Senator ari menua Australia Nick Xenophon udah ngamatka penerang ngagai Sarawak Report ti endur iya deka ngeluarka sebengkah saman ngagai kompeni berita The News Straits Time, taja pan suratberita nya udah minta ampun ari iya sehari kemari
Salah guna enggau manipulasyen media berita di menua Malaysia udah nyadi sebengkah buah kenang nengah tiga kandang menua ba ujung minggu nyin kemari ti endur kompeni pengerembai berita entarabansa baka BBC enggau Al Jazeera udah mansutka jaku tanya atas pengawa napis berita ti ditaburka sida bekaul enggau gempuru Bersih 3.0.
NST udah saru tusui sekeda leka jaku ti dipansutka Xenophon rambau aum parlimen di Australia dalam taun 2009 ti endur iya dikumbai madahka Islam nya chundung agi ngagai sebengkah gerempung orang jai ari ti nyadi sebengkah gerempung pengarap!
Tang ke bendar Xenophon nya ukai bejakuka pasal Islam, tang iya mantah bala saintologis sereta enggau chara sida nya ngulihka belanja. Berindik ari jaku iya nya, NST udah salah tulis lekajaku Islam disilih sida enggau lekajaku saintologis.

Jaku kutuk ti tau nganu nyawa?

Lebuh ti berandau enggau Sarawak Report, Xenophon, iya nya siku lawyer, mansutka penerang ti endur iya beserebanaka diri diemba orang mayuh ari serang ti diatur baka nya.
Suratberita NST ti endang dikemataka UMNO-BN nya arap bendar ke sida ulih ngerarika diri ari penyalah nya, udah peneleba sida naburka jaku petenah dikena ngelabuhka munsuh politik sida dalam menua Malaysia empu. Tang sereta penyaru sida NST nya udah dikemesaika sekeda suratberita di menua Australia, dia NST nguji matak jaku diri lalu minta ampun.

Bedau tentu meruan

Ba Xenophon empu, jaku minta ampun nya enda umbas. Penyaru NST udah balat dikerembaika dalam surat-suratberita jaku Melayu lalu semua petenah nya bisi bebida entara sebengkah suratberita enggau suratberita ti bukai lalu bisi sekeda ari suratberita nya ngaga gambar Xenophon nyadika siku orang ti jai bendar.
Kelimpah ari NST ti saru ngumbai Xenophon mantah Islam, sida mega balat ngerembaika cherita iya ti nyukung pekara orang ti jadi nikah entara lelaki enggau lelaki. Pekara ti baka nya endang salah ba mata adat menua Malaysia lalu UMNO udah ngena adat nya nekanka tuai penyakal Anwar Ibrahim, tang sida enda mujur.
Ke bendar, dalam jaku ti dipansutka Xenophon nya, iya semina madahka raban saintologis nya udah enggai nerima kaban belayan sida agi sepengudah sida ngubah pengidup diri nyadi raban gay.
Bedau tentu terang
Suratberita NST enggau parti UMNO arap bendar ke kes nya dipecharaka dalam court di menua Malaysia empu. Tang enti kes nya dipecharaka ba menua bukai dia suratberita nya deka kamah nama laban udah betenahka chara betibar jala enda betating ba sebengkah jaku ti dipansutka siku orang ti tampak nama dalam ruang perlimen di Australia!
Tang penanggul nya siti ari mayuh kes ti nyau ngayanka pemeli enggau pengelusu sebengkah rejim perintah ti bekuasa di menua Malaysia ti enda ulih pekit nya. Kelimpah ari nya penanggul nya mega ngayanka baka ni gaya pemesai-pemesai perintah enda ibuh udu berunding maya ngaga pemutus, laban penyalah sida seruran dilamun, lalu surat-suratberita di Malaysia mega seruran mansutka jaku puji ngagai sida!
Baka ni mih chara kitai deka nerangka pemeli ti udu dikena bala sida ti mansutka jaku petenah ba siku pemesai politik ti benama lalu enda diperatika dulu ba ‘ular’ dalam UMNO.
Enggai belajar ari pemeli ti lama

Menteri Main Asal Malaysia, Rais Yatim udah ngayanka diri iya enda kiruhka utai bukai tang ngelindung rejim BN ti udah napis video berita ti ditaburka gerempung berita entarabansa enggau peneka ati, laban irauka penyalah perintah nya ditemu mensia mayuh!
Tang bala penguna internet di Malaysia udah nemu jaku tambap Rais ti madahka semua menua di dunya tu enda tau enda napis semua macham berita ti dipansutka sida ngagai mensia mayuh, nya jaku bula iya aja.
Tu ukai ke terubah iya BBC bisi saru penemu enggau BN Malaysia bekaul enggau pengawa napis berita. Dalam taun 1994 suba BBC udah tepejal badu nanggam kontrak meri berita ngagai Malaysia udah sida nemu isi berita sida diubah lalu enda nitihka berita ti endang amat nyadi.
Mayuh orang belabaka udah penanggul ti nyadi ba minggu nyin kemari, gerempung berita ti tebilang entarabansa nya deka badu nanggam kontrak enggau Astro.
Najib Razak enggau BN deka mayar rega ti enda sebaka, lalu diatu gerempung berita entarabansa nya udah ditangkan iya nya endang bisi seraban pemerintah ti menyati rayat diri empu, lalu pemeli raban pemerintah nya enda ulih dikarapka agi.