Di sepemanjai tiga taun Sarawak Report udah nuliska repot ti nyau ka ninting minggu pasal pengawa nerumpak tanah enggau ngeruga rampa kampung ti dikereja Taib Mahmud enggau sida sebilik ba menua Sarawak enggau ba rakyat iya empu.
Kami udah dikumbai iya penempa cherita bula lalu semua penerang (ti mayuh agi diambi kami ari rekod awam) udah diseliahka iya lalu dikumbai iya bula sereta pelesu magang.
Taib Mahmud udah ngupah mayuh lawyer dikena iya bedawa kami; Bala agensi PR diupah dikena bejai nama raban kami tu; bala juruteknik ti landik-landik diupah awakka ngerusak laman web lalu ngapuska stesyen radio kami; Kelimpah ari nya kami bisi mega dikirumka iya jaku emba nengah email dikena ngemunaska kami.
Tang diatu mensia di serata dunya ulih meda enggau mata diri empu tiap iti pekara ti direpotka kami ngelama tu pasal ulah enggau pendiau Taib Mahmud ba menua iya empu endang amat sereta nyata magang-magang.
Kebuah pia laban lawyer iya empu, Alvin Chong, enggau bala sida sebilik ti nusui cherita enggau silik ba mua kamera – ti enda ditemu sida lalu udah ngerekod semua jaku sida enggau chara resia!
Sama-sama kena rekod kamera ti dilalaika nya, siku ari kroni besai ke Taib Mahmud, iya nya sida Datuk Hii Yii Peng sebilik, ti endur Datuk Hii nya siku orang dagang ti bempu jarin Hotel Kingwood, lalu mega siku orang ti suah nerima lisin ngulihka kayu batang enggau lisin dikena muka kebun dandang besai sawit ari Taib Mahmud. Enti bala pemacha deka nemu nama kebuah sida tu dikerinduka Taib Mahmud, peratika filem nya enggau lenak, baka ni sida nusui enggau silik chara-chara sida bejalaika pengawa dagang tanah sida nya enggau Kepala Menteri nya. Taib Mahmud udah meri sida lisin lalu dikena sida malas pemanah iya, sida meri 10% duit penulu ngagai iya.
Filem nya ngundan mayuh jaku penerang ngaku, ti endur lawyer enggau bala petunggal Taib Mahmud udah ngeleseka bala orang bansa asal di Sarawak ti merinsa ti ditipu sida, tau dipeda ba portal online berita Al Jazeera, nyengkaum filem penuh ti direkod chara belalai raban NGO Global Witness.
Nyangka agi mayuh resia ti ulih dikusaika filem nya bebanding jaku-jaku penerang ti dipansutka bala sida Taib Mahmud sebilik, lawyer enggau mega bala kroni iya ba maya sida nguji nyual utai ti diterima sida ari iya ti ulih ngena penuduk enggau kuasa iya ngemataka Opis Tanah enggau Survei, nyengkaum semua opis perintah di menua Sarawak.
Kandang menua ti dipedagangka sida nya dikumbai ‘tanah menua’, tang baka ti ditemu NGO Global Witness nya, bala sida Datuk Hii sebilik enggau bala anak Tun Rahman Ya’kub nya endang megai surat pala tanah ke tanah NCR enggi orang bansa asal, ti udah nyadi tanah pesaka sida bepuluh-puluh taun lalu diatu sida udah kena buru pansut ari tanah nya.
Sida udah nerangka baka ni Taib Mahmud mutuska runding diri empu meri sida tanah-tanah NCR. Pemeri nya nyadika sebengkah pengandal ke Taib Mahmud empu dikena ngulihka sebagi ari untung ti ulih sida ila.
Ukai semina naka nya aja, tang ba sepemanjai atur nya semua raban apek bayat Taib Mahmud nya udah nyeliahka diri ari kena chukai ti deka pulai ngagai wang turu menua Sarawak. Atur enchabut chukai nya semina dipejalaika perintah ti betuaika Taib Mahmud ba orang bukai aja!
Diterangka ba pun filem nya bala petunggal ke Taib Mahmud, iya nya bala anak indu Kepala Menteri Sarawak ke dulu suba, Tun Abdul Rahman Ya’kub. Siku ari sida petunggal iya nya ti benung mangku pengawa nyadi Kaban Parlimen ke sitak Tanjung Manis, Norah Binti Tun Abdul Rahman.
