Dulu ari tu kami bisi udah nuliska repot pasal konsesyen ngulihka kayu kampung enggau kebun dandang besai sawit enggi iya, lalu diatu kami mansutka enggau silik agi baka ni Sapit Menteri Pemansang Pengawa Dagang Naroden Majais ditemu nerima kontrak perintah ti beungkus RM100 juta ke kompeni iya empu!
Bala pemacha blog kami ditu udah nunjuk ngagai kami pasal penerang ti ayan ba laman web CIDB. Penerang nya pasal kontrak perintah ti besai bendar diberi ngagai kompeni Embun Pelangi Sdn Bhd ti endur dua iku pengarah kompeni nya dikereja bini Naroden, Massenah Binti Ahmad enggau anak seduai, Kamaruzaman Bin Naroden.
Sebarang sapa ti mangku pengawa nyadi menteri endang enda tau nerima sebarang kontrak ari perintah, nyengkaum nerima projek RM100 juta ti enda diterangka.
Pansik kami ngayanka pengari rakyat ari sitak Simunjan nya gaga bendar meda sida sebilik bekereja nyadi pengarah lalu megai mayuh share dalam kompeni sida empu nya. Nengah anak iya, iya empu bulih 50% share ari projek-projek besai! Naroden endang ngamatka penemu enggau pengerindu tuan iya Taib Mahmud ti meransang orang di Sarawak masuk pengawa dagang.
Polisi pengawa dagang ti dipejalaika Taib Mahmud sekumbang 30 taun dalam perintah udah nginsap pengeraja asal ari menua Sarawak empu, lalu iya enggau raban menteri iya ke bukai udah bulih bendar pengeraja nengah kontrak-kontrak perintah.
Bala pemacha kami endang patut meri sukung ngagai kami ngambika kitai sama ulih ngayanka ‘Pengawa Dagang’ kaban BN di Sarawak!