Sahari tu Opis Lawyer Bansa ke menua Switzerland udah madahka diri udah belabuh muka sebengkah tuduh penyalah dikena ngelaban seraban bank UBS menua nya laban dituduh mantu penyalah ngelesapka duit ngarika Kepala Menteri Sabah Musa Aman ti patut tau ngenusahka ati raban raja menua UK! Dalam bulan Lima nyin kemari Sarawak Report udah nusui baka ni Kepala Menteri Sabah nya bisi bekaul enggau skandal makai suap ari lisin ngulihka kayu batang ari kampung puang menua nya empu.
Lalu kami mega udah ngayanka mayuh penerang ti silik bekaul enggau penyalah Musa Aman enggau bala orang ti bisi bekaul enggau iya. Kami mega bisi ngayan keretas pansik ari Opis Penagang Penyalah Makai Suap Malaysia (MACC) enggau Opis Bekuasa ari Hong Kong, lalu salin-salin keretas pansik nya udah dikirumka kami ke menua Switzerland ti endur gerempung Bruno Manser Fund bisi mega minta ari kami, dikena sida nawa UBS.
Tang taja pan mayuh penerang bekaul enggau penanggul tu, raban pemesai di astana UK mengkang enda ibuhka jaku lalau kami ti nagang penemuai uchu raja England ke menua Sabah.
Penemuai nya disadang deka diatur ari 11 – 19 haribulan Sembilan tu ila dalam atur penemuai sida ngagai menua-menua komanwel nyerumba pengerami jubli 60 taun Queen menua England ke udah nyadi tuai menua di UK nya. Uchu iya mega diatur nemuai ke Singapura enggau pulau-pulau Solomon.
Menua Sabah nya sebengkah menua ti manah rampa ketegal ke agi bisi rampa kampung. Dalam beberapa jam tu suratberita di menua Britain udah ngayanka gambar uchu raja England melaki-bini nya bisi pengerindu ke anak mayas. Atur penemuai nya dikena muji pemanah pengawa Musa Aman ngintu pemanah rampa menua Sabah. Sarawak Report suah bendar udah meri penerang pasal pengerusak rampa menua Sabah, tang kandang Rizab Emperan Danum di Sabah nya dikelingi rampa menua ti udah udu rusak ketegal pengawa muka kebun dandang besai sawit.
Sarawak Report udah meri jaku lalau pasal pengerusak rampa menua ti dikereja Musa Aman diatu udah bisi dalam domain awam ti ngayanka pengerusak di Sabah nya dikereja kenyau ari taun 1990 dikereja iya ketegal ti ngeluarka lisin ngulihka kayu batang lalu nyentuk ke iya nyadi Kepala Menteri udah nya.
Bisi lebih US$90 juta dollar duit awam udah dilesapka Musa nengah akaun bank bala bakih iya baka Michael Chia enggau lawyer iya, Richard Christopher Barnes.
Tu meh siti ketegal Sarawak Report ti meri jaku lalau ke opis astana England nemuai ke Sabah laban ti diatur meri peransang ke Musa Aman, laban iya endang ditemu udah mai pengerusak ke rampa menua taja pan rampa menua iya nya, keno ko iya, endang kena jaga enggau manah.
Taja pan kami udah ngeluarka jaku lalau pasal opis lawyer bansa di Swiss ti deka nawa UBS bekaul enggau penyalah Musa Aman, tang opis astana Britain mengkang enda ngubah atur penemuai uchu raja England nya!
Tu udah nyadika sida raja England sebilik nya dipeda baka ti enda tetap enggau runding sida. Bala uchu raja England nya deka diatur bemalam ba sebengkah palan ngelantangka ati di Emperan Danum (sebengkah projek dipelanja kompeni kebun sawit pemadu besai di dunya tu, Sime Darby) taja pan ngelingi emperan nya udah tebunsa ketegal pengawa bekebun dandang besai sawit ti dikereja tuai bilik ti endur sida nemuai nya. Penemuai bala uchu raja England nya mega nyerumba pengawa bepilihbesai menua Malaysia ti deka diatur sebarang maya ari diatu. Baka ni pematut perintah raja England tau ngemendarka sebengkah perintah bekukut besi ti sebaka pengasar dalam atur perintah-perintah bukai di dunya tu?
Udah lepas 50 taun, sapa agi ngumbai perintah BN enda kala nipu tauka enda kala ngereja penyalah makai suap dalam pengawa bepilihbesai? Diatu mayuh bendar penerang ti ngayanka duit awam mayuh bendar udah dilesapka ari menua Malaysia lalu disimpan dalam bank di menua tasik baka ti dikereja Musa Aman.
Lalu mayuh agi ari duit nya endang dicuri ari ti ngeruga reta pesaka orang bansa asal ti merinsa di menua Sabah enggau Sarawak, lalu sida tu ditejuka idup dalam pemerinsa enggau penyuntuk.
Lebuh menua Malaysia nyau tedani udah ninga penerang ari raban penyakal bekaul enggau penyalah bala tuai-tuai sida, nama kebuah menua Britain agi mengkang majak ke atur penemuai uchu raja England ti dipeda deka ngamahka nama enggau pangkat raja diri melaki bini ti agi biak bendar nya?
Diatu rayat di Malaysia enggau Sabah udah ngansak Musa Aman nyurutka diri ari pengawa iya. Baka ni iya deka beterima kasih ke penemuai raban raja England sebilik nya ti dipeda nyadika empelas mua iya ti udah malu ari pengawa kamah iya, lalu mega tau meri malu ke raban raja England ti udah dikemulaka iya ti madahka menua Sabah ti dipegai iya nya manah atur ba rampa menua.