Ba ujung minggu tu tadi Menteri Besai Malaysia Najib Tun Razak madahka “betul” ke sebarang parti politik nerima pemeri bejuta-juta dollar ari sebarang orang lalu pemeri nya tau enda ibuh diterangka.
Dalam empat taun ke udah Kepala Menteri Sabah, Musa Aman, udah bebendar nguji bebula ke pasal kaul iya enggau duit nya tauka bebula sebarang kaul iya enggau siku orang ti benama Michael Chia.
Tang diatu, Najib Razak udah enda tau enda napi semua macham penerang ti nunjukka duit nya tau dikaitka enggau Musa Aman. Musa Aman mega enda tau enda minta ampun laban iya udah bebulaka kaul iya enggau Michael Chia, lalu iya mega patut minta ampun ngagai Sarawak Report laban udah dituduh iya mansutka surat-surat penerang ti bula lalu ngerembaika jaku-jaku petenah.
Betegalka semua macham bayar nya dibayar ngagai UMNO udah ngujungka pengerusak laban semua macham penerang ti ngumbai Michael Chia kala udah mayar ngena akaun iya ngemasukka duit belanja ngagai akaun bala anak Musa lebuh sida benung belajar di menua tasik.
Baka ni bala anak Musa Aman ti belajar di menua Australia dipelanja tauka bisi kaul enggau duit ti datai ari UMNO Sabah?
Diatu Pengerusi UMNO Sabah nya ukai semina ngena duit (RM40 juta) nya ke guna parti iya maya bepilihbesai di Sabah lebih ari tu tauka dikena iya empu, tang duit nya mega dikena iya melanja bala sida sebilik.
Diatu BN dipeda nguji deka ngumbai chara ti dikena ba menua-menua ti maju nya tau dikarapka tang enda dikibuhka BN, laban kitai mayuh tu tau arapka sereta pechayaka sida BN nya enda kala nerima duit suap ari sapa-sapa dikena sida bejalaika pengawa bepolitik!
Bala sida Lim menyadi bisi nerima mayuh lisin ari Yayasan Sabah betuaika Musa Aman (ti mega nyadi Kepala Menteri Sabah, enggau nyadi Pengerusi UMNO Sabah). Asil pansik kami, kami diatu udah nemu sereta ngelala kompeni-kompeni Maxland Sdn Bhd, Cergas Kenari Sdn Bhd nya betuaika kompeni Priceworth Industries Sdn Bhd ti endur Andrew Lim nya nyadika tuai sida. Lim mega nyadika tuai enggau mega pengatur pejalai mayuh kompeni bukai ba pengawa ngulihka kayu batang di Sabah.
Andrew Lim enggau menyadi iya Freddy Lim mega nyadika agen Wayco Enterprise Ltd ba pengawa ngulihka kayu batang ti bepalan di Hong Kong lalu kompeni Hillywell nya nyadika kompeni ti mayar bejuta-juta dollar masuk ke dalam akaun-akaun Michael Chia. Semua macham bayar nya udah direkod raban pemansik ICAC menua Hong Kong.
Enti duit pemeri bejuta-juta dollar nya dikumbai enda salah diberika ngagai UMNO Sabah, baka ti diterima ari bala kroni kayu batang, nama kebuah Menteri Besai Najib Razak deka nejuka Sarawak Report ngeluarka semua berita nya?
Musa Aman patut mansutka jaku pasal sapa bagi orang ti meri iya duit wang turu nya lalu iya patut berasai temegah laban UMNO udah mujur bulih penguntung bejuta-juta duit suap asil ti udah meri lisin dikena ngerusak teda rampa menua lalu UMNO patut berasai gaga ati lebuh sida ngarapka penatai duit ti deka dibai Michael Chia tama ke Sabah.
Kompeni-kompeni ti tau dikaitka enggau kroni ngulihka kayu batang ari menua Sarawak ti betuaika Ting Pek Kiing mega bisi ampit nerima lisin ari Yayasan Sabah dikena sida ngulihka kayu batang di Sabah. Beserimbai enggau nya mega kompeni-kompeni bukai ti tau dikaitka enggau kroni-kroni ti udah mentas bendar meri pemeri ngagai akaun Michael Chia ti nyadika penatai duit RM40 juta ngambika bisi dibai tama ngagai Musa Aman dalam taun 2008 suba.
Simon Ling Ding Dieng nya petunggal Ting Pek Kiing mega nyadika pangan dagang kunsi iya ti sama bela nerima lisin-lisin ngulihka kayu batang, lalu pia mega siku agi kroni kayu batang ti benama Ngui Ing Chuan.
Enda ngalitka ati enti Ngui Ing Chuan enggau anak Ting Pek Kiing ti benama Peter Ting Sie Huong nya nyadika pemegai share pemadu mayuh dalam kompeni Borion ti udah mega meri pemeri ngagai akaun Michael Chia, ti udah nya dikeluarka iya lalu nyadika duit diberi ngagai Pengerusi UMNO Sabah, Musa Aman!
Edmond tauka Admond Looh Boon Chai nya Kepala Pengarah Eksekutif dalam kompeni Java Industries nyentuk ngagai taun 2010 lalu nyadika siku ari orang dagang ti bulih lisin nebang kayu batang ari Yayasan Sabah nengah mayuh kompeni iya.
Looh nya nyadika orang ti ngemataka mayuh kompeni iya empu ti meri mayuh pemeri ke dalam jarin kompeni-kompeni ti dikemataka Michael Chia ti ngarika Musa Aman (baka ti udah diaku iya). Raban pemansik penyalah makai suap ari opis SPRM diatu bisi ngembuan penerang-penerang ti mayuh pasal bayar ti diatur ari kompeni-kompeni Looh, tambah mega Looh endang suah nerima lisin kayu batang ari Musa Aman.
Ke bendar iya mayuh duit udah dipindahka ari kompeni-kompeni enggi Looh ngagai akaun-akaun Michael Chia dalam pengelama beberapa taun lalu semua penerang tu mega bisi disimpan raban SPRM!
Baka tu munyi saut ti nyelai ari Menteri Besai ba ujung minggu tu tadi:
“Tiap-tiap parti politik bisi kuasa diri empu nerima sebarang pemeri,” ko iya nambah pasal pemeri ti dikereja enggau chara ti betul.
Menteri Besai Najib mengkang enggai madahka enggau silik ari ni penatai duit nya lalu iya mega didinga madahka raban parti penyakal mega bisi nerima pemeri ari luar tang sida (parti penyakal nya) mega nadai nerangka penatai pemeri nya.” [New Straits Times]
Semua jaku ambu tauka jaku aku ke munyi nya patut diuji dalam court.