Agensi berita ti tebilang di dunya, Reuters, diatu nyadika sebengkah agi gerempung penyadung berita ti betanyaka pasal perambu runding gila Taib Mahmud ti deka ngubah menua Sarawak nyadi sebengkah taman industri ti pemadu besai, ngeluarka kuasa elektrik ti murah ngambika dibekalka ngagai kilang-kilang pengelela besi ti pemadu kamah ke rampa menua di dunya tu.
Bekaul enggau Murum, agensi berita nya belabuh meratika enda kurang ari 40 buah trak pengangkut kayu batang (enggi kompeni Shin Yang, sebengkah kroni Taib Mahmud) dalam sejam betengahka jalai mai semua kayu ari kandang kampung ti penudi di Sarawak.
Nitihka pansik raban NGO, Global Witness, kayu batang nya diangkut pansut ari kandang menua ti kala ditetapka nyadi Taman Negara ke menua Sarawak. Artikel dalam berita Reuters (di baruh tu) nusui pasal projek SCORE asil runding gila Abdul Taib Mahmud nya.
Asil tulis Siva Sithraputhran
MURUM, Malaysia | Hari Empat Disember 13, 2012 4:09 petang EST
Disember 14 (Reuters) – seraban trak besai-besai ti nengah jalai ngagai tekat Murum ti benung digaga udah balat bendar dipeda ngasilka debu lalu tau bendar nanggul pejalai kerita bukai ti nengah jalai nya. Dalam timpuh sejam 40 buah trak nya pansut ari kandang endur nya, ti sarat ngundan kayu batang ti baru ditebang.
Tekat ti digaga ba pati batang Rajang nya nyadika sebengkah tekah dikena ngemunka pengawa nekat mayuh agi batang sungai ti besai-besai ti Sarawak datai ngagai taun 2020 dikena ngulihka kuasa elektrik ti murah lalu mega dikena ngubah sebengkah menua ti pemadu miskin di Malaysia ngambika nyadi sebengkah menua berindustri enggau hab kuasa ba pelilih menua Asia Tenggara.
Pengawa ngulihka kuasa elektrik ari batang sungai ti besai-besai nya lalu disempulang penemu ti madahka menua Sarawak endang beduduk ba kandang endur ti nengkeman bendar entara menua India enggau China, udah meransang bala orang ti merambuka projek 12 buah tekat nya deka dikena magang datai ba taun 2020.
Tang penemu nya deka nyadika menua Sarawak deka napi lebih kuasa elektrik 20 kali lipat ari ti udah chukup dikena, munyi ti disakal sereta dibantah raban penyakal, ti madahka menua Sarawak enda begunaka kelalu mayuh tekat ai ti baka nya.
Perambu nya udah ngundang mayuh agi jaku sakal enggau bantah ari raban penyakal ti datai ari raban NGO ti rinduka pemanah rampa menua, ti madahka pengerusak rampa menua nya deka semina nguntungka sekeda raban elit aja.
Orang ti nyadika tulang belakang projek $110 billion nya – ti dikelala enggau nama SCORE – Kepala Menteri Taib, endang bebendar amat sekumbang megai perintah 30 taun di Sarawak.
“Iya merintah Sarawak baka sebengkah dagang ke penguntung iya empu,” pia ko Clare Rewcastle-Brown, siku orang ti beempu laman blog Sarawak Report penyepu wisel ti mega ipar Menteri Besai Britain dulu suba, Gordon Brown.
“Taib berupai bendar ngeringka penemu iya ba pengawa ngerusak rampa menua, nebang semua kampung, lalu ngubah menua nya nyadika kandang endur nudukka kilang ti besai-besai”.
Taib madahka projek nya deka ngeluarka bala pengereja pengawa ti landik lalu mantu menua Sarawak nyadi sebengkah menua ti pemadu kaya dalam Malaysia.
Kepala Menteri ti mangku pengawa menteri perambu enggau pengeraja asal sereta enggau menteri pekara belanja Sarawak, diatu benung diperatika Opis Pemunas Makai Suap (MACC) kenyau ari taun 2011, tang datai ke sehari tu iya lalu enda ulih didawa. Iya ngembuan pengaruh ti tegap ti endur iya nyadika siku tuai ti balat dipeguna perintah BN ba pengawa bepilih besai tu ila.
Taib udah nyangkal tuduh orang ke penyalah iya lalu opis iya suah enggai meri kerejasama ke peminta raban pengarang berita ari Reuters ti deka betemu enggau iya. Kepala menteri nya madahka pengeraja sida sebilik nya beduduk ba pemintar enggau pemandai sida sebilik.
“Iya udah mai pemansang ke menua Sarawak sekumbang iya megai perintah,” pia ko Mahathir Mohamad, Menteri Besai Malaysia ti dulu suba, madah ngagai Reuters dalam sebengkah jaku randau.
“Iya deka ngemansangka mayuh agi kuasa elektrik tang iya udah chakah bendar nyual kuasa elektrik … iya mai mayuh kilang ngagai menua iya.”
Pengawa begagaka tekat ai di Sarawak udah ngujungka mayuh jaku tanya bekaul enggau pengerusak rampa menua enggau gerempung duit jali entarabansa.
Gerempung NGO Global Witness, ti bepalan di Britain, udah mantah bank HSBC laban bejalaika pengawa melanja kompeni-kompeni ti ditemu ngulihka kayu batang enggau chara ti salah sereta ngelanggar undang-undang menua di Sarawak, lalu madahka pengawa sida nya udah ngelanggar atur nyaga pemanah rampa menua.
HSBC udah enggai meri penerang bekaul enggau pekara tu.
