Sekali agi jaku petenah Abdul Taib Mahmud ti dikena iya bejai Sarawak Report enggau Radio Free Sarawak udah makai iya empu!
Bedau tentu lama tu Kepala Menteri, besereta enggau menantu iya, Sean Murray, bisi ditemu nyewa Bell Pottinger ngambika ngubah isi (entry) dalam laman Wikipedia pasal seduai empu, kompeni-kompeni sida empu … lalu nyengkaum Sarawak Report/Radio Free Sarawak! Bell Pottinger nya seraban pemerita ti udah ditemu dibalut skandal ti ngenyitka ati di UK kenyau ari hari Dua tu tadi. Kompeni Bell Pottinger nya kala udah nyadika kompeni penusui berita ke Menteri Besai Margaret Thatcher dulu suba.
Berebak enggau nya kompeni Bell Pottinger mega udah ditemu nempa cherita madahka sida ulih betemu enggau Menteri Besai UK David Cameron ke sapa-sapa ti deka ngulihka Perintah British, sebengkah pekara ti meri malu ngagai Parti Conservative menua UK.
Diatu skandal nya udah masuk hari ke tiga ti endur kompeni Bell Pottinger sanggup disewa ngambika ngubah isi dalam laman web Wikipedia. Berita skandal nya ditusui mayuh suratberita di UK diuluka The Independent enggau Bureau of Investigative Journalism. Sepengudah penerang pasal sepuluh iti nama kelulu ti dikena Bell Pottinger ngubah isi dalam laman Wikipedia dikeluarka laman nya beberapa jam ke udah, dia orang ti mayuh agi nginjau Bell Pottinger nya Taib Mahmud enggau menantu iya Sean Murray!
Rintai isi (entry) Wikipedia ti udah diubah Bell Pottinger ti ngena nama kelulu ‘Biggleswick’ nya nyengkaum isi pasal Abdul Taib Mahmud, Sean Murray, Ridgeford Properties (kompeni Taib sebilik di UK), Christopher Murray (petunggal Sean ti mega nyadi Pengarah ke kompeni Ridgeford Properties), Sakto (kompeni Taib sebilik di Canada), enggau… Clare Rewcastle Brown, tuai pengarang blog tu enggau stesyen radio Radio Free Sarawak!
Raban suratberita di UK udah bulih penerang berebak enggau penerang ti manah pasal Taib, Sean Murray, Chris Murray enggau kompeni-kompeni sida nerima ubah ti dikereja ‘Biggleswick’, tang Clare Rewcastle Brown enggau Radio Free Sarawak sama nerima ubah ti enda manah. Ubah nya minta penerang ti ‘salah ari segi undang-undang’ pejalai Radio Free Sarawak, sebengkah radio ditabur dalam jaku Iban dikena kempen ngambika rakyat Sarawak bulih penerang pasal penanggul bekaul enggau tanah enggau penanggul di menua pesisir ti bukai. Sekeda ari isi berita ti dikeluarka radio nya nyengkaum penusah orang menua pesisir kena rampas tanah, dikeruga orang tanah orang bansa asal lalu didudukka orang kebun dandang besai sawit. Radio Free Sarawak mega nyadika sebengkah pelasar dikena bala penyakal ngiri penemu sida ngagai bala pengundi pasal banding polisi sida nimbal polisi enggi BN. Rambau bepilihbesai ti udah tembu pengari Taib Mahmud, Abdul Karim Hamza udah direkod jaku iya ti madahka pengeluar blog Sarawak Report enggau Radio Free Sarawak patut digiga lalu ditangkap. Penabur berita ke radio nya, Peter John Jaban (ti mega dikelala enggau nama kelulu Papa Orang Utan) diatu benung ngelalaika diri ari perintah menua iya empu, Sarawak.
Skandal kompeni Bell Pottinger nya endang sebengkah chara kempen dikena ngelaban Sarawak Report enggau Radio Free Sarawak. Ba tengan taun tu Taib ditemu nyewa FBC Media (ti benung dipansik ketegal nempa berita bula) dikena iya masuk ngagai sekeda stesyen berita tebilang di dunya tu. Kami mega bisi nemu baka ni Bell Pottinger mega disewa sebengkah perintah regime, Uzbekistan.
Kompeni Bell Pottinger mega bisi nerangka pasal baka ni kompeni sida Taib sebilik di menua tasik dipejalaika, betuaika menantu iya empu, Sean (Hisham) Murray. Tang dulu ari tu, Sean Murray kala udah bebula berita ti madahka iya bejalaika pengawa dagang kompeni enggi mentua iya, Abdul Taib Mahmud. Diatu mega Sean Murray ditemu nyadika tulang belakang projek ngaga rumah ti pemadu tinggi di negeri Kuching, Kuching Tower. Kelimpah ari nya kompeni Ridgeford Properties ti dikemataka Sean Murray nya ti ngeluarka belanja dikena ngupah kompeni Bell Pottinger ngubah semua isi (entry) dalam Wikipedia.