Gerempung ti ngemataka pejalai media berita di UK, baru udah ngeluarka penerang ti madahka sida diatu belabuh bejalaika pansik ba pengawa FBC Media sereta enggau kaul kompeni media nya enggau perintah menua Malaysia, menua Sarawak enggau menua-menua bukai ti bisi dibalut penanggul dikeruga tuai-tuai perintah sida empu. Jaku gerah nya dikeluarka berebak enggau pengamat penerang ari Opis menua Luar Britain ti madahka sida bejalaika pansik ba penyalah ngelesapka duit ti dikereja Taib enggau pengeraja Taib di menua tasik.
Ofcom ukai semina ngemataka gerempung berita BBC World ti kala ngeluarka report pasal skandal nya, tang sida mega ngemataka pejalai pengawa gerempung berita CNBC enggau CNN ari menua Amerika di menua Eropa, ti udah buya ngaga kaul enggau FBC Media ti betempaka berita.
Kompeni suratkabar UK ti ngatika diri nya udah ngerandang jalai ngatur pansik bekaul enggau penyalah makai suap dalam gerempung media ti nyerumba penyalah nengkilaka randau orang nengah arus telefon. Program ti sama mega ngena peluang nyerang tuai penyakal di Malaysia, Anwar Ibrahim, ti digaga baka ‘ekstrimis’ Muslim ti sebaka enggau pengawa rakyat menua Ejip angkat ngelaban perintah kukut besi Mubarak.
Diatu Mubarak enggau Najib sama bela udah ditemu ngaga kaul belalai enggau FBC Media. Nambahka nya, Mubarak ti udah diburu ari menua iya empu nya, semua pengaya ti disimpan iya di menua tasik udah dibekuka magang, laban penatai pengaya iya nya endang ari duit rakyat iya empu.
Menua Britain deka mansik pengeraja Taib Mahmud
Menteri Pekara Luar UK udah diberi tanggungpengawa ngemataka pejalai atur perintah Malaysia, Jeremy Browne, diatu udah nyain sepuchuk surat tanda besetuju ke peminta Bruno Manser Foundation enggau Sarawak Report ti madahka perintah UK deka mansik semua pengeraja Taib Mahmud. Diatu menua Britain madahka diri deka bejalaika pansik enggau perintah-perintah Germany, Switzerland enggau Kanada, ti endur sida madahka diri deka meresa semua macham puku enggau pengeraja Kepala Menteri Sarawak ti disimpan di menua sida. Taib mega udah ditemu melanja bejuta-juta ringgit dikena iya meresi nama diri empu ngena chara makai suap enggau ngena berita ti ditempa.