Bala pengundi di sitak bepilihbesai ti deka endur Sng Chee Hua bediri minta pilih disebutka bingung, laban sida udah nerima ‘Kad Nyadi Kaban’ ke parti SWP ti enda ditemu sida.
Bisi sekeda ari bala pengundi nya ti udah nerima kad nyadi kaban SWP nya udah madahka diri ringat laban sida udah dipasukka nyadi kaban parti enda ari padah ngagai sida dulu!
Enggau nya, nama utai ti benung nyadi?
Sarawak Report diatu ulih mantaika cerita ti bendar baka ni SWP numpuka tagit sida ngulihka 5,000 iku pengundi Julau lalu udah nya sida nemu diri udah nyadi kaban parti baru nya enda ditemu sida.
But nya tebantai dalam bulan Duabelas taun nyin kemari, sepengudah ngangauka siku orang dagang, Sng Chee Hua, ti madahka parti ti ditumbuhka sida sebilik nya udah ngumbuk siku orang politik, Wong Judat, ninggalka parti SPDP lalu masuk parti ti bedau temu tuju, Sarawak Workers Parti.
Ke bendar iya Sarawak Workers Party nya ditumbuhka dikena ngarika pengawa dagang sebengkah raban orang diri sebilik ti semina diarika tiga iku pugu pengari sida, Sng Chee Hua empu, anak iya Larry Sng lalu diatu, Wong Judat.
Parti SWP mega sebagi ari gerempung parti-parti dalam BN ti nyukung Taib, ti benung nipu bala pengereja pengawa di Sarawak kenyau ari 40 taun tu udah.
Diperatika ari manifesto sida, jaku ambu SWP nya kenu ku sida empu, ngarika bala pengereja pengawa ti terang bendar ngaul sida Sng sebilik nyadika pengatur pejalai pengawa raban pengereja pengawa patut berasai gaga ati ke semua pekara kebajikan ti bisi diberi.
Pekara kebajikan ti besai bendar reti ti benung chakah dipejalaika iya nya ngelakuka skim insurans pengerai, ti endur sapa-sapa orang ti deka masuk nyadi kaban SWP dipinta ngerebut peluang nya.
Tang dikena malas budi orang, sida dikarapka ngundi parti SWP ti betuaika Sng nyadika resit dikena ngamatka sida udah nerima kad nyadi kaban parti ti udu ngirauka ati nya!
‘Bala kaban’ ti udah ringat
Berita ari orang dalam madahka Wong Judat udah diumpan ngambika ninggalka SPDP lalu masuk nyadi kaban SWP di Julau ngena rega RM2 juta ari Sng Chee Hua.
Wong Judat patut tau betemegah ke diri empu laban udah netapka rega ti tinggi ke servis ngagai Sng.
Tang pengari ti dipilih Sng nya ukai semina besedia ninggalka parti asal iya SPDP, tang iya mega dipeda deka ngetup jari orang ti baru deka nyuapka pemakai ngagai mulut iya!
Baka ti udah direpotka dalam sekeda suratberita di Sarawak urung bulan Duabelas taun nyin kemari, ti madahka bala pengundi di Julau udah mut-mut meda kad nyadi kaban ke parti baru SWP bisi datai ba sida, taja pan ba sekeda kes sida ti nerima kad nya endang bala aktivis parti-parti bukai.
Ba kes enggi Patimah Bilaka, ambi ke chunto, udah diasaika Ketua Wanita SPDP ke sitak Pakan, sebuah parti ti baru ditinggalka Wong ‘Judas’!
Dikena ngepunka cherita, Sarawk Report diatu ulih ngamatka penerang ti madahka bala bos SWP udah ngagihka belanja RM30 dikena nyuap siku pengundi ngambika masuk nyadi kaban parti baru sida nya.
Uji bandingka rega Wong Judat
(RM2,000,000) enggau duit suap ke siku-siku pengundi sida (RM30 siku).
Sng Chee Hua enggau anak iya, Larry, udah ngagihka duit nya ngagai pengari baru sida, awakka bisi dikena iya nemuai lalu betemu enggau bala pengundi di rumah panjai enggau tumpuk pendiau lalu ngerejista sida nya nyadi kaban baru parti nya.
Tang Wong ‘Judas’ udah ngena chara muntang awakka iya ulih nyeliahka diri enda ibuh betemu enggau bala pengundi ti diau jauh di ulu sungai, sebengkah pengiruh, lalu ngambi duit agih RM150,000 ke diri empu dalam pengawa nya.
Iya udah nyimpan duit nya ke guna iya empu lalu ngeluarka lima ribu iti nama ari rejista nama pengundi lalu iya semina ngirumka kad nyadi kaban parti nya ngagai alamat bala pengundi sida (RM30 x 5,000 iku = RMRM150,000)!
Lebuh bala pengereja pengereja pengawa parti nya meresa semua chap jari enggau tiap iti nama dalam rejista nama bala kaban baru sida ke sitak nya, sida beratika semua chap jari nya chap ti sebaka. Semua chap jari nya enggi siku orang, iya nya enggi bini baru Wong, Angela!
Sng belabuh ringat!
Tu nunjukka pengari baru SWP nya ukai semina udah nipu bos iya, tang iya mega udah mujur ngulihka duit ti mayuh bendar ti patut disadung iya ngagai bala pengundi sida ti baru direjista enggau ungkus RM30 siku.
Nama kebuah Wong ‘Judas’ ari SWP nya patut dikarapka tauka dipilih?
