Video ti dibantaika bekaul enggau penyalah makai suap Taib Mahmud sebilik enggau mega rejim perintah iya udah balat bendar dikerandauka mensia mayuh ba pun minggu tu tadi.

Lebuh ti bejaku enggau pengarang berita seraya ke direkod ngena kamera video kemari Kepala Menteri ti seruran didinga bejaku besai nya udah nguji ngayanka mua iya ti gaga sereta ransing, tang enda lama udah nya pengeringat iya enda ulih dilalaika iya agi.

Sarawak Report bisi dipadahka pasal bala lawyer iya di nengeri London udah beminggu-minggu nguji nutup mulut raban NGO Global Witness sebedau video nya dipandangka.

Lalu ngena mayuh tegal ti disebut iya, Kepala Menteri nya udah ngukir sebengkah pekat ti mar bendar diperetika dikena “meti iya” ti dipeda baka ti melakangka semua akal logik, lalu nyerumba nya nuduh bala orang ti mujur bulih penguntung ari rejim perintah iya ti ngundan pechat.

Enggau perening mata iya ti siga lalu udah nya iya mulaika diri nunga kamera udah iya ninggalka pengarang berita enda lama, iya besalah bala kaban iya empu, iya nya bala anak indu aya iya empu, Tun Abdul Rahman Bin Ya’kub.

[youtube https://www.youtube.com/watch?feature=player_embedded&v=gCD9eKT4EsA]

Raja Buban Sarawak ti jutawan nya udah, ke terubah iya, nguji nunjukka diri empu nyadika dengah seraban NGO ti kering.

Tang enggau numpuka jaku iya ngagai cherita lama iya, iya nya penyarut iya enggau aya iya empu, Taib Mahmud udah enda ingatka penerang bukai ti dibantaika dalam video nya.

Batang penemu ti dikenang bala orang ti direkod dalam video nya endang sebaka magang, iya nya baka ni Taib Mahmud udah meri lisin ke tiap iti pekara di Sarawak, lalu sekalika ke penguntung sida sebilik tauka dikena iya ngulihka duit suap ke iya empu.

Seraban orang diri sebilik ari bala kroni ti semak bendar enggau iya dalam pengawa dagang, iya nya sida Hii sebilik, mega bisi direkod dalam video nya ti ngaku Datuk Hii Yii Peng bulih mayuh lisin ketegal ti bekaul rapat enggau  Kepala Menteri lalu iya suah mayar duit penulu 10% dikena iya malas budi Kepala Menteri nya.

Orang ti bejaku nya anak menyadi Hii Yii Peng, ti nyadi lawyer sida Hii sebilik ti bejuraika pengawa jual-beli tanah NCR, ti udah dirampas lalu diberika Taib Mahmud ngagai sida.

Sekalika sida Hii sebilik mega bisi bekaul enggau pekat dikena sida ngetup mjari orang ti udah nyapi pemakai ngagai mulut sida?

Lalu baka ni ku lawyer Alvin Chong, ti mayuh udah bulih penguntung ari pengawa ti bekaul enggau Taib Mahmud, nyengkaum pengawa iya ti ngarika Opis Tanah enggau Survei Sarawak?

Chong didinga enda ngetu-ngetu bejaku pasal chara-chara dikena iya ngereja pengawa nipu lalu nyeliahka chukai, baka ti dikereja iya ke bala anak indu Tun Rahman, lalu iya ngeringka penemu diri madahka chara ngatur dagang baka nya endang seruran dikereja di menua Sarawak.

Menua Singapura, ku terang Chong, nya sebengkah menua ti endur tiap iku orang ti deka nerima bayar ke pengawa dagang tanah baka nya, laban menua nya selamat ari opis chukai ti deka mansik sebarang penguntung, enti dibandingka enggau penyampau ti mimit ti deka dichabut Taib Mahmud ba tanah bala orang bansa asal enggau mega ba menua Sarawak.

Ngena ketegal-ketegal ti munyi nya, Taib Mahmud udah nunjukka sengki penemu  lama iya enggau aya ti dipeda nyadika sebengkah chara iya ngelimpangka perening mensia mayuh (ari isi ke bendar video nya).

Pekara ti berupai iya nya empas ari penyarut nya, ti udah nyadi lebuh Taib Mahmud ngambi kuasa enggau penuduk ari aya iya dalam taun 1980-an suba, ti endur iya lalu madamka semua lisin korup, ti udah diberi Tun Rahman ngagai bala iya empu.

Taib Mahmud udah nentuka lisin-lisin ti baru nya patut nguntungka iya lalu mega ke bala kroni iya, lalu nyerumba nya iya ngeluluka diri chakah ngemunaska penyalah makai suap seraya ke nyelamatka kampung menua Sarawak ari kena keruga.

Enti Awang Tengah mujur nganti penuduk enggau kuasa Taib Mahmud nyadi kepala menteri ti baru sepengudah bepilihbesai tu ila (baka ti kala direpotka kami dulu ari tu) kitai deka meratika pengawa madamka semua lisin ti dulu lalu udah nya ngeluarka lisin-lisin nya ngagai orang baru ti bukai.

Pemula ti pemadu banggar ti pansut ari mulut Taib Mahmud kemari iya nya dawa mudah iya ti madahka tiap iti pekara ti dikereja di menua Sarawak nya ukai nengah ujung bilik, tang dikereja enggau chara tebuka, tampak sereta nitihka undang-undang menua.

Tang, baka ti ditemu tiap iku orang, semua kontrak enggau lisin ti besai-besai di menua Sarawak endang suah dipejuraika enggau chara belalai sereta nadai ngena atur tender tebuka lalu ba pengujung pengawa nya, kontrak enggau lisin nya deka terengkah ba jari sida sebilik, bala proksi iya tauka bala kroni iya!

Taib Mahmud nya endang asal iya siku lawyer lalu iya udah nentuka, taja pan udah 30 taun ngereja penyalah makai suap, iya agi nemu baka ni sesebengkah pekara nya dipejalaika. Tang iya ukai meri pechaya ke orang bukai, kelimpah ari meri pechaya ke iya empu enti iya ngumbai orang deka pechaya baka ni semua pekara nya diatur di menua Sarawak.

Tu meh kebuah tiap iku orang, nyengkaum lawyer iya, Alvin Chong, bejaku durah-durah ngenang pasal penyalah makai suap di nyadi dalam sistem perintah BN. Agi mega, baka ni orang baka iya ulih nyeliahka diri ari pengawa dagang ti salah lalu nyeliahka chukai ti tinggi enti Taib Mahmud empu enda nutup mata ngagai pengawa nerumpak rakyat iya empu?

Sekali ke tu udah datai ba maya endur perintah ti baru deka meresi semua pekara ti baka tu?