“Langkar Pengawa Pengentap Pendiau” ke raban bansa Penan ti deka tanggul laban Tekat Murum patut disadung SEBEDAU pengawa ngaga tekat nya belabuh dikereja.
Sebedau nya mega pengawa jurai penemu endang nadai diatur, nadai jaku gerah, nadai jamin ari perintah, enggau penerang tauka sebarang pekara bekaul enggau penanggul ti nuntung raban bansa Penan baka ti dikeruga Taib Mahmud.

Tekat Bakun ti baru tembu nya meri reti nya menua Sarawak ngeluarka kuasa elektrik ti kelalu lebih ari ti patut dikena semua rayat, lalu kuasa elektrik ti lebih nya bedau temu dini endur deka dikena.
Ba laman web perintah Sarawak, sida madahka repot pasal pengentap pendiau nya ulih dibacha. Tang repot tiris ti diterima kami udah terang bendar ngayanka baka ni Taib Mahmud melakangka pengelantang pendiau enggau pengidup raban bansa Penan. Diatu kami ulih mansutka enggau silik sereta lenak agi langkar pengawa pengentap pendiau nya belalauka repot tiris nya. Pekara ti ngeruga runding kami iya nya, ba bagi ti betanda “Project Alternatives (pilih projek)” ke bendar iya nadai pilih bukai ke projek ngaga tekat ai nya lebuh maya repot nya ditulis!

Terang bendar Taib Mahmud ngelalaika penerang bekaul enggau projek tu laban iya takut nerima bantah ari orang di serata dunya ketegal ti ngeruga sereta nanggul pengidup raban bansa Penan ti endang dikelala orang enggau nama raban bansa ti tebilang di pelilih menua-menua Asia.
Raban bansa Penan diatu udah nadai agi kampung endur sida beridup laban udah balat dikeruga sereta diambi Taib Mahmud.

Enggau pengelenyau tanah nya, baka ti dituliska dalam repot, raban bansa Penan nya lalu nadai bulih sebarang utai taja pan sida udah bebendar ngenanka utai ti patut enggi sida.
Pengawa ngulihka kayu batang ti seruran dikelaungka ngena rambai jaku “Pemansang” ari runding Taib Mahmud, ti besemaya deka ngangkatka pemanah pengidup raban bansa nya, tang diatu sida nya udah lenyau kampung, lalu diatu mega sida nadai agi endur begigaka pengidup!

“Langkar Pengawa Pengentap Pendiau” nya bisi ngayanka pemerinsa dalam pendiau raban bansa Penan betambah jai agi udah Taib Mahmud tembu betebangka kayu batang ba kandang menua ti endur sida nya beridup.
Repot nya bisi ngayanka baka ni raban bansa Penan diatu beridup ba belanja RM154 sebulan ke tiap ruang bilik, lalu bisi mega sida bulih semina RM54 sebulan, “jauh mimit ari ikas penyeranta RM830 sebulan”.
Penatai pemisi nya nyengkaum bayar sechara pukul rata RM54 ke sebuah ruang bilik sebulan ti diterima sida ari kompeni-kompeni kayu batang ti udah ngeruga kampung endur sida beridup. Nitihka penerang dalam repot nya, raban bansa Penan tusah bendar deka bulih pengawa dalam kompeni-kompeni ti ngereja kandang menua sida nya.

Enggau leka jaku ti kelalu tinggi, repot nya madahka “bantu ari perintah” endang beguna bendar nyadikia penatai pemisi bansa Penan nya, tang udah nya repot nya mega ngaku “bantu ti diterima sida enda seruran bisi”!

Penerang ke pengawa melakangka raban bansa Penan nya ulih dibacha kitai ba lambar 167 repot nya, ti madahka baka ni Taib Mahmud diatu benung bejalaika polisi ngeluska raban bansa Penan.
Nitihka repot nya, enti kampung udah lenyau, tusah bendar bansa Penan begigaka pengidup ngena chara lama sida. Ari ti nadai dikelala, orang Penan tau dikumbai nadai kala nguan menua tu! Repot nya mega ngayanka penerang bestatistik ti bendar pasal penyampau tubuh sida ti bisi ngembuan kad pengelala. Enggau nya, tusah bendar sida deka begigaka pengawa dikena sida nyerumba pemansang ekonomi ti besai agi rapi.
Repot dalam langkar pengawa pengentap pendiau nya bisi ngundan jaku-jaku semaya. Bisi semaya deka ngagihka tanah baru (14 hektar tanah umai ke sebuah ruang bilik), rumah baru, sekula, perengka perubat enggau pengerai, perengka pengangkut enggau bekal ai enggau elektrik.

Baka ti disaksika bala orang di palan pengentap pendiau Sungai Asap ketegal pindah ari Bakun, semua jaku semaya nya nadai dikamatka siti! Klinik pengerai sida di Belaga lalu enda diisika lutur dikena mantu 10,000 iku bala orang ba palan pengentap pendiau nya.
Semua jaku semaya ti dipasukka dalam langkar nya endang nadai rega. Tanah ti diagihka ngagai raban bansa Penan nya ba palan pengentap pendiau nya udah diberi Taib Mahmud ngagai kompeni-kompeni kroni kebun dandang besai iya!

Bala orang Malaysia patut nyukung raban bansa Penan ti sama menua enggau sida ba pengawa sida angkat ngelaban projek ngaga tekat ai, raban polis enggau siku Kepala Menteri ti deka ngemunaska bansa Penan ti mimit tubuh nya ari dunya tu.

Langkar Pengentap Pendiau Murum nya tau diambi ari laman jaku English ti asal artikel tu. Bala pemacha mega tau macha memorandum penuh ari raban bansa Penan. Pemacha mega dipinta meri bantu belanja nitihka pemisi tauka pengulih diri dikena nyukung pengawa “Penan Support Fund”.