Bala bakih iya ba Radio Free Sarawak lalu bedau nerima sebarang penerang pasal pengelenyau DJ radio sida, Peter John Jaban, ti udah lenyau pia aja, sereta iya sangkai di padang bilun Miri.
Iya udah mukul telefon ari padang bilun Kota Kinabalu, Sabah, ti endur iya madahka diri udah ditanka bala pemesai ti bekuasa sebedau iya diasuh ngena penerebai bilun pulai ke Miri pagi tu. Udah nya iya bisi madahka diri kena iring orang ngagai bilun ti deka ditepan iya lalu iya mega nangkan bala bakih ti ngambat penatai iya di Miri nyadang diri deka kena tangkap bala pemesai Cawangan Khas sereta iya sangkai di Miri.
Telefon iya enda diidupka iya agi. Tang sereta iya sangkai di Miri enggau selamat, iya lalu diambat lawyer Alan Ling enggau Tuai PKR Pampang Miri, Dr Michael Teo, ti sama ngambat penatai iya laban deka nentuka iya enda ditanka sebarang orang sepeneka ati orang.
Ke pengujung iya enda ditanka orang ti bekuasa di padang bilun Miri lalu Peter ninggalka endur nya nepan sebuah kerita sama enggau Dr Teo nuju ngagai bandaraya Miri.
Di rantu jalai nya mih penyaru bisi nyadi, lebuh sebuah agi kerita ngenanka kerita ti ditepan Peter, ti endur Peter lalu diasuh 3 iku lelaki ti enda dikelala nitihka sida. Peter lalu nepan ngagai kerita sida tiga iku lelaki nya, ninggalka sekeda ari pemai iya tang iya agi sempat ngema beg gari iya empu.
Dr Teo tekenyit amat maya nya. Ba pun penanggul tu, iya madahka diri irau bendar ke Peter, nyadang Peter kena tanka, tang opis polis di Miri madahka sida nadai nemu pasal Peter.
Diatu bala bakih iya nyadang Peter engka ngelala bala orang ti nabanka iya ngena kerita sida. Engka laban iya takutka diri kena tangkap, iya disadang ngubah runding diri enggau jampat lalu nepan ba kerita sida tiga lelaki nya taja pan iya enda ngelala sida tiga nya.

Enti kes iya baka nya, tu ukai ke terubah endur Peter nyeliahka diri ari bala polis sekumbang iya ti bekereja ba projek pro-demokrasi, ti ditaburka sengelama dua jam sehari nengah gelumbang radio SW15420 kHz nya. Bisi sekali dulu ari tu Peter kala ditanka raban polis udah sida meresa dokumen penerang iya di sebuah genturung pendiau orang di menua pesisir di Sarawak.
Tang, nitihka penerang ari Peter, iya udah diselamatka bala orang mayuh ti begelumu ngelingi iya, ngujungka iya mujur ngerarika diri nepan sebuah motosikal ti dikena orang nabanka iya ari endur nya.
Peter seruran madahka diri irau ati ke emba bala orang ti deka mansik iya, ke lebih takutka bala samseng ti bekereja enggau enda beradat ari asuh tuai-tuai perintah di menua Sarawak.
Bala pengarang berita ti diasuh ngagai padang bilun Miri ngambika ulih ngaga repot pasal penatai iya nya endang madahka Peter dipeda takut bendar. Siku ari bala pengarang berita ti sempat berandau berampas enggau Peter bisi madah ngagai Radio Free Sarawak nya Peter endang nyadang diri deka kena tangkap bala orang ti bekuasa di Kota Kinabalu.

Peter endang nemu diri deka kena tangkap orang sebarang maya. Nama iya udah dipasukka dalam rintai nama opis Imigresyen lalu iya nyadika orang ti pemadu digiga raban polis. Kami tekenyit bendar ninga pemutus ati iya ti ngena bilun entara menua, ti endur iya enda tau enda ngayanka penerang diri empu ba ninting endur iya sangkai.
Tang laban iya bisi udah berasai enda dapat lalu minta diri belelak ari stesyen radio nya lalu engka deka mulaika diri ke menua Sarawak ngintu Gawai Dayak begulai enggau bala kaban belayan iya. Tiket bilun ti dikena iya pulai endang diberi ke iya nyadika buah jari ari Radio Free Sarawak dikena sida ngenang pemanah pengawa iya, tang pemutus iya nengah jalai ti dipilih iya nya enda tentu betul. Bala bakih iya ngumbai iya pulai ke menua nengah jalai bukai.
Radio Free Sarawak udah nerima mayuh jaku emba laban dikumbai nyadi pengachau enggau penanggul ke bala orang politik BN di menua Sarawak, ti endang teleba ngemataka pejalai kompeni media. Stesyen Radio Free Sarawak udah enggau chara terang mantah sereta ngutuk penyalah makai suap, lalu nyadika siti ari radio ti mit-mit ti enchabar rejim perintah Taib Mahmud sekumbang iya ti megai perintah 30 taun ti udah tu. Radio Free Sarawak diatu udah ditemu mujur meri penerang ngagai mensia mayuh di menua pesisir pasal sekedar isu ti bekaul enggau raban bansa sida baka pasal tanah pesaka sida ti kena keruga. Radio Free Sarawak mega nerima jaku puji ari raban bansa asal di Sarawak laban udah mantu sida ngelala sereta belabuh angkat ngelaban tindak perintah BN ti majak berampaska tanah pesaka sida.
Radio Free Sarawak udah nyadika stesen radio endur bala penyakal ti seruran ninga jaku perintah ari media ti diberi perintah lisin, lalu semua media belisin nya dikemataka sida Taib Mahmud sebilik.
Ketegal nya, projek pro-demokrasi ti ditaburka nengah Radio Free Sarawak udah suah bendar diserang BN, lalu BN madahka Radio Free Sarawak nya sebengkah radio ti endang ngereja penyalah ti berat lalu patut diukum enggau naka pemerat.
Ari ketegal nya dia bala orang ti bekereja nyadi pemacha berita dalam Radio Free Sarawak seruran nerima jaku emba ari raban BN ti megai kuasa di menua Sarawak. Sehari tu tadi, pemacha berita RFS, iya nya Christina Suntai bisi bejaku, “utai ti dipinta kami iya nya Peter agi selamat. Lalu kami arapka iya ulih pulai ngagai kami lalu bekereja begulai enggau kami baru ba Radio Free Sarawak”.