Raban lawyer bansa menua Swiss udah muka keretas pansik bekaul enggau UBS dalam bulan Lapan tu tadi udah bekau bank nya bisi mantu penyalah ngubah duit ba pengawa salah ngulihka kayu batang di Sabah, sebengkah menua ti berimbai enggau Sarawak. UBS udah madahka sida bisi meri kereja sama sida ngagai bala lawyer bansa Swiss nya.
Menua Sarawak udah nguji narit bala orang ari menua tasik ti deka beranakka puku, enggau chara ngurangka chukai dagang, ngambika numbuhka industri pengelela aluminum enggau pengawa ngeluarka besi steel.
Menua Sarawak madahka diri udah bulih dagang 29 billion ringgit ari kompeni-kompeni menua tasik nyengkaum ari menua Arab, Australia, Hong Kong, Jepun enggau menua Malaysia empu. Bisi 334 billion ringgit pengawa dagang udah disadang datai ba taun 2030 nyin ila.
Dikena muji pemujur sida empu, laman web projek nya udah ngayanka orang bansa asal begambar melakangka rampa menua ti bisi utai tumbuh enggau ai terejun.
Pekara nya udah besangkal enggau pengirau ati raban orang ti rinduka pemanah rampa menua ti madahka menua Sarawak deka lenyau kampung ngagai 5 peratus. Tang perintah Sarawak udah nyakal jaku nya ti endur sida madahka menua nya agi bisi kampung 70%, tang raban aktivis nya madahka penerang sida nya nyerangkum rampa menua ti kena buka nyadi kebun sawit bedandang besai.
Lebuh raban pengarang berita ari Reuters bisi nemuai ngagai Murum ba bulan Sepuluh tu tadi, sida bisi betemu enggau mayuh orang Penan ti benung bejaga ba empang jalai ti didirika sida dikena nagang pemasuk lori ti ngangkut barang ngagai tapak telat ai nya ti deka ngampuhka rampa menua sida ila.
“Kami enda ibuhka diri lelak, ujan bangat, panas bisa, kami enda tau enda ngereja tu,” ko siku indu 36 taun, Layu Kara, ditanya benung iya makai belauk linut mulung enggau paku ari babas ti nyadika pemakai sida ke terubah pagi nya.
Bala orang kampung, ti sebagi ari 1,500 iku orang ti deka dipindahka ketegal tekat ai ti berega 4 billion ringgit nya ila, diatu minta pampas ke tanah sida ti deka diampuhka ai. Tekat ai Baram ti deka digaga, deka mindahka 20,000 iku orang bansa asal menua nya mega, ko raban NGO nya.
Kompeni-kompeni ari menua China, sekeda ari sida nya ti udah bisi enggau ngaga tekat ai ti udu napi jaku bantah nya, bisi enggau ngaga tekat Murum lalu bisi bendar peluang mujur ngulihka projek nya. Sinohydro Corporation udah mujur nembuka Bakun, lalu kompeni Three Gorges Corporation, mega ari menua China, udah mujur bulih kontrak ngaga tekat Murum.
Bala orang ti mantah projek-projek tekat ai nya udah betanyaka atur pengawa ti ngeluarka penyampau kuasa elektrik ti kelalu mayuh lebih ari peminta, seraya nunjukka penanggul ba atur ngiga orang meli kuasa elektrik ari tekat Bakun ti udah tembu gaga dalam taun 2011, ti udah ngampuhka kandang menua sepemesai pulau Singapura.
Sarawak Energy Berhad (SEB) madahka udah bisi orang deka meli kuasa elektrik 994 megawatt ati tekat Murum ke guna projek-projek ti deka datai ila.
SEB, ti udah meri mayuh kontrak, madahka sida merambu deka nyual kuasa elektrik sida ke semenanjung Malaysia enggau ke Brunei, pia mega ke Sabah enggau menua Kalimantan di Indonesia.
Tang sida agi kurang ba perengka penyambung, lalu perambu deka ngena kabel dalam tasik dikena nganjung kuasa elektrik ke semenanjung udah diketuka dalam taun 2010 suba.
Tekat Bakun ulih ngeluarka kuasa 2,400 megawatt, ngelui ari ti patut ke guna dalam menua Sarawak empu ba 1,000 megawatt aja. Projek nya kemari udah digela enggau nama “Tugu Makai Suap” ari raban Transparency International.
“Menua Sarawak enda begunaka 12 buah tekat. Tekat Bakun aja udah lebih ari numbas. Kami enda ngeluarka kuasa elektrik ngagai menua di semenanjung, Brunei tauka Kalimantan,” pia ku Baru Bian, siku pengari rakyat ari penyakal.
Nyadika empas ngagai projek ti diperambu Taib, Bakun udah lenyau sebengkah pangan dagang kunsi sida dalam bulan Tiga tu tadi udah bekau kompeni besai Rio Tinto Alcan ari menua Australia enda nyadi nirika kilang pengelela aluminum ti beungkus RM2 billion, ti endur sida lalu besalahka sida enda besabi penemu ba ngatur rega.
Kompeni SEB madahka 1,500 iku orang bansa asal Murum udah diagihka tanah endur sida ngentapka pendiau diri enggau bumai-betupi. Tang sida lalu bedau tembu berundingka penyampau pampas ti nengkeman ti patut dibayar ngaga orang bansa asal nya.
Bala orang Penan ti udah nirika empang jalai di Murum besedia sereta sanggup nganti dalam kampung ti diwan sida endur sida agi begigaka pengidup.
“Kami nadai kala bisi duit simpan dalam bank, lalu diatu kami udah lenyau batang sungai, kayu enggau pengidup,” ku siku tuai ari bansa Penan. ($ = 3.046 ringgit) (Repot tambah ari Stuart Grudgings; Repot diaduka Stuart Grudgings enggau Robert Birsel)