Nick Wright nya siku peranak menua Australia datai ari pelilih menua Tasmania ti diambi bekereja nyadi Sapit Presiden dalam kompeni Sarawak Energy Berhad (SEB) ti ngatur program tanggungpengawa sosial korporat (CSR) dalam kompeni nya. Iya diberi pengawa ngatur program pengentap pendiau ke bepuluh ribu iku orang bansa asal ti tanggul laban projek ngaga tekat ai ba 12 batang indu sungai di menua Sarawak. Enggau penanggul nya kami deka ninga penemu Nick Wright empu ti bekaul enggau raban bansa Penan ti udah nirika empang jalai nuju tapak projek tekat ai Murum bedau lama tu udah.

Sepengudah lima taun tekat ai nya digaga lalu diatu nyau tinggal beberapa bulan agi, raban bansa asal Murum lalu bedau dibai bejuraika runding bekaul enggau pengentap pendiau sida ti baru nya ila. Kuasa-kuasa sida nya endang dikelala ba ikas entarabansa lalu menua Australia enggau Malaysia endang nyadi kaban dalam gerempung entarabansa nya lalu diatu bisi lebih 60 buah raban NGO Malaysia enggau ari menua tasik udah nyain mayuh bengkah petisyen dikena mantah projek Murum nya.

Sekali ke Nick Wright deka ngambi kira pengawa ngempang jalai nya suba lalu udah nya ngirit bala pengari bansa Penan ngagai randau media nyadika sebengkah kelulu sida maya nyuaka pemeri mata duit lalu udah nya madahka penanggul nya udah ditembuka.

Ba raban bansa Penan ti lama bendar udah ditejuka ngidupka diri enggau pengurang ba pekara bantu belanja ari perintah, pemeri RM3.4 juta (ti nyadika ganti pengerugi ke pengerusak tanah pendam) tau ngumbai pemeri nya enda tau dikeenggaika.

Tang dini endur bala raban lawyer ti patut ngarika sida nerima pemeri nya, lalu nama agih pemeri ti bukai udah diatur ke raban sida ti rebak dudi. Enti sida diterangka enggau silik sereta lenak bekaul enggau baka ni sida deka melanja RM3.4 juta, pemeri ti nyampau nya endang enda numbas.

Lalu, sebarang penyampau duit ti diberika ngagai sida nya patut diperanakka nengah bala orang ti landik ba pekara belanja enggau penatai pemisi ke guna sida enggau rebak ti dudi ari sida. Diatu udah bisi didinga serebana baka ni pengujung RM3.4 juta nya udah tu ila!

Pengawa ti nginjau Nick Wright ari kompeni Hydro-Tasmania ti enggi perintah menua Tasmania, ti dikumbai “beguna bendar” nya laban dikena bejalaika projek SCORE ari runding Taib Mahmud enggau chakah agi, nitihka penerang ari SEB.

Nick Wright nya datai ari Opis Pengereja Pengawa perintah Tasmania ti betuaika Sapit Menteri Besai Tasmania, Bryan Green, siku tuai menua ti chakah bendar bejaku nyakal jaku bantah orang bekaul enggau pengawa ngulihka kayu batang di menua nya baka ti dikereja kompeni Ta Ann enggi Hamed Sepawi (iya nya siku petunggal Taib Mahmud). Kompeni Ta Ann Tasmania udah mujur nirika dua buah kilang kayu di Tasmania, sebuah ba sitak ngundi Bryan Green, lalu sebuah agi ba sitak ngundi Menteri Besai Tasmania empu, Paul Lennon!

Kompeni Hydro-Tasmania udah nguji nunjukka pengawa ti nyali raban pengereja pengawa ngagai kompeni SEB nya beguna bendar dikena ngemujurka projek SCORE, ti semina bempu tanggungpengawa sida meri bantu sanding penemu, dikena nentuka menua Sarawak ulih bejalaika projek ti deka diterima menua bukai ari segi atur CSR sida.
Enti baka nya gaya utai ti dikarapka, nama asil pengawa Nick Wright dikena sida ngemanahka agi atur pengawa sida?

