Ngasuh orang bansa asal angkat pindah lalu nyerahka pendiau diri: ngerubuh rumah panjai sida lalu mejal semua sida pindah ngagai endur bukai enggau nadai bepampas, nya sebengkah penemu ti enda ulih diterima akal.
Tang di menua Sarawak pekara tu suah dikereja dini-dini endur sebaka enggau baka ni tanah temuda rimba sida dirampas lalu udah nya dijual ngagai orang bukai.
Mayuh raban orang asal udah lenyau tanah temuda rimba sida, lalu rumah panjai sida ti agi manah dirubuhka dikena meri awak ngagai pengawa muka ladang ti besai-besai.
Suah agi pengawa ngangkatka orang bansa asal ari pendiau sida nya nadai bepelasarka undang-undang, tang dalam perintah Taib, orang ari raban bansa asal nadai dilindung. Ari nya kompeni-kompeni ladang ti kaya-kaya mudah bendar bulih untung ari sukung bala kroni-kroni BN.

Gaya utai ti nyadi sehari tu di Ulu Niah, enda jauh ari menua Miri, meri gambar ke kitai nya pengeringat orang asal ari kena keruga kompeni-kompeni ladang nya.
Bala orang ti udah nguan rumah panjai di Rumah Umpol kenyau ari 40 taun tu udah, diatu nyau deka angkat ngelaban ansak diasuh pindah ninggalka rumah sida dalam kandang 14 hari iya nya kena 26hb Enam, iya nya sehari tu.
Raban orang asal nya tentu enda telabanka ‘pemansang’ ti dibai Taib lalu raban polis mega bisi dipeda ayan ba endur nya dikena ngerara sebarang pekara ti enda manah tau nyadi.
Tang, ba Rumah Umpol sehari tu bisi pekara ti nyelai dikereja bala Iban ti kala udah dikeruga orang luar dulu ari tu. Raban bala pengarang berita ti bisi ngagai endur nya dipeda takut sereta kesal, laban ngelama tu orang Iban dipeda malu sereta lemi, diatu nyau ngena ngepan pengayau sida lalu besemaya deka ngenanka menua sida.

Raban bansa orang ti bumai tu nyau masukka ngepan kayau sida, ti semina kala udah dikena bala aki-ini sida kelia.
Ilang enggau nyabur ti tajam ditangkin sida ba punggung.
Bala sida dipeda begantungka pengaruh enggau jimat dikena ngelaban sapa-sapa ti mansang deka ngalahka sida. Bisi mega pengaruh sida nya diengkahka ba atas tikai di tanah.
Sida ngangauka semengat enggau petara aki ini sida ngambika datai mantu sida ngetanka menua sida ari kena kachau orang ti jai ati enggau sida, lalu ditu orang ti jai nya bala orang ti bejalaika kerita lipan ti tau datai sebarang maya ngererak rumah panjai sida.
Tang seninjik mega, nadai sapa-sapa datai ba maya repot tu dituliska!
Dipeda ari pengeringat bala orang di menua nya, kitai tentu deka betanya sekali ke Kepala Menteri udah mutus ati endang deka ngalaban bala Iban nya? Tauka, iya enggau bala kroni iya udah nyediaka diri angkat ngelaban bala orang asal?

Utai ti ngasuh tau tekenyit ati nya, kompeni ladang WTK udah dipeda kempang ati muru 300 iku orang diri sebilik ari rumah panjai 60 pintu lalu ngerampas tanah temuda rimba ari sida enggau enda bepampas sesen.
Nambahka nya WTK nadai minta pemendar tama ngagai menua nya lalu mai orang asal di menua nya merambu pengawa kunsi bekebun bedandang besai dia.
Bala orang di Rumah Umpol deka lenyau pendiau, lenyau tanah pesaka endur ngidupka diri lalu rampa menua sida deka kamah laban diracun enggau baja ari pengawa ladang, ti deka ngeruga pemeresi ai sungai enggau utai idup dalam sungai.
Pengawa ladang deka ngujungka tanah tusur lalu nyumbatka arus ai sungai lalu utai idup dalam sungai deka punas. Lalu rumah panjai sida ti udah didirika sida bepuluh-puluh taun tu udah deka dirubuh. Sida deka nyadi raban orang setinggan ba kandang negeri di sebelah Miri tauka di Kuching.

Semua pengawa ti berat-berat dalam ladang deka dikereja bala kuli ari menua Indonesia laban orang nya sanggup kereja ngena upah ti murah.

