“Kami arapka penusah tu dikereja bala polis lalu ukai dikereja bala orang ti taluk ke Taib”, ku jaku siku ari bakih Peter sehari tu. Komen ti munyi nya nyadika simpul penemu bala orang ba penakut sida ke atur perintah di Sarawak.
Nadai siku orang nemu penunga Peter John Jaban, ti mega dikelala enggau bali nama Papa Orang Utan ba bala peninga Radio Free Sarawak.
Iya udah ditarit 3 iku lelaki ti enda dikelala ari kerita ti ditepan iya dalam pejalai iya ari padang bilun Miri nuju nengeri Miri urung pukul 11 pagi tu tadi udah kerita ti ditepan iya ditanka. Iya mupuk enggau enda bejaku seleka lalu dipelabaka orang ti nanka iya nya bala pemesai ti bekuasa.
Tang nadai siku orang nemu penunga iya udah nya. Opis polis di Miri mega madahka sida nadai nemu penunga Peter.
Enti sapa-sapa ngumbai bala bakih iya dalam radio FreeSarawak enggau kaban belayan iya enda irau ke pengelenyau iya, nya udah enda betul. Enti iya ditanka opis ti bekuasa kitai irau agi laban nangi ke iya dipenyati. Tang enti iya tanka enggau ukai ari atur ti patut, kitai tau irau agi.
Peter udah ditangkap. Nadai leka jaku bukai dikena nerangka bansa tangkap ti dikereja ba sebengkah menua ti seruran ngumbai diri bejalaika atur perintah ti pemadu manah.
DJ radio nya udah ngambi peremisi ba minggu-minggu ti dulu ari tu lalu pulai ke Malaysia enggau chara nyarung diri ngambika enda ditemu orang ti bekuasa ti udah besemaya deka nangkap iya, ti endang lama udah pedis ati ke jaku bantah iya nengah radio nya.
Iya udah beniat deka nyambut Gawai begulai enggau sida sebilik. Tang pagi tu tadi iya udah ditangkap ba padang bilun Kota Kinabalu dalam pejalai iya ngena bilun Air Asia ke Miri. Iya udah ngirumka pesan jaku pandak ti madahka diri kena peresa pemesai-pemesai dia lalu gambar iya diambi, surat-surat penerang iya disalin, sebedau iya diasuh tama baru ngagai bilun ti ditepan iya.
Pesan jaku pandak ti munyi nya udah chukup ngasuh bala kaban enggau bakih iya jampat-jampat ngambat penatai iya ba padang bilun Miri 40 minit udah nya. Pengerusi Cawangan ke PKR di Miri, Dr. Michael Teo bisi datai enggau siku lawyer, Alan Ling, ngagai padang bilun Miri laban deka ngambat penatai Peter.
Bisi ba endur nya maya nya sekeda bala pengarang berita laban deka ngaga repot pasal penatai Peter. Dr Teo ti bisi bejaku ngagai Radio Free Sarawak, madahka bala polis mayuh bendar ba padang bilun Miri maya nya lalu sida ti ngambat iya nyadang iya deka ditangkap. Tang enda lama udah nya Peter lalu diuluka lawyer enggau pengari PKR ngagai sebuah kerita ti lalu mai iya ngejangka padang bilun Miri nuju nengeri Miri.
Enda lama udah nya kami dipadahka kerita ti ditepan sida tiga udah kena tanka sebuah agi kerita ti ngundan 3 iku lelaki ti enda dikelala, ti lalu mai Peter ninggalka endur nya.
“Peter semina nurutka atur sida” ku Dr Teo, ti agi kesal ke penanggul ti nuntung Peter nya. “Utai nya nyadi enggau jampat lalu kami enda mereti ke utai ti nyadi. Kami belaba ke Peter ditangkap ba padang bilun, lalu aku nyadang bala orang nya mih ari opis polis Cawangan Khas. Tang sida nadai mega madahka sapa sida. Aku mengkang enda mereti”.
Diatu bala peninga Radio Free Sarawak mengkang enda nemu penunga Peter. Pengari rakyat PKR ti mega siku ari lawyer pengelantang mensia, See Chee How, udah bekejang ke Miri ngena bilun lemai nya enggau bala lawyer bukai dikena nentuka penunga Peter lalu deka berundingka chara minta iya dilepaska.
Tumu pagi tu iya udah nerangka nadai siku orang tau ditangkap sebedau iya didawa 24 jam dulu ari nya, lalu Peter enda tau enda diterangka semua hak iya empu lalu dikemendarka betemu enggau lawyer iya empu maya ti kena tanka nya. Bala polis (enti sida nya bala polis) mega patut madahka diri sapa sida, lalu ukai ngenanka kerita sengapa.
Tengah hari tu tadi polis Miri madahka diri nadai nangkap Peter, ti udah ngirauka ati orang mayuh, dini endur Peter.
Pemacha berita radio nya ti ditemu bisi penanggul darah tinggi lalu sida sebilik irau bendar ke pengelenyau iya. Tengah hari tu tadi, kepala parti penyakal, Anwar Ibrahim udah bejaku ngutuk pengawa orang ti bekuasa ti nangkap Peter.
Penanggul nya ba Peter laban iya udah mansutka penyalah makai suap, salah kena kuasa, ngerampas tanah enggau penyati atas bansa Dayak. Enti BN enda setujuka chara nya, sida iya patut nyaut, tang ukai salah kena kuasa polis kena nagang iya. Tu chara ti kamah dikereja BN lalu ngayanka pemayuh bala orang enggau temuai ti tama ke Sarawak udah kena tanka ba padang-padang bilun di Sarawak.”
Anwar mega bisi didinga minta penerang ari Opis Menteri Dalam Menua nama kebuah sida ngena kuasa polis nekanka bala munsuh politik sida.
Kami deka masutka repot enggau silik ba maya ti bukai.