadi.

Maya nya nuan dipeda tekenyit meda pemuntan perintah menua Sarawak, udah bekau sepuluh taun sida datai ba palan nya, sida lalu nadai udah nerima sebarang bayar pampas.

Nitih ke sekeda repot, nuan enggau jampat-jampat mayar 50% ari utang pampas ti ditanggung Perintah Besai, ngambika Perintah Menua ti betuaika Taib Mahmud deka ngeluarka laluh 50% da agi ngagai bala orang bansa asal ti patut bulih pampas nya.

Diatu, dua taun udah lalu, pampas ti disemayaka Menteri Besai ti mega nyadi Menteri Pekara Belanja menua Sarawak nya lalu bedau dibayar. Tang, udah tembu pengawa Bepilihbesai bulan Lima tu tadi Taib Mahmud udah mansutka jaku gerah pasal nikika gaji tiga kali lipat ke bala YB dalam kabinet iya, lalu bayar gaji nya dibatak ke belakang dalam pengelama setaun.

Tu nyengkaum gaji niki ke iya empu ti bekuasa ba tiga iti opis menteri, siti pan ari semua opis nya tau enda dipeguna siku orang ti kelalu kaya enggau chara ti nyelai nya.

 

Maya dudi hari tu selamat? – Raban bansa asal Penan diasuh belajar berubah nyadi raban bansa orang bemuai betaun dalam pengelama 4 taun udah bekau ‘pampas ti disemayaka’ ngagai sida (ti semina setengah ari gaji bulan pemadu mit) deka diketuka

Enggau nya nuan tentu enda alit ati enti nuan nemu pasal raban bansa asal nya enda diberi peluang ngiga lawyer dikena ngarika sida tauka dibayar sebarang pampas ti bejamin.

Raban bansa asal ti udah kena keruga nya udah diasuh arapka jaku semaya Taib enggau bala menteri BN iya lalu sida diasuh pindah dulu lalu arapka perintah deka mayar sida udah nya!

 

Semak setengah ari raban bansa Penan tu napi penanggul pemakai kurang manah nitihka repot ari agensi perintah empu – sida napi pengidup ngena duit kurang ari setengah gaji pengabis mimit ke ruang bilik sida lalu diau jauh ari tanah pesaka sida

Jaku semaya ti dipansutka ngagai raban bansa asal tu kelalu kabur lalu tebuka ngagai mayuh macham jaku tanya

Tang udah bekau kena bantah ke penudi tu tadi sida lalu disemayaka deka dibayar pampas enggau chara one-off  ba penyampau RM10,000 (tauka USD3,000) lalu bayar ninting bulan setengah gaji pengabis mimit dalam pengelama 4 taun aja.

Jaku semaya ti dulu ari tu mega munyi ti udah ditaburka ba mua orang di Bakun, Batang Ai enggau Bengoh lalu nadai siku ari sida nya udah nerima apa-nama kelimpah ari ti ninga jaku semaya ti enda betulis lalu enda kala besaksi ke sebarang lawyer.

 

Rumah besai Taib (enggau bansal perau) ti nyamai mimit endur diau

Raban bansa Penan udah bebendar ngayanka bantah sida. Sida udah nirika empang jalai dua kali dalam beberapa bulan tu, ti udah ngujungka pengawa ba tapak projek Murum nya ngetu ba minggu nyin kemari.

Tang enda mukai-mukai sida dikelingi raban polis ti besenyata, lalu bala orang politik ngutuk bala raban orang ti ‘ngasut’ taja enda disebut sida nama, lalu nadai berundingka atur dikena mutarka penanggul nya.

Tang serebana enggau putap raban bansa Penan nya bisi reti ti dalam sereta bendar.

Taib udah ngeruga menua enggau kampung sida lalu ngerusak tanah pesaka sida, nejuka sida ngidupka diri dalam kampung ti suah udah ditebang.

Sebarang sapa ti meranika diri ngelaban bala tukang tumbang deka napi raban apek bayat, lalu berebak enggau nya sida raban polis enda ulih kebut-kebut. Pekara tu udah ngemalu menua Malaysia ti ngembuan rampa menua ti manah sereta berega ba mata dunya.

Taib ngereja nya atas nama pemansang. Tang sesen pan penguntung ari nyual kayu batang ari kampung dia nadai dipeda raban bansa Penan. Sida nadai pemakai, nadai endur ngenduh, nadai pelajar sekula, nadai latih enggau pengelandik bekereja, enggau penemu bukai. Taib semina ngulihka duit ke diri empu lalu nejuka raban bansa asal dia idup enggau nadai disukung tauka dibantu.

