Dalam pengawa malit pengawa kami ‘PR Chelum’ ti baru nya, bala pengodam ti diupah nyerang komputer-komputer kami lalu bebelitka jaku randau dalam emel enggau Skype kami, ti diatu udah dibantaika enggau chara bepilih-pilih.
Pekara ti nyelai nya, pengawa ke terubah sida nya ngeluarka cherita ti udah diulah nya suratberita Sarawak Tribune, ti enggi sida Taib Mahmud sebilik. Cherita dalam suratberita nya lalu dikeluarka enggau jampat nengah blog-blog ti nyukung sida.
Diatu, blog ti bukai nya udah ngambi lalu ngubah cherita nya baru ti kabur lalu ngenyarutka runding kitai nya, mulaika pengingat kami pasal kimpin dikena ngamahka kami baka ti dipejalaika kompeni PR, FBC Media dulu suba.
Kompeni FBC Media udah diupah Taib Mahmud dikena ngamahka nama kami ngena sebengkah kontrak ti beungkus RM5 juta sebedau kami mantaika but sida ti udah nya lalu ngujungka kompeni nya terus dipadamka.
Pengawa sida nya mega mulaika pengingat kami ngagai chara sida ti ngubah laman-laman Wiki kami ti dikereja kompeni PR, Bell Pottinger, mega diupah sida Taib Mahmud sebilik lalu udah nya dibantaika media-media British.
Semanjai beberapa minggu ti udah lalu Sarawak Report enggau stesyen-stesyen radio sida udah balat bendar kena serang bala pengodam ti diupah enggau upah ti mar, terus-menerus lalu salah ba undang-undang, ti dikereja seraban orang ti enda rindu ke kami laban kami kelalu chakah mantaika penyalah makai suap ba ngulihka kayu batang enggau berampaska tanah.
Tang kami udah mujur nyeliahka serang-serang cyber ari bala pengodam ti endang ditujuka ngagai kami nya, nyengkaum dua iti gelumbang stesyen radio kami, Radio Free Sarawak, sengkah stesyen radio ti udah dipilih nerima perais pemanah pengawa pengerembai berita ba ikas entarabansa.
Diatu, raban pengodam ti beupah tinggi nya beserungkaika akaun emel-emel enggau Skype kami lalu milih isi-isi emel ti udah nya lalu diubah-ubah baru awakka dikena nunjukka kami nya ngembuan niat ti jai.
Blog-blog nya mega nuduh kami nyerang sida ngena chara serang DDoS baka ti kala dikereja sida ba kami.
Blog ke terubah nusui pasal siku orang ti ngena nama ‘Dirk Pitt’ (ti mega dikelala enggau nama) Cullen Johnson.
Pitt udah kala nulis ngagai Penyunting Sarawak Report nengah telefon binching. Ke bendar iya lumur telefon binching nya udah kala diserahka ngagai polis dalam taun 2009 udah pengawa ngangkap dikereja ba insiden nirika empang jalai.
Kebuah pia laban pengarang berita nya udah enggau seraban pengarang berita entarabansa ti ngerekod insiden ngempang jalai ti dikereja sebengkah raban orang bansa asal.
Pitt/Cullen Johnson udah nunjukka pengerindu iya ba pengerembai berita pasal pengeraja Taib sebilik ba ikas entarabansa. Topik nya udah nyadika batang berita dalam Sarawak Report lalu laban kami endang ngembuan pengerindu ngulihka penerang enggau silik lalu ngasaika berita nya patut dibai ngagai bala pemacha kami.
Tang Pitt/Cullen Johnson nya semina ulih ngeluarka penerang ti enda ulih dikamaktka iya empu, sekali ke ngena dokumentasyen tauka penerang koroboratif.
Pekara ti lebih enda manah nya iya udah meransang kami ngupah iya ke penerang ti ulih iya. Udah nya kaul kami enggau iya ngetu tekala nya.
