Ba minggu nyin kemari Ta Ann udah nuduh The Green Party di Tasmania ketegal ngayanka iklan ti bula pasal pengawa ngulihka kayu kampung di menua Sarawak.
Tang diatu iklan-iklan barang ari “eco-wood” enggi Ta Ann di Tasmania bisi udah disakal kompeni nya empu.
Ba sebengkah repot, ti dikeluarka palan Huon Valley Environment di Tasmania, Ta Ann udah dikumbai ngeluluka diri manah. Lebih 50 lambar surat repot ngayanka penerang baka ni Ta Ann ngaga pemutus penemu sida deka beranakka puku di Tasmania, ngumbai diri nebang kayu kampung tanam, tang udah nya ditemu ngemulaka bala orang ti meli barang ari kayu sida.
Nama kebuah Tasmania?
Lebuh kepala kompeni Ta Ann, Hamed Sepawi empu udah ngaku dalam taun 2006, Sarawak udah nadai agi kayu kampung ti berega ketegal ditebang enggau nadai atur ti meruan dalam pengelama 30 taun, ari asuh Kepala Menteri ti mega petunggal iya empu.
Australia udah nerima puji ti kurang ketegal ngulihka kayu kampung tanam, ukai baka Sarawak ti ngereja kampung enggau nadai atur, lalu ngujung ke pengerusak rampa kampung Borneo.
And NO plantation wood is being used by Ta Ann in its veneer processing mills in Tasmania.
Perening ba Tasmania ti nyadika penatai kayu ke kompeni Ta Ann bisi ngasuh sekeda orang irau enggau alit ati. Ari pansik ti dipejalaika, semua kayu ti ditebang Ta Ann nya ukai kayu kampung tanam, tang endang kayu ari kampung dara Tasmania. Mayuh bendar rampa kampung enggau pengenduh jelu sida enggau burung udah dirusak, nyengkaum pendiau menaul Wedged Tail, jelu Tasmanian Devil, The Quoll, enggau ti bukai. Lalu nadai sebatang kayu tanam udah dikena Ta Ann ngeluarka papan lapis.
Bula!
Ta Ann ditemu bula ti endur sida madahka diri nebang kayu kampung tanam.
Sepawi bisi didinga mansutka jaku ngagai suratberita, The Examiner, ti endur iya madahka kompeni iya endang nebang kayu kampung tanam. Iya mega ngaku nebang kayu kampung tanam ba laman web sida empu.
Bala pengkritik rampa menua endang seruran madahka penerang ari kompeni nya penerang ti bula. Nadai pengamat. Kaban parlimen ari Green Party Paul O’Halloran meri penerang ngagai Sarawak Report, ngereja kayu kampung tanam besai agi ungkus ari ti nebang kayu kampung bungas, laban kayu nya ditanam, lalu kayu ari kampung bungas nya diulihka sechara ‘pechuma’.
Paul pechaya bendar nama kebuah Ta Ann keran bendar deka ngulihka kayu kampung bungas Tasmania, ari ti nebang kayu kampung tanam baka ti disemaya sida lebuh sida masuk ke Tasmania dalam taun 2006 suba.
Lebuh ti nimbal sereta nyakal jaku tuduh nya, dia Pengarah kompeni Ta Ann, David Ridley, madah ngagai Sarawak Report, kompeni Ta Ann enda kala nebang kayu kampung bungas, laban pemesai batang kayu ari kampung bungas nya kelalu besai ke perengka sida.
David Ridley besemaya deka meri penerang tang datai ke diatu lalu nadai. Pansik Sarawak Report bisi nemu kandang endur kampung puang ti ditebang Ta Ann endang ngeruga kayu ti besai-besai dikena sida ngulihka kayu ti mit-mit, munyi ku jaku sida tadi. Kayu puda ti diambi Ta Ann nya udah beumur lebih seratus taun.
Pengawa Dagang Taib
Penerang ti dipansutka Ta Ann nyebut pasal sebengkah pekara, tang sida ngereja pekara ti bukai, dikena sida mujur bedagang enggau menua Jepun. Sida udah ngena leka jaku “eco-wood” dikena sida narit bala penguna di Jepun. Bulih 90% ari kayu Tasmania dijual ke menua Jepun.
Iklan-iklan di menua Jepun
Kami bisi siti jaku tanya, sapa ti patut dipesalahka udah iklan-iklan pasal kayu kampung tanam ti dijual ke menua Jepun nya ditemu ditebang ari kampung bungas?
Sebengkah sempekat entara perintah nengeri enggau perintah besai baru udah tembu ditanggam ti endur laluh kampung di Tasmania deka dipampas ketegal ngawakka 430,000 hektar kampung ti deka digalau.
Sempekat entara dua bengkah perintah nya nagang kayu kampung ditebang seagi-agi bayar pampas bedau tembu dibayar. Taja pan baka nya, Opis Kampung Tasmania udah enda ibuhka tagang dalam sempekat nya, laban deka ngulihka penguntung ari kontrak enggau Ta Ann!
Ta Ann udah dikemendarka ngulihka kayu kampung ari Opis Kampung Tasmania nyentuk ngagai taun 2027 lalu sida mengkang deka ngelanjarka timpuh nya ngagai 2047 (nama kebuah deka badu nebang kayu enti kayu kampung bungas nya murah agi ditebang?). Nya alai, Opis Kampung Tasmania majak nebang kayu kampung taja pan orang mayuh ngumbai kampung sida iya meruan dijaga.
Diatu kompeni-kompeni Jepun ti meli kayu ari menua Tasmania patut ngelala. Laban, enti kayu nya endang amat-amat “eco-wood”, bala penguna kayu nya patut diterangka. Iya ke bendar, mar bendar deka ngiga kayu kampung tanam ari ti nebang kayu ba kampung tuai, ti endang lama udah dikereja Ta Ann Tasmania.