Pansik Sarawak Report ke baru ngayanka mayuh agi penerang baka ni Taib ngaku diri “endang nadai bejalaika pengawa dagang dalam menua Sarawak” nya jaku iya empu ti bula.
Kami berani ngumbai iya nya siku ‘Tuai Orang Jai’ tauka ‘Raja Penyamun’ ti ngemataka nyau ka semua share dalam kompeni besai iya empu CMS di menua Sarawak.
Chara bedagang ti sebaka enggau raban Mafia
Ngena kuasa iya ti nyadi Menteri Pekara Belanja enggau Kepala Menteri iya udah ngujungka kompeni ti dikuasa perintah baka PPES, Steel Industries Sarawak enggau PCMS dijual enggau rega ti pemadu murah ngagai kompeni CMS. Udah nya lalu dibagi-bagi nyadi share ti mit-mit dempu sida sebilik. Tu lalu nyadika sida Taib sebilik bekuasa penuh atas CMS kenyau ari 1996! Penerang ti diayanka kami ti pengabis baru tu belalauka pemindah share-share dalam CMS. Tu ngayanka baka ni share ti besai-besai dalam kompeni nya dipindah-pindahka lalu dikuasa penuh Taib atas sida sebilik. Dikena ngelalaika kaul diri empu kelalu nyata dalam kompeni nya Taib nudukka siku-siku sida sebilik mangku pengawa-pengawa ti besai-besai dalam kompeni nya.
Onn Mahmud
Dalam surat-surat penerang bisi ngayanka baka ni ba pun pengawa dagang iya, sekumbang bala anak iya agi besekula, orang ti dipaduka megai share ti mayuh lalu nyadi pengarah dalam CMS nya menyadi iya empu Onn Mahmud. Onn nyadi wakil dagang iya nyentuk ke seduai menyadi charut dalam taun 2003. Nitihka rekod CMS urung bulan Empat 2002 Onn Mahmud ti nyadi pengarah enggau pengerusi raban, megai enda kurang ari 30% share dalam CMS. Maya nya dua iku anak lelaki iya Sulaiman enggau Abu Bekir (ti nyadi Sapit Pengerusi Raban enggau pengarah eksekutif raban) mega megai 12% share siku-siku.
Orang ti nyadika pugu bempu share dia endang Taib Mahmud empu. Pemindah share enggau pengawa dalam taun 2003, udah Onn nadai agi bekaul enggau Taib, endang nyata dalam kompeni nya. Onn lalu semina megai share ti mimit aja lalu anak Taib bulih 44,925,102 share ba maya ti sama.
Laila nyadi pemegai share CMS pemadu mayuh
Repot-repot ari CMS ngayanka pemindah share ti mayuh nya nuju bini Taib empu iya nya Laila. Onn diganti anak biak Taib Sulaiman nyadi pengerusi raban, siku nembiak ti rinduka kerita. Sulaiman maya nya mega nyadi pengerusi RHB Bank ti dikuasa Taib, Sapit Menteri Dagang Temuai enggau MP ke sitak Kota Samarahan.
Udah nya share dipindahka ari anak lelaki Taib ngagai anak indu iya!
Taib enda nejuka dua iku anak lelaki iya nya ngemataka share ti mayuh dalam kompeni nya enggau lama. Rekod-rekod ti nangkanka nya ngayanka dalam taun 2007 kompeni Marjaharta dipindahka ngambika dikemataka Hannifah Taib enggau Jamilah Taib. Pengawa tu ngujungka 4 iku anak iya nya sama bulih share ti sama sebaka pemayuh dalam CMS enggau share ke bini iya empu ti mayuh agi. Enda lama udah nya Syed Ahmad Alwee Asree, siku orang bebansa Singapura, jadi enggau anak iya Hanifah Taib dalam taun 2002 lalu tama ngagai kompeni CMS, lalu terus nyadi pengurus besai raban – ti ngemata pasal Sumber Pengereja Pengawa. Sapa ti endang pugu ngemataka pejalai kompeni nya ti seruran berubah-ubah? Udah tentu Taib empu.
Pengawa dagang ti penuh penyalah makai suap!
Kompeni CMS nya udah dirintaika nyadi kompeni public listed dalam Bursa Saham Kuala Lumpur, ti bempu tanggungpengawa meri penguntung ke semua pemegai share iya. Rintai nama kompeni-kompeni sida Taib sebilik ti bulih penguntung ari kontrak-kontrak ari CMS baka dalam repot sida ti dikeluarka dalam 2002 tau bendar ngasuh kitai tekenyit. Ari rintai nama nya kitai tau beratika kenyau ari taun-taun dulu ari nya RM35 juta penyampau dagang udah dikereja nengah lebih 20 iti kompeni enggi sida Taib sebilik.
Kompeni-kompeni nya, mayuh agi nya endang kompeni ti suah dipasukka baru, nyengkaum: Achi Jaya Industries Sdn Bhd, Achi Jaya Holdings Sdn Bhd, Satria Realty, Asterix Incorporated Sdn Bhd, Insurepo Sdn Bhd, Wisma Printing Sdn Bhd, Sarawati Sdn Bhd, Centigrade Resources Sdn Bhd, Grogrow Sdn Bhd, Trans Dimension Sdn Bhd, Duta Bistari Sdn Bhd, Alpha Jelita Sdn bhd, Alpha Mantra Sdn Bhd, Alpha Wira Sdn Bhd, Mylink Communications Sdn Bhd, Bormill Line Sdn Bhd, Lanco Shipping Sdn Bhd, Hager Elektronik Sdn Bhd, Automobili Sdn Bhd, Bank Utama Bhd. Kompeni-kompeni nya bejalaika pengawa ngarika CMS nyengkaum sewa rumah, sewa tanah, pejalai kapal, pejalai perengka pengangkut, dagang minyak, pengawa nyelak, dagang rama, insurans, radio, computer enggau miki kerita!
Sida sebilik ti bekaul dalam kompeni-kompeni nya nyengkaum bala anak iya Sulaiman enggau Abu Bekir, bala menyadi iya Onn Mahmud, Tufail Mahmud, Arip Mahmud, Zaleha Mahmud, Fredahanam Mahmud, Ibrahim Mahmud, Raziah Mahmud (enggau laki iya Robert Geneid) enggau sida sebilik ke bukai.