Raban NGO Global Witness ti bisi indu opis di UK nya udah meri saut ti manah bendar ngagai kangau Taib Mahmud ti meri diri deka besara-penemu pasal penyalah makai suap enggau pengawa ngerampas tanah ti balat dikereja rejim perintah iya di menua Sarawak.
Lalu saut sida ke jaku kangau iya nya “au”.
Ba rambau pengawa bepilihbesai di Sarawak baka ke diatu, kangau besara-penemu ari Kepala Menteri nya tau bendar ngasuh ati tuai PKR Baru Bian enggau pengari DAP Chong Chieng Jen gaga sereta teperansang.
Dua iku orang politik nya kala ngangau lalu mai Kepala Menteri nya besara-penemu enggau seduai, tang naka ke diatu kangau seduai nya udah ditulak sereta dikeleseka iya.
Diatu Kepala Menteri Sarawak nya dipeda rindu agi belaban sara penemu enggau raban NGO menua tasik di TV enti dibandingka besara-penemu enggau raban penyakal di menua iya empu!
Semina bejaku angin aja!
Tang ke bendar, mayuh orang enda arapka Kepala Menteri nya, ti rindu agi nyaut jaku tanya ti mudah-mudah, deka nerima kangau besara-penemu nya enggau chara tebuka.
Enggau nya raban ari Global Witness, ti nyadika sebengkah NGO ti ngelaban penyalah makai suap lalu pia mega besenutuk enggau pengelikun rampa menua ti nerima belanja ari mayuh bengkah gerempung (nyengkaum ari Perintah British enggau Open Society Institute) udah nuliska sepuchuk surat tebuka ngagai Taib ti endur sida ngerintaika pelasar jaku-jaku tuduh sida pasal penyalah makai suap di menua ti diperintah Taib enggau pengerusak rampa kampung ti dikereja iya atas rampa menua di Sarawak.
Nitihka jaku raban NGO nya, semina sekeping gambar satelit aja udah chukup dikena ngayanka pemula Taib ti seruran madahka laluh rampa kampung Sarawak ti agi mengkang nya 70% ti ditaga nyadika kampung galau sereta “gemu baka selama”.
Gambar nya nunjukka bida entara kampung bungas di menua Brunei ti diintu enggau manah enggau kandang menua di Sarawak ti udah balat dikeruga, ti udah ditebang beberapa kali datai ngagai ikas “ti enda ulih dijaga agi”.
Sama-sama bisi dikena mantaika pemula Taib nya mega, raban NGO nya ngeluarka siti agi gambar sebengkah kandang menua ti dikumbai Taib “langgur taman negara”. Kandang menua nya udah rusak bendar, taja pan dulu ari tu kandang menua nya endang ditagaka perintah nyadika kampung galau sereta dijaga.
Pengerangka Taib ba rampa menua di Sarawak udah disimpul NGO, ti madahka ikas pengawa nebang kayu batang di Sarawak nya iya ti pemadu jampat di dunya tu.
Kondisyen-kondisyen kami
Global Witness udah netapka beberapa iti kondisyen nyadika pelasar sida ngambi bagi ba sara-penemu enggau Taib Mahmud nya.
Ke terubah nya, sida minta jamin ke selamat bala orang ti enggau besara-penemu, laban ngelama tu Taib endang ditemu tebilang enggai nerima orang siku-siku tama ngagai menua iya, nangkap sereta ngetanka sida, ti datai deka mantah pengawa iya.
Tang Global Witness mega minta kondisyen-kondisyen ti bukai. Terubah iya sida minta dibantaika enggau penuh pasal semua kaul Taib nyadi pengarah enggau pemegai share dalam semua kompeni sida sebilik di Sarawak ti suah nerima lisin enggau kontrak ari perintah Sarawak. Tu nyengkaum semua kompeni ti dipejalaika bala nomini iya.
Raban NGO nya mega minta dipadahka baka ni Opis Menteri Pengeraja Asal, Perambu enggau Rampa Menua Sarawak ulih meri arah ngagai Opis Kampung Sarawak enggau Opis Tanah enggau Survei Sarawak ngeluarka lisin-lisin ngulihka kayu batang lalu mega ngeluarka surat-surat pala tanah (dikena orang muka kebun dandang besai).
