Ba minggu ti deka datai tu ila Menteri Besai Malaysia, Najib Razak deka nyewa sebengkah stadium ti tebilang bendar ti nengeri London dalam pengawa iya dikena ngelakuka diri empu, lalu semua pengawa nya ngena duit bala pemayar chukai orang Malaysia magang!
Nama stadium nya Arena O2, tauka bali nama iya The Dome, nya sebengkah tanda menua ti tebilang di UK lalu deka dikena nyadi ke sebengkah palan dikena dalam lumba olimpik ila.
Stadium tu mega suah dikena orang ngatur konsert pop ti besai-besai, nyengkaum konsert niang Michael Jackson ti penudi tu tadi.
Tang kena ke hari Satu tu ila (iya nya 14hb Lima 2012) Najib Razak deka ngatur sebengkah pengawa begempuru ti endur iya empu deka nyadi bintang maya nya, ‘An Evening With The Prime Minister’ [Selemai Enggau Menteri Besai]!
Nitihka penerang ba laman web opis High Commission Malaysia di London, semua peranak Malaysia ti diau di UK dipinta datai ngulu pengerami nya, enggau pemakai diberi pechuma lalu pia mega bepeluang meda main asal diayanka maya nya ila.
“Nama kebuah Najib Razak mutus ati ngena belanja ti ngemayuh nya dikena iya ngelakuka diri empu di menua tasik?” ku siti jaku tanya siku nembiak Malaysia ti benung belajar di London. Baka ni ba runding Najib, manah agi chara nya, laban orang Malaysia di London deka dikemendarka ngundi? Bala orang ti deka ngundi maya nya ila semina bala officials perintah aja, lalu sida mega dipejal ngundi parti BN aja!
“Pengerami tu ila nya sebengkah manipulasyen pengawa bepilibesai politik ti begunaka belanja bejuta-juta ringgit. Pengerami nya enda patut diatur ngena duit ti datai ari mensia mayuh, lalu ba penemu aku orang mayuh enda tetarit ati enggau pengerami nya ti diatur di menua Britain. Nyangka mih Najib udah teguran deka ngatur pengerami di KL udah bekau mensia mayuh udah ngayanka diri ringat rambau gempuru Bersih 3.0 ti diatur apin lama tu udah!”
‘Bala orang diupah datai ngulu pengerami ari serata menua UK ngena bas!’
Sarawak Report udah dipadahka pasal opis High Commission Malaysia di London ngatur perengka pengangkut ti pechuma ke semua orang Malaysia ti deka datai ngulu pengerami nya.
Bala nembiak Malaysia ti belajar sepenyauh di Edinburgh University di menua Scotland mega diperansang datai ngagai pengerami nya ti diatur bala diplomat Malaysia nya. Penatai bala pengabang disadang mayuh laban dikena ngisi penuduk ba baris di mua laban dikena nyeliahka penuduk mayuh puang laban enggaika digambar bala pengarang berita ti lalu dipandangka ba TV ke menua Malaysia.
Diatu berupai bendar pengawa diatur dikena meli sukung ke Menteri Besai laban dua minggu ti udah lalu pengawa orang ti ngayanka diri ringat rambau Bersih 3.0 di nengeri London udah mujur ngelumuka orang Malaysia ti auska adat demokrasi enggau chara enda bebayar.
Ba pengerami enggi Najib tu ila, bala nembiak ti sama mega diambi BN ngabang, taja pan sida udah kala diemba enggau jaku tagang enti sida majak deka enggau Bersih 3.0 duit bantu dikena sida belajar nya deka ditarit pulai.
Taja pan sida udah kala diemba perintah munyi nya, tang bala nembiak Malaysia nya majak kediri enggau begempuru rambau Bersih 3.0 tang sida ngelalaika mua diri ngena gamal engkeramba.
Sebengkah gempuru chara manah disadang deka diatur di luar stadium O2 Arena tu ila, taja pan bala orang ari opis High Commission Malaysia di London bisi ditemu deka ngupah sebengkah kompeni sekuriti dikena nagang pengawa begempuru nya, taja pan diatur di nengeri London.