Kedua iku petunggal Taib Mahmud nya ngumbai seduai iya benung betemu lalu berandau enggau siku orang dagang ari menua UK, ti deka meli tanah ngarika siku orang dagang ari menua Arab ti bisi ati deka muka kebun sawit ba atas tanah NCR di Sarawak. Tang ke bendar iya, petunggal Taib Mahmud dua iku nya udah digambar siti kamera ti dilalaika, ba sebengkah chara dikena Global Witness nya bejalaika pansik sida ba penyalah makai suap ti bisi bekaul enggau Kepala Menteri.
Tang ke bendar iya ‘orang dagang’ ari Global Witness nya udah diasuh sekeda pemesai perintah menua Sarawak betemu enggau bala kroni ti semak bendar enggau Taib Mahmud, ti udah bulih tanah lalu ngarapka diri ulih nyual tanah nya baru dikena ngulihka untung ti tinggi agi. Semilan iku anak indu Tun Rahman nya udah mujur bulih sebidang tanah ti menua Julau, Sarawak, ti diterima sida nengah kompeni sida empu Ample Agro Sdn Bhd, munyi ti kala direpotka kami dalam artikel kami “Ladies With Titles”, ti ngayanka baka ni raban sida ti indu ari sida sebilik enggau bala bini bala kroni iya bulih kandang endur ti luas nengah opis-opis ti dikemataka iya.
Pengarah kompeni nya ti bisi dipasukka dalam rintai nama dalam kompeni nya, nyengkaum Fatimah Abdul Rahman, ti ngena opis perintah ti besukungka pengawa dagang, iya nya Tanjung Manis Development Hub, ti endur adi indu iya, Norah Abdul Rahman nyadi Kepala Eksekutif dia.
Diatu tanah nya diperebutka dalam court laban tanah NCR nya endang bisi orang bansa asal ti bempu iya, tang penyarut tanah tu deka didinga kitai silik agi ba maya dudi hari ila.
Enggau enda ditemu iya, Fatimah udah enda berasai mansutka semua pekara ba jaku randau iya enggau pemansik ari Global Witness nya. Pekara ti pemadu berupai dikerandauka iya maya nya iya nya rega pinta, ti udah nya dikira pemansik nya tau meri untung USD$16 juta lebuh maya iya mayar premium tanah nya ti semina beungkus USD$300,000 aja (tang ukai nyadika bayar penulu).
Udah nya bala anak indu Tun Rahman enggau sida ti bukai ti udah kena rekod dalam filem nya udah nguji bebulaka jaku sida empu, tang nya ari ketegal sida enda nemu diri kena rekod!
Ba selampur atur pengawa bejual-beli nya diterangka enggau silik siku lawyer ke Taib Mahmud, benama Alvin Chong, ti sama dibai berandau endur berundingka pengawa dagang nya.
Nitihka penerang ari Alvin Chong, semina “rega nominal” aja enda tau enda dibayar di menua Sarawak, dikena nyeliahka chukai perintah Taib Mahmud empu. Lalu “rega ke penuh ti bukai” enda tau enda dibayar chara belalai di menua Singapura!
Lawyer sida Taib Mahmud sebilik nya, ti dipeda udah besedia bendar deka mantu ba pengawa makai suap nya tau bendar ngujungka anak guam iya kena tinggang ukum jel. Alvin Chong nya nyadika siku lawyer ti tebilang di menua Sarawak, ti suah dikaitka enggau Kepala Menteri enggau mega petunggal iya, Abdul Hamed Sepawi.
Alvin Chong nya bekereja ke kompeni-kompeni sida Taib Mahmud baka Naim Candera, Sarawak Plantaions, Dayang Enterprise Holdings. Iya mega bisi ditemu ngarika Pengarah Opis Tanah enggau Survei Sarawak. Iya mega mutarka pengawa ngelancharka share ke Sarawak Cable, sebengkah kompeni besai enggi Taib Mahmud ti diberi iya ngagai anak lelaki iya, Mahmud Abu Bekir bin Taib.
Sebagi ari filem nya ti jai bendar dipeda iya nya pasal chara Fatimah ngaku diri baka ni iya enggau selampur sida Taib Mahmud nya sebilik udah ngemelika bala orang bansa asal ti ‘buta’, ‘merinsa’ enggau ‘manchal’ ti ngelaban sapa-sapa orang ti ngeruga tanah sida.
Tanah-tanah ti dijual bala anak Tun Rahman nya enggau mega sida Datuk Hii Yii Peng sebilik nya endang tanah-tanah NCR, ti dirampas sida ngena polisi tanah baru ti digaga Taib Mahmud dikena iya melakangka kuasa orang bansa asal enggau pengawa ngintu rampa kampung enggau mega bala orang ti nguan menua pesisir.