Enggau Taib Mahmud empu ti nyadi Menteri Pengeraja Asal, Permabu enggau Rampa Menua Sarawak lalu salah guna kuasa iya di Sarawak udah dikereja iya ba skala ti besai, iya tentu enda sanggup meri sebarang penerang enggau chara enda mantaika penyalah makai suap ti dikereja iya.
NGO nya mega minta penerang pasal semua reta pengeraja Taib di menua tasik enggau sebarang pejalai kompeni-kompeni iya sama enggau lawyer iya, Alvin Chong, baka ti udah didinga meri penerang ti madahka iya siku orang ti landik ba pengawa nyeliahka chukai enggau bekenaka nomini-nomini dikena ngelalaika orang ti bendar bempu kompeni sida di menua Sarawak.
Alvin Chong udah ngelanggur deka nyual beberapa iti kandang endur di Sarawak enggau chara belalai ngagai raban orang ari menua tasik ti deka meli rampa kampung Sarawak nengah nomini lebuh ti ditanya ba video Global Witness nya.
Jaku-jaku ambu enggau utai ti bendar
Ke penudi iya NGO nya bisi mantaika sebengkah gambarajah ti enda senutuk enggau jaku ambu Kepala Menteri nya pasal atur ngintu rampa menua enggau penerang ti amat di menua Sarawak.
Jaku ambu ti terubah nya pasal kampung galau, Global Witness madahka bala pemesai perintah di Sarawak udah madahka 1 juta hektar kampung Sarawak ti “dijaga enggau manah”, lalu nagang sebarang pengawa nebang. Sida mega madahka menua Sarawak nyadika “menua ti meri bantyu” ba projek ngintu rampa kampung tiga menua ‘Heart Of Borneo’ ti diatur WWF.
Ke bendar iya semina 0.5 juta hektar aja pemesai rampa kampung ti benung dijaga lalu semina ¼ ari kandang “Heart Of Borneo” Sarawak nya agi gemu lalu bedau dikeruga sapa-sapa; laluh ¼ agi udah dilisinka ngambika ditebang. Mayuh agi ari kandang rampa kampung ti udah dirusak ba kandang ‘Heart Of Borneo’ di Sarawak belabuh ari 2005-2010 enti dibandingka enggau Borneo Indonesia, Sabah enggau Brunei dipegulaika sekali.
Jaku penerang pelesu ti kedua nya pasal atur ngintu rampa kampung ti dikumbai meruan. Taib seruran madahka Sarawak bejalaika atur ‘kampung ti meruan’: numbangka sekeda ari kayu ti besai-besai batang lalu nejuka kampung nya mansang besai kediri dalam pengelama 25 taun.
Ke bendar iya repot Pansik Empas Ngagai Rampa Menua udah nunjukka rampa kampung Sarawak udah ditebang kelalu suah dalam kandang 25 taun.
Jaku ambu ti ketiga nya pasal sukung entarabansa ari UN ti dikaitka enggau gerempung ITTO. Taib udah ngambu madahka ITTO udah ‘ngamatka’ atur enggau pelasar atur pengawa ngintu kampung di Sarawak nya ‘entara’ ti pemadu manah di dunya, nitihka perati enggau pansik Global Witness.
Taib mega ngaku misyen ITTO ke menua Sarawak dalam taun 1990 suba nya dikena “besenutuk penemu enggau pekara ti dikereja” lalu menua Sarawak nya nitihka sanding penemu ari ITTO dikena nagang nebang 9.2 juta meter kubik kayu batang dalam setaun.
Ke bendar iya, nitihka penerang NGO nya, ITTO enda kala ‘ngamatka’ polisi enggau pengawa ngintu rampa kampung Sarawak. Misyen ITTO dalam taun 1990 di Sarawak nya bisi nemu penerang pasal rampa kampung di Sarawak udah kala ditebang lebih ari dua kali lipat ari ti dikemendarka.
Surat tebuka nuju Taib tau dibacha ditu http://sarawak.s3.amazonaws.com/documents/Open-letter-Fact-Sheet.pdf
Sarawak Report nyadang sida enda bulih sebarang saut ari kepala Menteri nya, ti benung napi penanggul penyarut dalam parti iya empu rambau bepilihbesai tu, ti endur lebih setengah ari bala pugu pengari BN iya udah kala dibantaika bekaul enggau penyalah makai suap enggau salah guna kuasa sida.