Berita bekaul enggau kompeni kuasa hidro ari menua Australia, Hydro-Tasmania udah ditaburka nengah berita radio ABC menua Australia, ti bekaul enggau kaul sida enggau perambu Taib Mahmud ke deka ngampuhka mayuh agi batang sungai enggau chara ngaga dua belas buah tekat ai ti enda dipeguna.
Roy Adair, Kepala Pegawai Eksekutif Hydro-Tasmania udah meri saut iya ngagai pengirau ati orang mayuh sepengudah jaku penerang iya dikeluarka nengah TV Dateline menua Australia kena hari Tiga tu tadi. Ba pun program TV nya, Adair meri penerang madahka kompeni sida semina nyadika penyanding penemu bekaul enggau perambu gila Taib nya.
“Kepala Projek” sida, Andrew Pattle ti dipaduka sida ngemataka projek Tekat Murum lalu pia mega merambuka Tekat Belaga enggau Tekat Baram. Kompeni Hydro-Tasmania, munyi ko Adair, semina nyadi penyanding penemu aja.
Tang, lebuh bejaku ngarika Perintah Sarawak, dia Senator Idris Buang bisi dindinga mansutka jaku baka ke enda arapka penatai kompeni Hydro-Tasmania di menua Sarawak.
Kedua iya, Roy Adair bisi mansutka sebengkah jaku ti endur iya ngaku batang pengawa ti dikereja Hydro-Tasmania nya mansik perambu Sarawak Energy Berhad (SEB), ti betuaika petunggal Taib, iya nya Hamed Sepawi, sebedau sida belabuh mantu Sarawak ngaga tekat ai ti tekelalu besai nya.
Lebuh ke meri penerang dalam radio ABC di Australia, Adair madahka Hydro-Tasmania udah meresa SEB lalu nemu kompeni nya udah nyadi kaban Gerempung Kuasa Hidro Entarabansa (IHA) ti udah nitihka atur bekaul enggau pengawa pemansang ti enda putus-putus.
Lebuh iya ditanya nama pengawa ti dikereja sida bekaul enggau meresa projek nya, Adair madahka sida endang dipaduka meresa projek nya ari pun.

Ari jaku penerang ti munyi nya, Adair madahka, ke terubah iya, pemasuk SEB ti nyadi kaban IHA nya semina dikena ‘ngaminka’ aja dalam pengawa sida ti bedagang enggau pangan diri. Kedua iya, SEB endang udah nyadi kaban IHA lebuh maya Hydro-Tasmania bejalaika pansik pra-bida sida ba kompeni nya.
Enda ulih diterima akal!
Baka ni bala peninga radio ABC Australia ulih tepantup ati ninga saut Roy Adair nya? Nama utai ti tau ngasuh bala orang deka muatturun form ari laman IHA dikena nyadi kaban sida? Ditu kami udah ulih ngamatka SEB udah nyadi kaban IHA enggau bayar ti pemadu mimit iya nya semina seribu pounds, amat meh sida sanggup nitihka atur IHA!

Mayuh gerempung NGO baka raban Save Rivers di menua Sarawak suah bendar mansutka jaku pengirau ati sida ba atur ti dititihka IHA ba pekara bekaul enggau pengawa pemansang ti enda putus-putus, lalu sida madahka juluk ati majakka projek nya endang deka ngulihka penguntung ke seraban-dua orang aja.
Gerempung NGO nya udah mansutka jaku sebana sida ti madahka pekara pengelantang mensia enggau pemanah rampa menua nadai diperatika.
Bala orang bansa asal ari Bakun enggau Batang Ai di menua Sarawak, ti udah dipajakka pindah ninggalka menua lama sida, udah dikemulaka enggau semaya-semaya kusung ti deka meri sida pengelantang idup, tau nusui semua pekara pasal pemuntan projek-projek tekat ai dua buah nya ti udah nanggul sida.
SEB udah mayar fee sida ti nyadi kaban dalam IHA enggau pemayuh £3,000, lalu ari nya sida iya ulih nyadi kaban Korporat Lumur 1 dalam IHA. Nama agi penerang ti bukai ti ulih ngasuh kitai pechaya agi ke penerang sida nya?
Sarawak semina ditemu masuk nyadi kaban IHA dalam taun 2010, tang Sarawak udah ngaku diri deka ngatur aum besai bekaul enggau pengeluar kuasa hidro!

