Diatu bala polis udah madahka sida belabuh deka ngiga Peter John Jaban, siku pemacha berita Radio Free Sarawak, udah iya ti dipadahka lenyau enda temu penunga. Tang diatu mega bala bakih iya nyau semakin saru runding engka Peter benung ngelalaika diri udah iya ti berasai takut udah kena peresa raban orang ti bekuasa ba padang bilun di Kota Kinabalu, Sabah. Sehari tu stesyen radio pro-demokrasi nya udah belabuh mansutka penerang dikena sida nusui pasal pengerembai berita pengelenyau Peter nya:
PETER JOHN JABAN
“Datai ke maya tu Radio Free Sarawak madahka bala peninga sida lalu bedau nerima sebarang penerang ari Peter John Jaban empu tauka ari orang bukai.
Tang bisi bala orang madahka sida bisi tepeda ke Peter di Miri dalam sehari dua tu lalu iya mega dipeda bejalai-jalai di nengeri nya enggau nadai utai nanggul.
Penerang ti bansa tu ulih meransang kami lalu kami ulih ngaga simpul penemu ti ngumbai Peter endang deka ngelalaika diri empu udah iya ti takut sereta kesal ati udah kena tanya ba padang bilun Kota Kinabalu, Sabah, lalu udah nya iya mega nyadang diri deka kena pansik raban ari Cawangan Khas maya iya sangkai di Sarawak.
Bala polis di Miri udah madahka sida nadai udah nerima atur ti ngasuh ngenanka iya. Tang diatu sida iya deka ngiga iya, laban sida iya belabuh irau ke pengelenyau iya ari kerita ti udah mai iya pansut ari padang bilun Miri nya kemari.
Kami irau bendar ati ke Peter, iya ti udah ditemu bisi penanggul ba pengerai lalu diatu benung takut bendar ketegal kaul iya enggau Radio Free Sarawak.
Tang diatu kami enda irau ke pengelikun iya agi, tauka irau ke iya kena tangkap.
Bala kami deka meri penerang pasal penunga iya lalu kami meri terima kasih laban mayuh orang udah ngayanka pengirau ati sida ngagai Peter, siku orang ti udah mutus ati nyambut chabar bekereja ba Radio Free Sarawak”.
Bala bakih Peter ba Radio Free Sarawak arapka DJ sida nya tau madahka penunga diri empu lalu ulih jampat pulai ngagai sida lalu neruska pengawa iya ba program radio nya. Iya udah ngambi permisi ti lama, laban iya madahka diri deka nyambut Gawai di Sarawak begulai enggau kaban belayan iya.