Kevin Rudd, Menteri Besai Australia ke dulu suba ti diatu mangku pengawa nyadi Menteri Pekara Luar bisi ngeluarka sebengkah penerang ti positif ngagai pinta kami ngasuh perintah iya mansik pengeraja Taib sebilik di menua nya.
Dalam sepuchuk surat ti diterima iya kemari, sehari udah bekau Sarawak Report ngeluarka peminta sida, Rudd ngamatka pasal bantah ba pengeraja Taib udah dianjung ngagai opis Attorney General menua Australia ngambika diperundingka.
Pansik di Australia nya neladan sebengkah tindak ti dikereja perintah menua Swiss enggau Germany. Opis Penagang Penyalah Makai Suap (MACC) di Malaysia empu mega udah netapka udah belabuh mansik ulah enggau pendiau Kepala Menteri nya.
Taib udah ngena enggau penuh kuasa iya atas sebengkah nengeri ti pemadu kaya di Malaysia ari segi isi pengeraja asal dalam pengelama 30 taun ke udah, nguasa semua opis menteri ti besai guna, lalu ngena semua pemendar enggau lisin ke guna iya empu. Diatu gerempung Tabung Bruno Manser udah minta semua perintah di serata dunya tu meresa serta mansik pengeraja Taib enggau sida sebilik.
Penyarut Politik
Taja pan baka nya, penanggul bisi udah nyadi di Hobart beberapa hari ke udah, ti endur siti ari pengeraja Taib bisi udah ditemu. Dua buah kilang kayu enggi Ta Ann Tasmania ti diempu Ta Ann Sdn Bhd. Pengerusi Eksekutif kompeni nya, Hamed Sepawi nya petunggal Taib ti mega pengemata pengawa dagang Taib.
Bala penyukung kompeni Ta Ann di Australia udah mansutka jaku bantah sida ketegal kompeni nya ti dituduh mai pengerusak ke rampa menua di Sarawak empu, lalu ngumbai Ta Ann endang nadai bekaul enggau penanggul ke baka nya atas rampa kampung ti endur sida ngulihka kayu kampung.
Kemari, Bryan Green, Sapit Menteri Besai Tasmania, bisi udah mangkit isu dalam parlimen ti endur iya madahka jaku ari penyunting Sarawak Report di Hobart enggau Launceton, ti ngenang pasal Ta Ann endang nadai ngeruga rampa kampung puang di Sarawak.
Taja pan munyi nya, Sapit Menteri Besai nya udah ngayanka pengurang penemu iya ba isu ti nuntung menua Sarawak, lebuh iya madahka gambar siku bansa Penan enggau sebuah lori kayu batang nadai bekaul enggau Sarawak, tang ba sebengkah endur ti benama Shin Yang!
Sarawak Report ulih netapka gambar nya endang diambi di menua Sarawak lalu Shin Yang nya nama sebengkah kompeni kayu batang lalu ukai nama endur. Kedua-dua Ta Ann enggau Shin Yang nya sama kompeni ti ngulihka kayu kampung enggau muka kebun bedandang besai ti udah mujur betebangka bebilion-bilion ringgit rega kayu kampung ari menua Sarawak enggau tanah-tanah bansa asal.
Bedau lama ke udah, Hamed Sepawi, kepala kompeni Ta Ann, bisi kala didinga madahka semina mimit aja rampa kampung puang ke agi tinggal di Sarawak, lalu kampung puang nya udah mega kala ditebang lebih ari sekali. Tu mih kebuah iya lalu ngerembaika pengawa ngiga kampung puang ke menua Tasmania.
Ta Ann empu udah ngemunka penyarut isu tu enggau chara mantah iklan ti bekaul enggau isu tu.
Nimbal bantah Ta Ann, Senator Bob Brown, kepala Parti Green menua Australia, ti mega nyadi pengari ke menua Tasmania, bisi madahka bala pemberita, gambar ti diayanka nya meri gambar ti betul lalu ulih nyadi ke pengamat penanggul di Sarawak dituntung pengawa ngulihka kayu kampung.
Penerang pasal pemalat penyalah makai suap di Sarawak enggau kaul diri sebilik Hamed Sepawi enggau Taib udah makin diasaika lalu ngirauka ati orang di Australia. Ku penemu senator nya, iya deka meri notis ngagai kompeni nya, lalu pengawa ngulihka kayu kampung ti dikereja kompeni nya di menua Australia, deka diperatika.