Tang Roy Adair udah ngenyarutka penemu orang mayuh bekaul enggau SEB ti nyadi kaban dalam IHA SEBEDAU sida belabuh ngereja projek di menua Sarawak. Tang ke bendar kompeni Entura, iya nya anak kompeni Hydro-Tasmania udah bekaul dalam projek-projek tekat ai di Sarawak dalam taun 2008, taja pan SEB masuk nyadi kaban dalam IHA dalam taun 2010!

Pekara ti nyelai ba kitai diatu, dalam timpuh setaun aja, kenyau ari 2011, kepala SEB bebansa Norway, Torstein Dale Sjotviet (ti dibayar gaji $4 juta setaun) udah nyadi siku ari pengarah dalam SEB, lalu pia mega Roy Adair ti nyadi raban pengarah dalam Hydro-Tasmania!
Lalu enda lama agi, dalam taun 2013 tu ila, aum besai ti bekaul enggau pengawa pemansang ti enda putus-putus deka diatur di Kuching! Nitihka penerang ari suratberita Borneo Post, semua pengawa nyediaka perengka endang benung dikereja enggai dibantu ‘pengelandik’ kompeni Hydro-Tasmania.
David Crean nya menyadi menteri Simon Crean ti suah didinga bejaku dalam parlimen Tasmania nyukung pengawa ngulihka kayu batang di menua nya, taja pan nyengkaum kayu dalam kampung galau ti dikereja kompeni Ta Ann enggi petunggal Taib, Hamed Sepawi. Hamed Sepawi mega nyadi pengerusi dalam SEB. Enggau nya, nama agi penerang bukai ti tau disadang kitai ba kaul sida tu?

Sekeda jaku tanya ti enda mujur disaut Roy Adair

– Baka ni gaya pengawa audit ti udah dikereja sida atas SEB, Perintah Sarawak enggau 12 buah projek tekat ai ti bisi kaul enggau Hydro-Tasmania?
– Nama kebuah sida enggai meri penerang ti silik bekaul enggau pansik ba pangka ngagai rampa menua enggau kaul entara mensia ari projek tekat-tekat ai tu (nya pan enti pansik bisi dikereja sida)?
– Kepala Projek sida, Andrew Pattle, udah kala mansutka penerang ti madahka standard pengelikun ba pangka ngagai kaul mensia enggau rampa menua di Malaysia jauh baruh agi bebanding enggau di menua Tasmania. Nama kebuah sida mansutka penerang munyi nya taja pan sida suah begendangka jaku ti madahka sida nitihka atur ti terit bendar ba ikas entarabansa lebuh sida bejalaika pengawa dalam sebarang projek ngaga tekat ai?
– Patut tauka enda sida ngampuhka beratus-ratus batu pesegi rampa menua di Borneo ti deka nganggul lalu mejal bepuluh-ribu iku orang bansa asal ninggalka menua lama sida taja nadai nyengala ba peminta ke kuasa elektrik hidro lalu mega nadai nyengala pengawa dagang ti deka pansut ari projek baka nya?
– Nama kebuah kompeni Hydro-Tasmania keran bendar deka nitihka penemu siku pemerintah kukut besi ti kaya raya, ti benung dipansik raban Pemansik Penyalah Makai Suap (SPRM) di menua iya empu?
Ke penudi iya, kami bisi dua iti jaku tanya ke patut ditujuka kami ngagai Roy Adair. Nadai utai bukai ke patut dikereja iya kelimpah ari ti ngulihka penguntung duit ringgit ke iya empu, lalu sekali ke kami beli baka ti disangka iya nya?