Dalam pengelama lebih lima puluh taun, UMNO/BN enggau Taib udah nginsap bebilion-bilion ringgit ari pengeraja asal menua Sarawak.
Dikena sida malas nya, sida udah nyapi enggau chara murah ba ninting kali pengawa bepilihbesai ngagai bala pengundi ti seranta, ti enda nemu bisi penguntung ari pengaya nya.
Tang semaya-semaya nya jauh murah agi ari sida ti nyapi, lalu bala kaban politik BN rindu bendar besemaya ninting kali maya bepilihbesai laban sida enda ibuh mansutka duit ringgit!
Ba siti chunto ti nyengala, bala pemacha kami ari Sibu udah ngaga pansik lalu sida bisi nemu jaku penerang ari BN ti madahka pemansang ba pengawa ngaga universiti beguna bendar ke nengeri Sibu.
Najib kala udah besemaya ba pengawa bepilih mit di Sibu dalam taun 2010. Pengawa nyuap maya ngundi nya kemari berupai bendar, lalu enti pengawa nya dikereja iya di menua tasik, iya tentu udah kena tekan lalu dituduh laban iya sanggup salah guna kuasa penuduk engau pangkat iya malas undi ti dipinta iya.
Nitihka penerang ari gerempung berita menua Malaysia, Bernama, baka tu mih cara Menteri Besai ngereja pengawa iya ti nguji ngulihka undi dalam taun 2010:
Ke bendar, jaku semaya ti baka nya enda mujur dikena mujuk ati bala pengundi di Sibu ti udah leju meda penyalah makai suap BN enggau mega pengawa kleptokrasi Taib dalam pengelama 30 taun merintah di menua Sarawak.
DAP udah mujur ba pengawa bepilih mit nya kemari!
Taja baka nya, orang kuat parti SUPP udah ngena peluang ngansak projek universiti nya dipajakka dikena nyadika senyata iya nyerang bala orang ti agi sanggu runding ba pengulih BN ngamatka projek nya dipenyadi dalam taun 2012. Lalu ari nya semua kompeni suratberita ti dikemataka BN udah ngemesaika berita nya:
Diatu nyau udah taun 2012 lalu Kolej Laila Taib mengkang agi sebuah kolej, ukai sebuah universiti lalu nadai kelai kolej nya deka diangkatka nyadi universiti.
Tang, udah hari beganti hari, minggu beganti minggu, sebuah agi universiti disemaya deka didirika di menua Sibu, serak tu, sekali agi dalam kandang sebulan kejang deka bepilihbesai ti disadang deka dipejalaika.
Dalam bulan nyin kemari Najib udah sekali agi nemuai ke Sibu lalu mansutka jaku pasal pemansang projek, sekali agi disempulang tukang begau BN, Wong Soon Koh enggau Taib Mahmud. Serak tu sida iya ngayanka sepuchuk ‘Surat Kangau’ ke prambu ngasuh ngaga sebuah universiti, lalu ke serak tu sida meri nama universiti nya Kolej Universiti Teknologi Sarawak!
Surat-suratberita ti taluk ngagai BN udah dipeda rauh-rauh ngemesaika ‘pemeri’ ari Najib nya nyengkaum beratus-juta ringgit dikena ngagai perengka-perengka ti diguna di menua pesisir! (Tang baka ke ngelama tu, beratus-juta ringgit ti disemayaka nya patut dipelanja enggau terang, tang suah agi belanja nyampau nya deka nengah kompeni-kompeni enggi bala kroni BN ti bulih kontrak!)
Utai ti nyata bendar dipeda ba pengerami 26hb April nya kemari iya nya ‘Surat Kangau’ nya semina jaku gerah perintah udah bulih pemendar enggau duit dikena neruska projek.
Tang, sekeda bala orang ti rajin mansik renggat projek nya, sekali agi tetemuka penerang ti disebut maya pengerami nya kemari semina jaku kimpin politik BN, baka ke suah dikereja BN ngelama tu.
Kebuah pia, laban Surat Kangau nya pun pengawa minta deka ngaga sebuah universiti. Pengawa nya nadai besangkut paut enggau pemendar tauka puku ti deka diperanakka dalam projek nya.
Dalam Bup Lalau Penumbuh Universiti ari Opis Menteri Pelajar Tinggi Malaysia udah nerangka serangkap proses nya agi jauh pejalai. Nitihka penerang ari siku pemansik di Sibu: “Pekara ti udah dikereja perintah BN diatu iya nya minta pemendar numbuhka sebuah universiti. Sebuah kolej universiti semina deka dikumbai udah rasmi enti semua proses minta nya dikemendarka lalu nerima lima bansa pemendar. Saru amat runding orang deka numbuhka kampus UCTS sebedau UCTS dikemendarka sechara rasmi ari Opis Menteri Pelajar Tinggi.”
Bisi sebengkah pekara ti enda tau enda diperatika kitai dulu. Kompeni ti di belakang projek nya deka ngarika Menua Sarawak, Edusar Resources Sdn Bhd udah diagihka share sepenyampau RM2.00 aja!
Pengerusi ti rauh-rauh ngelakuka projek nya endang ukai orang bukai tang kroni Taib, Wong Soon Koh!
Bala pemansik di Sibu udah bulih penerang ti madahka nadai pemansang dalam perambu deka ngangkatka Kolej Laila Taib nyadika sebuah universiti, taja pan iya kala nyadi buah kenang Najib enggau Wong Soon Koh suba.
Terubah iya kolej nya (ti udah ditukar nama ngagai United College of Sarawak, semina bepanggai ba duit ari Taib) enda tau enda betuaika siku orang ti bepelajar ba ikas PhD, ngambika kolej nya ulih dikemendarka bejalaika pengawa sida.
Tang, Wong Soon Koh udah ngengkahka anak iya empu, Andrew Wong, nyadi pengerusi dalam KLT lalu Andrew mega ditemu nadai ngembuan pelajar ti ngeninggi nya!
Kedua, penegap pekara belanja KLT enda tentu manah. Nitihka rekod pekara belanja indu kompeni nya, S.U.C. Consortium, sida udah lenyau mayuh bendar belanja.
S.U.C. Consortium kala udah lenyau belanja RM708,740 dalam taun 2010 lalu RM3,936,027 dalam taun 2011. Kebuah pia laban pengarah dia nya Wong Soon Koh empu enggau menyadi Taib, Tufail Mahmud.
Tufail Mahmud udah nambahka pengaya iya empu ari lisin ngulihka kayu batang ti dikeluarka opis Taib Mahmud. Pengerugi ti ngemalat nya enda ulih nyadika Kolej Laila Taib diangkatka nyadi sebuah universiti. Dikena ngaga sebuah universiti, mar bendar ngulihka pengarap orang mayuh enti orang nemu projek nya bisi kaul enggau KLT enggau Wong Soon Koh!