Kami udah dipadahka bala pemesai sepital di Lawas ti endur sida udah diperintah YB sida di menua nya Awang Tengah, diau jenuh lalu enda ngemesaika pasal berita pengerembai penyakit denggi bulan nyin kemari.
Aum ngejut ti diatur di sepital nya udah dikachau Awang Tengah laban iya enggai ke mensia mayuh enda datai begelumu ke Lawas, taja pan kes penyakit nya mayuh udah diripotka.
Awang Tengah ti nyadi Menteri Rampa Menua Enggau Perambu, udah ngirumka pengari iya ngagai aum ti endur iya merintahka pemesai-pemesai sepital nya ngelalaika penerang pasal pengerembai penyakit nya laban enggaika nanggul penatai mensia mayuh ngagai Pesta Lawas ti diatur ba ujung bulan Lima tu tadi.
Ngelama tu kes ti baka nya enda tau enda diterangka ngagai orang mayuh ngambi ke orang mayuh tau bejaga-jaga ari kena rampit penyakit nya. Tang Awang Tengah enggai ke orang ari luar menua nya enggai tama kia!
Mensia mayuh ti bisi anak mit bisi hak nanya ke pengamu YB sida nya.
Menua Malaysia ngembuan rekod pemati ti tinggi ketegal kena rampit penyakit nya enti dibandingka enggau menua-menua ti berimbai enggau iya, lalu nya bepanggai bendar ba atur nagang pengerembai penyakit nya.
Nitih ke penerang ari Akademi Perubat Malaysia, bisi 4.67% kes udah ngujungka pemati di menua Malaysia, lalu di menua Thailand enggau Indonesia sama-sama bisi semina 0.3% enggau 0.5% kes aja. Penerang ti munyi tu tau bendar ngasuh mensia teguran, tang penerang tu enda dipadahka ngagai mensia mayuh, lalu bisi beratus bengkah pemati udah nyadi dalam kandang seminggu ti nyerumba pengerembai rampit penyakit tu di serata dunya. Ba ujung minggu nyin kemari bisi 400 pemati diripotka lalu 11 pemati nyadi di Sarawak. Diatu bisi dua-puluh dua kes pemati udah nyadi ba minggu dulu ari tu.
Ari ketegal ti nadai vaksin, dia atur bejaga-jaga enggau chara magi orang ti sakit awak ke enda ngerampit orang ti gerai. Sereta orang nya udah kena gigit nyamuk aedes, dia darah dalam tubuh iya lalu nyadi sarang endur igi penyakit deka idup dalam pengelama lapan hari. Dalam kandang nya, sida ti sakit enda tau enda dibagi laban enggai ke igi penyakit nya kena insap nyamuk ti enda ngundan igi penyakit nya lalu dipindahka ngagai orang ti gerai.
Nya alai, beguna amat enti sebengkah-sebengkah kandang menua nya bisi ditemu bisi kena rampit penyakit nya, orang mayuh enda tau enda diterangka, lalu bala temuai ti deka datai mega enda tau enda dipadahka enggau silik sereta lenak.
Diatu kami minta Awang Tengah empu nyakal repot tu!
Diatu terang bendar mensia mayuh di Sarawak enda nemu pasal pemalat pangka ari rampit penyakit tu. Tu mega deka nambahka pemayuh orang ti mansang berubat ke sepital tang sida ti sakit nyau udah kelalu laun ditemu, lalu tau ngujungka sida mati.
Diatu sida ti tuai-tuai di Lawas udah belabuh nanyaka nama kebuah YB sida sanggup ngachau aum pemesai-pemesai sepital bejalaika atur ti patut dikena nagang pengerembai penyakit nya?
Pengerembai penyakit nya udah ditemu ba pelilih menua Awang Tengah empu di Kuala Lawas, lalu penyampau kes dia diatu udah manggai 25 iti.
Taja pan bala pengundi di menua nya enda tau enda diterangka pasal pengerembai penyakit nya ngambika sida bejaga-jaga, tang Awang Tengah endang rindu agi deka ngempuruka mensia mayuh ke Lawas kena 27hb/28hb Lima tu tadi.
Pesta Lawas ti terubah diatur ari asuh Awang Tengah taun nyin kemari ketungkah pengawa bepilihbesai DUN. Lalu taun tu mayuh orang nyadang pengawa ngundi deka diatur dalam bulan Enam tu ila!
Enti pelaba mensia mayuh nya betul, lalu Awang Tengah endang amat ngena peluang nya ngempuruka mensia mayuh, taja pan nyawa mensia mayuh kena keruga penyakit nya.
Sekeda ari pemesai di sepital Lawas udah meri penerang ngagai Sarawak Report enggau Radio Free Sarawak pasal Awang Tengah endang amat bisi ngasuh pengari iya datai ngulu aum bala pemesai di sepital nya.
Sekeda ari pemesai ti ngulu aum maya nya bisi mantah ari belakang pasal peminta Awang Tengah nya kemari. Agi mega Awang Tengah endang bekaul bendar enggau Kepala Menteri, Taib Mahmud.
Taja pan baka nya, nadai sapa nemu enti peminta Awang Tengah nya udah nanggul penyampat kes dipadahka ngagai Opis Menteri Pengerai.
Kenyau ari taun-taun 1970 suba Penyakit Denggi udah nyadi sebengkah penyakit berampit ti ngengala bendar di Malaysia, lalu Opis Menteri Pengerai enda tau enda dipadahka dalam kandang 24 jam, awak ke atur penagang tau dipejalaika enggau jampat.
Enti kachau ari Awang Tengah udah ngujungka pengelaun dalam atur penagang pengerembai penyakit tu, mayuh orang tentu deka enda lantang ati ngagai iya.
Diatu Sarawak Report deka nanya, nama pemesai kuasa tauka hak orang politik ngachau pemutus runding bala pemesai sepital, lalu nama kebuah pengelikun mensia mayuh tau diseliahka dulu dikena meri ruang ngagai atur pengerami ngempuruka mensia mayuh dikena ngemuaska ati orang politik?