Bala bakih Taib Mahmud dalam kompeni WTK udah tama ngagai kandang temuda rimba enggau mayuh macham tegal.
Raban orang Iban di endur nya datai ari 3 buah rumah panjai enda jauh ari Miri. Aki ini sida kelia udah pindah kia datai ari pelilih menua Skrang enggau Sri Aman, rambau pegai perintah British, ba maya sida ti bejalai begigaka tanah endur ngidupka diri lalu nya ngujungka sida datai di menua Ulu Niah dia.
Sida tu ukai raban orang setinggan. Sida bulih menua ari pemendar perintah British lalu kandang menua sida mega dikelala perintah British.
Lebuh Sarawak enggau numbuhka persekutuan Malaysia, Perintah Sarawak udah nyukat baru kandang menua nya lalu ngeluarka sempadan ke semua rumah panjai di Ulu Niah dia. Semua kar menua endang agi bisi disimpan dalam Opis Residen Miri datai ke sehari tu.

Ari nya, udah chukup endur kitai ngumbai orang Iban di Ulu Niah endang bempu tanah NCR dia!
Taib ti nyadi tuai Perintah Sarawak patut ingat ke Malaysia ti nyadi kaban dalam sempekat ngemataka pengelantang orang bansa asal United Nations Declaration on the Rights of the Indeginous People. Tu mai reti menua orang bansa asal enda tau dikeruga.
Tang sempekat tu suah bendar enda diperatika lalu orang bansa asal di Sabah enggau Sarawak suah bendar dikachau.

Taib udah nyerahka lisin sementara dikena muka ladang atas tanah orang bansa asal di Ulu Niah ngagai bala kroni kayu batang iya, sida WTK sebilik enggau kompeni sida, Medan Mestika Sdn Bhd.

Premium tanah dia semina lebih RM2 juta aja, nitihka penerang ari Opis Tanah, tang asil ari buah sawit ba tanah sepemesai 4,047 hektar nya ila deka meri untung ngagai beratus juta ringgit.

Lisin sementara ba atas tanah NCR nya ukai pemutus chara undang-undang ke sapa-sapa ti deka ngereja nitihka peneka diri empu. Tang nya udah chara Taib ngelaban undang-undang ngelama tu.
Lisin ti baka nya patut dikereja enggau setuju ari orang ti bempu NCR di menua nya, tang ngelama tu Taib enda kala madahka orang bansa asal pasal hak-hak sida.
Ngena lisin sementara nya, kompeni ladang baka sida WTK udah ngena pengelemi orang bansa asal ti enda nemu ulu-ili dirampas tanah.
Kompeni baka sida WTK suah ngereja pengawa kamah ba orang bansa asal, baka meri pampas ti mimit, madahka bayar lawyer ti mar, meri share ngagai tuai-tuai raban bansa, repot polis ti pelesu dikena nipu orang bansa asal ngambika nyerahka hak-hak sida atas tanah.
Ba kes tu ‘notis ninggalka menua’ nya sesalin dokumen ti enda sah ba undang-undang menua, nitihka penerang ari siku lawyer ti mantu Rumah Umpol nya, Harrison Ngau.
Kompeni ladang nya udah alah ba pechara ti terubah ba atas tanah nya lebuh dipechara ba Court Tinggi di Miri. Tu nyangka akim maya nya enda tentu nemu pasal cherita lama baka ni orang bansa asal di menua nya bulih tanah sida dia, tauka nyangka Court Tinggi nya udah nulak semua kar ti dibantaika maya bechara ke endur nya.
Tang kes nya agi diapil lalu kes nya diatu bedau tembu. Enggau nya, lawyer Harrison Ngau madahka WTK nadai bempu sebarang hak muru sapa-sapa orang angkat ari menua nya lalu iya mega nangkan orang asal di menua nya ngambika betan lalu ngelaban sapa-sapa orang ti datai deka ngeruga sida.

Tang WTK diatu benung bebendar amat madahka ‘notis’ sida nya endang amat-amat sah ba undang-undang baka ti dikeluarka ari court. Tang ke bendar, ‘notis’ nya udah dituliska siku pengereja pengawa dalam opis perintah dia.
Bala orang ari Rumah Umpol bisi madahka ngagai Radio Free Sarawak sida diatu benung nyikap diri lalu besedia napi sebarang keruga. Ninting malam sida bejaga enggaika munsuh datai tengah-tengah malam mai kerita lipan lalu ngerubuhka rumah panjai sida.

Sida mega seruran miring. Sida munuh dua iku babi ke genselan pengawa sida nya lalu nyamu bala temuai ti datai kia nyengkaum bala pengarang berita.
Ari tinjau orang mayuh di Sarawak ti beratika pekara ba raban bansa ti mit nya, orang deka meda baka ni raban bansa nya ngetanka diri ari laban bala Taib enggau raban iya ti disikap ngena kerita lipan.
Nyangka tu mih maya Sarawak nerima ubah.