 

Nadai kelai asil bebilion-bilion ringgit ti diambi ari tanah pesaka raban bansa Penan bisi ayan ba endur baru sida diau.

Ba paalan baru ke raban Penan nya nadai sekula.

Orang ti deka ngulihka pelajar ke bala anak sida enda tau enda bejalai ba penyauh 100 batu ke sekula di Sungai Asap – lalu ke endur sida diau nguan anak sida besekula sida numpang ba langkau manuh ti udah diubah!

Nuan tentu enda tekenyit enti semina mimit aja bala anak Penan agi mengkang besekula. Mayuh agi bala sida nya nembuka sekula sereta sida masuk sekula sekondari, laban apai indai sida napi ungkus besai bebelika bup enggau kereban bukai, bayar asrama enggau pemakai, ti nadai siku ari sida ulih nanggung ungkus nya. Baka tu utai ke dikumbai pemansang?

Kebun dandang besai sawit Taib diatu udah ngubah mayuh rampa kampung lalu nadai ‘pemansang’ udah mujur mantu orang raban bansa asal tu. Nitihh ke repot pansik perintah menua empu, nadai peluang bekereja, nadai duit tabung, nadai pengawa latih enggau pengelandik ti dikemansangka tauka dipelanja ari bebilion-bilion ringgit penguntung ari pengawa dagang kebun dandang besai sawit nya.

Semua asil ari pengawa nebang kampung nya udah dipasukka dalam akaun bank Taib di menua tasik sekali ke dipejalaika sida sebilik tauka bala kroni iya.

Enggau nya chara putar ti penudi dipejalaika iya nya muru raban bansa Penan enggau Kenyah tu ngena langgur pengawa ngaga tekat ti besai-besai. Iya deka meda sida nya diapuska sekali lalu gaya idup sida lenyau sekali.

Taib udah ngenyaika pemanah nama Malaysia lalu iya mega udah ngelanggar undang-undang ba tiap renggat ngaga tekat Murum nya.

Iya belabuh enggau enda engkeretik; iya udah puntan mai rakyat iya bejuraika atur pengawa; iya puntan bejuraika penyampau pampas; iya puntan meri jamin undang-undang ngagai rakyat iya.

 

Bediri atas panggau – dua iku pemerintah dictator ari menua Malaysia Barat ti merinsaka rakyat sedua empu, tang Najib Razak enda ulih nagang seduai

Ke bendar iya, sebarang sapa ti udu rangka sereta gila kuasa baka Taib nya patut nyelamatka diri empu, sebaka reti enggau bala rakyat iya ti begunaka iya nyelamatka sida.

Tang nuan, YAB Najib enda ulih ngereja sebarang utai.

Udah bekau Taib meri nuan 25 iti kerusi ‘simpan tetap’ ari Sarawak ba bepilihbesai bulan Lima tu tadi lalu bulih laluh kerusi ke perintah nuan, nuan udah ngasuh Opis Komisyen Penagang Penyalah Makai Suap mansik tuai ti udu makai suap nya.

Tuai ti benung ngamahka nama Malaysia ba mata dunya lalu udah ngasuh ati ringat ba sekeda orang politik ketegal pengeraja ti udah ditugungka enggau pemayuh ti enda patut-patut, nyau ngujungka iya empu ‘kebal’ ari undang-undang.

Pemuntan perintah nuan ngelindung raban bansa asal di Sabah enggau Sarawak ari kena perinsaka raban orang politik ti sebaka pendiau enggau raban mafia ti betuaika dua iku Kepala Menteri nya nunjukka pengelemi kuasa perintah BN enggau pengelemi menua Malaysia empu.

 

Kereja mih utai ti patut ke penguntung raban nembiak dudi hari ti endur tanah pesaka sida udah dirampas kita

Perintah minoriti nuan diatu udah semakin tepekul laban penyai dua iku tuai menua nya, Taib Mahmud enggau Musa Aman di Sabah.

Dua buah menua Malaysia di tanah Borneo nya udah nyadika kandang menua ti diperintah, diatu nyadika menua ti besai agi pengaruh ba arena politik perintah nuan.

‘Kerusi selamat’ ti udah tinggal ari arus pemansang dunya ba menua ti lama bendar udah ditejuka nuan nya udah nirika dua iku tuai enggau bala YB penyukung seduai ngatur pejalai perintah nitihka peneka ati sida.

Bala orang Taib enggau Musa diatu benung ngisi ruang dalam perintah nuan lalu sida diatu benung ngamahka nama menua Malaysia nuan ba mata dunya ngena penyalah makai suap, lalu an enda ulih ngereja sebarang utai dikena nagang sida.