Sereta iya tetemuka tipu Wong Judat baka nya, Sng Chee Hua lalu ringat, ti diatu nyau udah tetemu jalai puntul, tang iya enda tau enda ngena servis pengari iya ti enda lurus ati nya!
BN ti semakin chire
Pengari BN ke sitak Julau nya Joseph Salang Gandum ari PRS, ti endur ikas sukung bala pengundi ngagai iya diatu udah majak nurun kenyau ari beberapa bulan tu udah.
Sengki penemu entara PRS enggau SWP nya semina ba sebengkah sitak aja ti endur gerempung parti-parti dalam BN ti betuai Taib udah charut enggau diri sama diri lalu disadang deka berebutka kerusi enggau pangan diri ba bepilihbesar tu.
Mar bendar diperundingka dalam taun 2008 suba (lebuh Taib udah menang tiap kerusi) ke tiap iku pengari BN ngambika bisi berebutka kerusi.
Tang ke diatu raban dalam BN dipeda bisi enda senutuk penemu enggau pangan diri ketegal bala pengari sida nyau berebut deka bediri ba siti kerusi.
Bebanding enggau pengari-pengari ari raban penyakal Pakatan Rakyat ti ngembuan disiplin enggau chara netapka siku pengari ke tiap iti kerusi dikena sida nentuka tiap iti kerusi nya tetap diperebutka.
SWP empu betanding ba enam iti kerusi ngelaban semua pengari PRS ti betuaika James Jemut Masing.
James Masing enggau Sng Chee Hua endang lama udah bemunsuh enggau pangan diri kenyau ari dulu suba. Sng kala udah melanja James Masing, tang udah ti puas bebakih, James Masing lalu mechat Sng, lalu diatu Sng sekali agi dipechat pengari baru iya empu (Wong Judat, peratika tu).
Diatu Sng deka meda James Masing nya dibuai terus ari pengawa politik iya lalu udah meda peluang iya nyadi pengari dalam PRS ti udah teparuk dalam skandal ngenchuri bejuta-juta ringgit ari rakyat iya empu.
Nyerumba nya Taib udah belabuh ngembuan dalih dikena iya ngabas penaluk ati James Masing (ti endur iya nemu James Masing nya siku ari orang dalam kem Awang Tengah ti ngelanggur deka numbangka iya ila), lalu enggau nya, Taib udah mutuska runding diri besabi penemu enggau Sng dikena numbangka semua kerusi PRS ti sama bejuang ngena menira BN!
Kaul Taib enggau Larry Sng ti rapit seruran diperatika nyadika sebengkah elemen ti besai reti dalam chara dikena numbuk pangan ari belakang dalam gerempung segi tiga BN nya.
Duit Sng mega besai bendar reti ba Tuai BN Sarawak ti rangka nya.
Beresi
Sng Chee Hua enggau James Masing udah lama bendar dalam pengawa politik di Sarawak, lalu diatu penyarut seduai nya udu agi ari penyarut orang bukai.
Sapa ti deka ibuh ke laya lama sida enggau penyanggup sida ti deka nipu bala pengundi sida lalu mega berampaska tanah bala rakyat lalu dibalas sida enggau beberapa ringgit aja?
James Masing enggau orang kanan iya Mong Dagang enggau pengari baru ke sitak baram, Wilson Ugat, semua sida nya udah dibantaika kala besaum penemu ngulihka bejuta-juta ringgit ke sida empu enggau chara nyual tanah NCR ti kenu ku sida dikena enggau orang bedagang kunsi ba rega ti mit bendar.
Tiga iku orang tu udah ditemu nguji ngulihka penguntung masuk dagang kunsi, lalu nyerumba nya sida tiga ditemu ngeluluka diri ngangkatka pemanah pengidup bala rakyat ti lama udah miskin ngelama tu.
Ketiga-tiga sida tu udah mujur bulih kontrak beungkus bejuta-juta ringgit enggau lisin-lisin ngulihka kayu batang, sekali agi, enggau chara ngena peluang sereta salah guna penuduk menteri sida nugungka pengeraja ke sida empu.
Nama kebuah meri undi ke bala orang ti ngembuan rekod ti jai, taja pan raban penyakal udah mansutka pengari sida, Andy Wong, ti chakah bendar deka ngemunaska penyalah makai suap lalu ngenuluka rakyat?
Raban orang Pakatan Rakyat engka enda besadungka duit di sebelah rumah panjai enggau tumpuk pendiau ba pengawa bepilibesai tu. Kebuah pia laban pengawa nyadung duit nya sebengkah penyalah makai suap, lalu sida Pakatan Rakyat endang ngembuan juluk ati ti deka ngemunaskan penyalah makai suap.
Raban orang Pakatan Rakyat besemaya numbuhka perintah enggau polisi perintah ti manah lalu deka dikena tekala nya mantu raban orang ti seranta di Sarawak. Perintah ti manah deka ngangkatka pemanah pengidup bala orang pengereja pengawa, baka di menua Singapura, lalu ukai baka di Kuching, Sarawak.
Bala pengundi tau ngambi semua duit ti disadung raban orang ari SWP enggau PRS, tang sida mega ditangkan ngambika ngundi parti ti enda meri sida duit.
Enggau chara nerima duit tang enda ngundi nya ukai nyadika penyalah makai suap, tang penyalah nya nuntung bala orang politik di nyadung duit nya. Bala pengundi enda patut kelalu taluk ke sebarang parti ti nanggam sida ngena duit ti endang duit sida empu.
