Bantah ngagai pengawa deka ngaga tekat hidro elektrik Baram ngena chara undang-undang bisi ngayanka pemujur. Laban pengawa ti deka ngaga tekat nya deka ngeruga enggau ngerusak rampa menua di endur nya. Enti Taib mengkang majak enggau perambu iya, tu tentu deka nanggul pengawa bepilihbesai parlimen ti deka datai.
Orang tuai nya arapka diri ulih nyeliahka semua bantah enggau jaku tanya orang pasal pekara nya enggau nyebut projek nya “diketuka dulu”!
Tang anang kena kemula
Tang anang kita ngumbai pekara tu padam baka nya aja. Taib enggau bala kaban iya endang ngembuan chara ti enda manah. Sida iya nemu, enti langgur nya dipajakka sida, BN deka alah mayuh kerusi ba pelilih menua nya laban pengering raban penyakal diatu nyau betambah.
Nunda ke penemu sida iya enti BN ulih menang dalam pengawa ngundi ti ka diatur tu ila nya baru sida bisi timpuh lima taun ti chukup bejalaika perambu pengawa sida ke SCORE. Projek tekat Baram mega lalu dipajakka sida.
Ba maya kempen pengawa ngundi tu ila Taib patut ditanya nama kebuah projek hidro Baram enda DIBATAL terus tang semina ditangguh dulu!
Ke semua 20,000 iku bansa Kenyah, Kelabit enggau Penan ti dituntung penusah ketegal projek tekat nya patut angkat ngelaban. Sida udah bisi penerang Taib endang udah besedia bendar deka muru sida ari menua sida empu (tambah mega semua kayu kampung udah ditebang Taib dulu).
Orang tuai nya endang enda ulih dikarapka agi taja pan sida dipilih nembiak sida empu ngena chara undi. Tang sekeda tuai raban bansa agi mengkang nyukung iya. Tang Taib diatu udah nukar tuai-tuai raban bansa (i.e. tuai rumah, tuai kampung) ari ikas ti dipilih nembiak diri empu, ngagai ikas ke dipaduka perintah lalu dibayar gaji – diatu sida ke tuai-tuai nya nyau nyebut utai nitih ke penemu iya, enti enda baka nya, sida tebuai ari pengawa sida ke nyadi tuai ke raban sida.
Bala sida di Baram patut bechunto ke penusah ti udah nuntung bansa asal di Bakun, ti udah disemayaka pengawa ti meruan, pengaya, pengelantang enggau penyamai dalam pengidup, enggau pengidup ti baru ke ganti rampa menua sida ti udah dirusak ‘pemansang’.
Tang sida nya udah dipindah lalu dientapka pendiau di Sungai Asap, ti endur mayuh bendar sida napi pengidup ti enda tentu, kurang perengka pelajar enggau pengerai.
Sida mega disemayaka bekal ai beresi enggau kuasa elektrik ti pechuma ari tekat hidro Bakun nya, tang diatu janji nya bula. Mayuh bendar orang di kandang endur nya udah diputuska bekal ai enggau elektrik sida ketegal enda ulih mayar bil bulan, ke endang betanggulka sida enda meruan bekereja baka ti udah disemayaka.
Tekat hidro Baleh mega deka naggul beribu-ribu iku orang di sekayu Batang Baleh nya. Tang perambu ti deka ngaga tekat nya tentu deka nanggul juluk ati PBB deka menang ba pengawa bepilihbesai ba maya ti deka datai ila.
Baka ti udah dikelala, nadai siti tekat hidro nya meri penguntung ngagai bala orang ti udah dikeruga rampa menua, lalu menua tu endang udah bisi chukup bekal kuasa elektrik udah tekan hidro Bakun tembu digaga.
Taib is judge and jury of his own projects
Taib nya nyadi penentu ke projek-projek diperambu iya empu
Taib diatu dipeda baka ti nyadi orang ti endang nentuka sebarang projek ti deka dikereja iya. Juluk ati iya deka ngulihka duit turu RM66 billion dikena iya bejalaika projek SCORE iya. Udah ga iya nyadi Kepala Menteri, iya mega madu ke diri empu nyadi Menteri Pekara Belanja enggau Pengeraja Asal. Iya mega madu ke diri nyadi Pengerusi ba Jawatankuasa Pengeraja Asal enggau Rampa Menua, ti endang bejalaika tanggungpengawa ngemendarka Environmental Impact Assessment ba semua perambu projek ti dipunka iya empu!
Juluk ati Taib endang deka ngaga menua Sarawak tu nyadi sebengkah injin duit ke iya empu aja. Iya udah betebang lalu ngelitika semua rampa kampung bungas dikena iya numbuhka kebun sawit bedandang besai. Diatu iya deka ngubah semua batang sungai ti udah kamah nya nyadi pun kuasa elektrik.
Taib endang nemu mayuh menua di dunya tu begunaka kuasa elektrik ti besai dikena ngelelaka besi aluminium, lalu pengawa nya enda agi dikerinduka menua bukai ketegal pemalat kamah enggau tau nganu nyawa mensia mayuh. Taib enda ibuhka penanggul nya. Iya majak begigaka menua-menua luar ti deka beranakka puku datai ke menua tu lalu pengawa nya deka ngamahka menua tu.
Diatu, mayuh bala orang di pelilih menua Mukah udah dituntung penanggul ba pengerai ti datai ari kilang aluminium nya. Orang bukai di Sarawak patut berunding dalam, sekali ke agi ngasuh Taib nya neruska juluk ati iya ngulihka pengeraja ke iya empu lalu mai pengerusak ke rampa menua tu enggau mensia mayuh ti nguan menua tu.