Nick Wright belabuh bekereja enggau SEB dalam taun 2010 lalu dipaduka ngatur CSR dalam kompeni nya belabuh ari taun 2011. Tang nyau dua taun udah nya nyentuk ke Sarawak Report udah mujur mantaika salin perambu sida ti tiris, ti endang patut diayanka sida ngambika bisi diperesa mensia mayuh SEBEDAU pengawa ngaga tekat ai nya belabuh.

Ditu kami deka betanya, nama kebuah SEB nejuka kami mantaika perambu sida ti tiris nya lalu ngasuh kami bejalaika pengawa Nick Wright dikena nentuka kuasa raban bansa asal Sarawak nya dibasa, lalu nama kebuah nejuka kami nganti iya meri saut laban iya ti endang nyadika Tuai Pengawa Komunikasyen bekaul enggau pekara tu dalam kompeni SEB nya?

Utai ti terang bendar ti disungkit ari perambu ti tiris nya iya nya penyampau pampas ti diatur SEB enggau perintah BN Sarawak, nya dipeda nyadika ke penyati raban orang bansa asal ti kena tanggul ketegal projek nya.

Ba minggu-minggu ti dulu ari tu, bisi didinga jaku bantah ari bala raban NGO Malaysia bekaul enggau penyalah ngelanggar atur pengelantang mensia ti nanggul raban bansa asal di Murum, lalu kami sekali agi deka nanya Nick Wright, nama kebuah penanggul nya enda diputarka ari pun? Penanggul ti endang dikeenggaika bansa asal Murum iya nya kampung sida ditebang lalu rampa menua sida diampuhka ai tekat Murum, lalu penanggul nya enda diputarka enggau chara ti menuku.

Ba atur UN, penemu raban orang bansa asal enda tau enda dibasa. Kompeni SEB enggau perintah BN Sarawak enda tau enda bejuraika sebarang jaku bantah ari orang mayuh, nama kebuah tekat ai nya enda dipeguna lalu tekat nya endang ditemu deka ngerusak pengidup orang bansa asal enggau mai penanggul ke rampa menua

Tang, nadai agi kebuah ti manah tekat nya patut digaga, laban nya semina meri penguntung ke sida Taib Mahmud sebilik. Menua Sarawak diatu udah bisi kuasa elektrik lebih ari numbas lalu mega lebih ari ti ditinjau ke rebak ti dudi ari ila. Nick Wright diatu dipeda semina nurutka atur enggau peneka bala tuai iya ngambika SEB ulih diterima nyadi kaban bepenuduk tinggi dalam gerempung International Hydropower Association (IHA), ti merambu deka ngatur aum besai sida di Kuching, Sarawak dalam taun 2013 ila.

Nick Wright enggau kepala iya, Torstein Sjotveit, siku peranak menua Norway (ti begaji bejuta-juta ringgit setaun dalam kompeni SEB nya) patut mendingka kuasa raban bansa asal ti diberi pampas ti jauh mimit bebanding enggau rega projek tekat ai beungkus manggai beratus-juta ringgit nya.

Keterubah iya, raban bansa Penan patut diarika raban lawyer ti dibayar perintah menua Sarawak. Pengawa bejuraika penanggul entara orang politik enggau pengari raban bansa sida nya enda tau digembarka enggau sebarang bayar tauka pampas.

Kedua, pengawa ngaga tekat nya enda tau enda digantung dulu nyentuk ngagai pengawa besetuju dalam jurai nya tembu.

Ketiga, nentuka semua peranak raban bansa asal di pelilih menua nya diberi surat pengada enggau kad pengelala ti udah lama bendar enda dikibuhka perintah BN, lalu sida mega patut diberi kuasa direjista nyadi pengundi.

Pemingking Taib Mahmud ti udah enggai meri kuasa ngagai bala raban bansa asal ti udah dikeruga pendiau nya nunjukka pemalat penyai rejim perintah iya ngelaban kuasa pengelantang mensia.

Nick Wright enggau kompeni iya Hydro-Tasmania mega enda patut ngumbai diri udah mujur bejalaika tanggungpengawa sosial korporat nyentuk ke sida mujur ulih nitihka atur ti disebut kami ditu.