DJ Peter John Jaban diatu udah bisi berandau enggau bala bakih ti sama bekereja enggau iya dalam Radio Free Sarawak lalu iya ngaku diri benung belalai, laban takutka diri kena penyati bala polis.
“Aku tau nganjung diri ngagai opis polis sama-sama enggau lawyer aku, tang enggau syarat bala polis enda ngereja pengasar atas aku”, ku iya bejaku seraya ke meri chunto sekeda pengasar ti kala dikereja polis ba sebarang orang ti ditemu mantah perintah.
Tang diatu Peter nerangka iya berasai selamat agi ngelalaika diri lalu meri terima kasih ngagai semua orang ti udah mantu iya sereta ngayanka pengirau ati sida ke pengelikun iya sekumbang dua tiga hari tu udah.
Iya madahka diri udah betindak enggau jampat lebuh 3 iku lelaki ti endang dikelala iya lalu ngenanka kerita ti ditepan iya, sereta iya dibai ninggalka padang bilun Miri.
Taja pan iya berasai irau, Peter bisi ngenang raban Cawangan Khas enggau Imigresyen Sabah udah nanya iya lebuh iya deka bekejang ari Kota Kinabalu, nya bala orang ti ‘manah-manah’ tang sida udah nejuka iya mupuk pulai ke Sarawak lalu iya belaba ke sida tentu arapka iya deka ditanka baru di Sarawak.
Peter bisi ngenang sekeda kebuah iya ngumbai orang ari Cawangan Khas deka berandau enggau iya lalu nama kebuah paspot enggau kad pengelala iya direjista dalam rintai nama orang ti deka diperesa ba semua garis entara menua.
Nitihka Peter, udah iya ti badu nyadi pemesai ba opis Tanah Enggau Penyukat iya endang nemu diri udah ngelanggar atur opis iya ari ti niriska resia opis iya. Tang iya mega madahka pengawa iya nya endang dikena iya mantaika penyalah makai suap ti benung dikereja sekeda orang dalam opis nya.
Iya mega madahka diri berasai takut laban ditekanka ‘ngasut’ udah bekau mayuh repot digaga raban penyukung BN ngelaban Radio Free Sarawak lalu pia mega tuduh enggau serang ari bala orang politik BN nengah media.
Ke penudi iya, iya madahka diri suah udah mindah-mindah di serata Sarawak dikena iya nyeliahka diri kena peresa raban penerit undang-undang.
Peter madahka penusah diri empu sekumbang ti diau ti menua orang, taja pan iya nemu diri udah ngemedis ati raban orang ti megai perintah. Iya udah ngena semua peluang begulai enggau bala bakih sereta enggau sida sebilik, tang iya seruran irauka diri kena tangkap sebarang maya. Diatu iya benung belalai ari raban polis lalu nadai beniat deka mindah kin kitu, tang iya mega deka minta penemu ari bala lawyer enggau bala bakih iya sebedau iya ulih mindah.
Program ari Radio Free Sarawak majak dikeluarka ninting hari ari pukul 6 lemai ngagai 8 malam dalam jaku Iban enggau Melayu ngena gelumbang angin SW15420kHz.