Bala kaban BN UK
Sarawak Report mega ulih ngayanka baka ni Menteri Besai nya sekali agi mutus ati ngemendarka duit chukai ari mensia mayuh ari Malaysia dikena iya ngemanahka nama parti BN enggau chara ti ngatur sebengkah agi pengerami ke gerempung Friends Of Barisan Nasional UK, ti udah dipenyadi iya dalam bulan Tujuh taun nyin kemari ba penemuai iya ke London.
Tuju ti bendar penumbuh gerempung Friends Of Barisan Nasional UK, nitihka laman web gerempung nya dikena ngerapitka agi kaul dagang BN enggau gerempung-gerempung dagang di UK. Sekeda ari bala orang ti dipaduka nyadi patron dalam gerempung nya baka Prof Lord Desei, Lord Parry Mitchell, Lord Shiekh of Cornhill enggau Dr Dawn Gibbons MBE udah dipaduka sechara co-opted nyadi kaban patron-patron ke gerempung nya.
Bala sida patron nya bisi dirintaika nama dalam laman web FBN UK sama-sama enggau Menteri Luar Malaysia, Anifah Aman, siku menteri ti kala diayanka kami dalam Sarawak Report laban ti ditemu bisi kaul enggau makai suap begulai enggau menyadi iya empu, Musa Aman, Kepala Menteri Sabah.
Diatu Sarawak Report udah nulis surat nuju ninting iku bala patron dalam FBN UK nanyaka nama pelasar sida iya nyukung sebengkah parti politik ti bisi udah ngerara ngena chara ti kasar pengawa mensia mayuh di KL begempuru Bersih 3.0 ba minggu nyin kemari. Pengawa begempuru Bersih 3.0 nya kemari diatur mensia mayuh laban dikena sida minta atur pengawa ngundi ti beresi; lalu parti BN mega udah ditemu dunya napis video berita ti ditusui gerempung besai berita BBC, Al Jazeera enggau CNN, lalu pia mega betenahka enggau chara ti tau nganu nyawa siku senator ari menua Australia ti datai ke Malaysia laban deka beratika chara menua Malaysia ngelanggar atur hak asasi mensia ti dikereja bala polis.
Surat kami mega disukung gerempung pengelantang mensia, Suaram International, ti betanyaka baka ni sebengkah parti politik ti seruran muji diri “ngaga kaul ti manah dalam dagang” entara kaban gerempung ti datai ari dua bengkah menua nya. Sebengkah perintah ti manah tentu deka ngiga peluang dikena nulung rayat mayuh, lalu ukai semina ngiga peluang bedagang ke bala kaban gerempung dalam parti BN aja?
“Nengah FBN UK, bala kaban iya deka bulih peluang ngemansangka kaul dagang ke raban orang Malaysia di menua Britain lalu dikena besilihka penemu entara pengawa dagang enggau mega perintah. FBN UK dikena mantu kompeni-kompeni dua bengkah menua nya ngerembaika pengawa dagang sida di menua UK.”
Engka mih bala patron di UK nya kurang penemu ba kes ti nyadi di Malaysia, lalu surat kami mega bisi nyebut pasal penyalah bekaul enggau makai suap maya meli kapal selam Scorpene ari menua Peranchis, ti lalu mega dikena ngingatka sida pasal penyalah makai suap ‘Bantu Senyata’ entara UK ti betuaika PM Margaret Thatcher suba enggau Malaysia rambau Najib Razak nyadi Menteri Pengelikun Menua Malaysia.
Naib Razak kala nerima jaku puji ari Menteri Besai UK, David Cameron, laban ti udah ngapuska adat ISA ti nutup orang salah enggau enda ibuh dipecharaka.
Tang orang Malaysia di London udah nerangka ngagai bala officials Malaysia pasal pengawa ngena duit ari mensia mayuh dikena ngulihka sukung nya ngelai pengujung pemerinsa di Malaysia enggau penyalah makai suap ti balat bendar nyadi diatu.
Gempuru Bersih 3.0 nya sebengkah ari kelai ti udah ayan.
Bala orang ti ngarika Najib Razak diatu benung bebendar bekereja, tang sida mega patut besedia napi sebarang bantah ti deka dipandangka orang di nengeri London.