Kami enda nemu sekali ke Dirk Pitt/Cullen Johnson nya siku pejuang ti tulin deka ngelaban penyalah makai suap beikas tinggi, tauka siku orang ti deka ngupah kami awakka manjuk kami.
Tang iya udah madahka diri ulih betemu enggau bini Mahmud Abu Bekir Taib. Kami semina ningaka utai ti ditusui iya, tang kami enda kala mayar iya lalu kami enda kala ngeluarka utai ti dipadahka iya. Enti enda baka nya, kami deka meratika nama penyadi ba kes nya, udah bekau kami dipadahka enggau pengawa ti nyerang laman-laman web enggau asil tulis dalam Sarawak Tribune ti madahka iya udah ditangkap ketegal nipu.
Jaku tuduh iya mega madahka kami bisi nerima mayuh emel ari Alvin Chong, siku lawyer lalu mega siku orang ti landik mantu orang ba pengawa nyeliahka mayar chukai menua.
Diperatika ari emel-emel kami nya, bala pengodam madahka sida bisi tetemuka jaku penerang ari Gordon Brown ti nyebut Taib Mahmud udah ngeluarka lisin ngulihka minyak Sarawak ngagai bala kroni iya.
Tang, enda bidik bendar laban peminta ngulihka sukung nya udah dibelit-belitka ba sekeda laman web dikena orang nunjukka kami nya deka bendar ngulihka peluang ba industri nya. Sarawak Report nadai duit ti mayuh, nadai lawyer tauka orang ti landik-landik ba industri ngulihka minyak ti tau nguntungka staf sida. Sarawak Report nya semina raban orang ti sanggup bekereja enda begaji, lalu ukai raban ti ngarapka upah ari sapa-sapa.
Emel nya enda dibalas.
Kami belaba ke bisi siku dua orang udah nguji masuk lalu ngeruga sistem komputer kami laban ngulihka penerang kami nengah kedai-kedai komputer.
Enti enda baka nya sida tentu udah ngemasukka ‘Trojan-trojan’ ke dalam komputer-komputer kami tauka ngeruga akaun-akaun internet kami. Semina bida iya, cherita pasal Musa Aman enggau Taib Mahmud udah ditulis kami beduduk ba penerang, rekod tauka kereban koroboratif ti bukai.
Lebuh Sarawak Report bejalaika pansik, kami endang seruran nitihka beberapa criteria. Penerang-penerang berita nya nyadika tulang belakang kami mantaika berita pasal bala pemain penyalah makai suap kayu batang.
Kami udah numbuhka portfolio penerang, lalu enggau nya kami ulih mansutka jaku-jaku bantah ti udah dikerembaika.
Engka bala orang ti deka ngamahka nama kami nguji ‘ngaitka’ kami enggau bala konspirator bukai ti ngambi berat pasal penanggul ti nuntung rampa menua enggau kuasa mensia kini?
Enti amat baka nya, kami deka ngaku diri endang saum penemu enggau runding enggau BMF (Bruno Manser Fund) lalu enggau GW (Global Witness) enggau mayuh agi gerempung ti rinduka rampa menua sereta pengintu kuasa mensia ba ikas entarabansa.
Ke penerang bala pemacha kami, BMF enggau SR diatu benung nembuka pengawa nulis sebuah bup pasal kimpin nyelamatka Rampa Kampung Borneo ari kena keruga raban tauke kayu batang enggau orang politik ti rangka.
Ulih tauka enda Taib Mahmud enggau bala blogger ti diupah iya nya ngaga jaku aku baka kami tu?
Nya alai, aram kita pulai ngagai penemu asal nama utai ti dikedeka rakyat Malaysia dikena ngulihka kuasa demokrasi sida udah bekau bepilihbesai tu tadi ti dipalit pengamah pengawa nipu ti ngenggaika undi majoriti dikena sida milih sebengkah perintah ti ba juluk ati sida.