Tang Fatimah udah sumbung bendar jaku ngumbai bala orang bansa asal ti merinsa ti kena keruga sida tanah nya raban “orang setinggan ti udu rangka”. Dalam filem nya mega iya ngumbai orang bansa asal nya ‘manchal’ ketegal sida ngelaban pengawa orang ti ngerampas tanah sida empu baka ti dikereja Fatimah enggau bala menyadi iya.
Fatimah udah ngaku bala orang bansa asal nya orang ti merinsa, tang iya enda ingat ngaku bisi sekeda raban orang bansa asal nya udah kala menang bechara dalam court bekaul enggau keruga tanah sida ti dikereja Kepala Menteri. Enggau chara ti berupai bendar Fatimah enda merening ironi pengawa iya ti ngulihka beratus-juta dollar penguntung ari tanah bala orang bansa asal nya ti minta dibayar iya pampas ti mimit aja.
Sama enda dikenang iya mega jaku iya nya udah nganchurkan dawa Taib Mahmud ti madahka iya udah nambahka pengeraja enggau ngemansangka rakyat iya nengah pengawa nebang kayu batang enggau muka kebun sawit bedandang besai.
NGO Global Witness nya sebengkah agensi entarabansa ti tebilang bendar lalu dipebasaka semua raban orang di serata dunya tu lalu filem-filem nya sida udah ngamatka repot enggau penerang Sarawak Report ti ngumbai laluh kampung bungas di menua Sarawak agi bisi 5% aja, taja pan Taib Mahmud seruran ngumbai menua iya nya bisi 75% kampung bungas ti bedau dikereja, sebengkah jaku penerang ari siku pemesai menua ti bula sereta banggar.
Kepala Menteri nya udah bula sereta nerumpak rakyat iya empu, ti besenutuk enggau nya raban Global Witness udah ngamatka pansik kami ti madahka enda kurang ari 200,000 kilometer pesegi tanah udah diambi bala sida sebilik, nyengkaum menyadi indu iya empu Raziah, anak lelaki iya Abu bekir enggau anak menyadi iya, Elia Abas.
Lawyer ke pengawa ngerampas tanah, Alvin Chong mega bisi didinga ngeleseka bala orang bansa asal ti merinsa ti kena tekan di menua Sarawak.
Alvin Chong, dalam filem ti direkod kamera ti dilalaika nya, bisi nerangka baka ni iya ulih ngemendarka sekat orang ari menua tasik ti deka ngambi tanah di Sarawak. Chara nya, ku iya, iya nya ngasuh orang bansa asal nyadi nomini, tang semua atur nya dipejalaika enggau chara belalai di Singapura, laban undang-undang Malaysia minta orang bansa asal aja ti tau diterangka nyadi pengempu tanah nya. Chong mega madahka iya deka ngiga siku orang ti enda ibuhka sebarang utai lalu diau jauh di menua pesisir. Nitihka jaku iya, “atur jual-beli resia” nya dikena ngiga sebarang orang bansa asal ti merinsa, ti enda bulih sebarang untung ari sanding penemu sebarang lawyer lalu enda ulih digiga sapa-sapa, lalu meri iya RM10,000 awakka nama iya ulih dipasukka nyadi orang ti bisi bagi dalam kompeni nya.
Filem Global Witness tu nyadika sebagi ari penerang ti mujur digumpul pasal penyalah makai suap di menua Sarawak. Penyalah makai suap nya nyau udah tebalan dalam pengidup orang baka sida anak Tun Rahman, nyentuk ke sida nyau enda berasai takut sereta malu ngelanggar undang-undang.
Agi pan mega orang ti ngelaban undang-undang nya siku tuai perintah menua nya empu.
Fatimah udah nyadika iya sebengkah pengamat ti lalu dientudika iya enggau lekik ketawa iya lebuh iya ngaku Taib Mahmud nya siku tuai perintah ti udu makai suap sebaka enggau tuai-tuai perintah menua bukai di dunya tu.
Filem tu deka nyadi ke buah kenang rakyat Malaysia. Tang rakyat Malaysia deka nyadang BN enggau Menteri Besai Najib Razak tentu enggai ngambi tindak ngelaban tuai menua ti udu dibelit penyalah makai suap, laban sida nemu Taib Mahmud nya nyadika undi “simpanan tetap” sida ba pengawa bepilihbesai ti deka diatur enda lama agi.
Sekali ke tu maya kita deka ngamatka sida nya salah magang-magang?