Lebuh Najib ngerah raban polis iya nyerang beribu-ribu iku orang ti enda besenyata ti bejalai bebala mayuh tauka begempuru minta perintah madamka pengawa makai suap maya bepilih-besai ba ujung minggu tu tadi, ulih tauka enda iya belaba ke penampak nama iya deka dituntung malu ba mua orang mayuh ba ikas entarabansa?
Belanja ti mayuh udah dikena ngaga kaul, randau enggau media bechelak enggau TV diatu udah puntan laban mayuh gambar enggau video ke bukai ngayanka baka ni chara perintah BN udah ngenanka nama sida udah ti 50 taun merintah nyadika sebengkah rejim ti pemadu lama dibandingka enggau rejim-rejim bukai di dunya tu.
Perintah bedemokrasi ti bendar enda beserangka rakyat iya empu ti begelumu deka mansutka penemu sida. Sida enda deka ngena meriam ai tauka gas pemedi mata, pengasar polis tauka soldadu, peluru getah tauka kayu belantan. Bala penerit adat sida enda kasar enggau orang indu lalu sida enda mansutka jaku kasar tauka jaku kamah, tauka peneka ati nangkap sebarang orang ti ngena baju kuning.
Najib udah ngayanka pemesai kuasa diri lalu nunjukka iya empu nya siku tuai perintah ti enggai dibai berundingka chara mutarka penyalah makai suap ba pengawa bepilih-besai. Iya mega dipeda sebaka enggau bala dictator ke bukai ari Timur Tengah ti udah kala dibuai bala rakyat sida empu, baka Marcos enggau Suharto.
Temuai ti malu
Pengawa orang ti begempuru di London nya udah ngemalu Najib ba mua Menteri Besai Britain enggau Ratu England. Sida iya udah diterangka pasal BN ti udah kelalu lama merintah lalu rakyat Malaysia ti kala mantah perintah sida selalu nerima ukum ti berat-berat lalu nadai tau diarika sebarang lawyer. Diatu sapa-sapa ari rakyat iya ti ngena baju kuning mega lalu minta enggau basa madamka penyalah makai suap dalam sistem bepilih-besai deka dikumbai munsuh menua.
Cherita pasal skandal Rupert Murdoch makai suap dalam media di Britain endang tau bendar ngasuh bala tuai-tuai di Britain berasai malu, tang nyambut penemuai Najib ke Britain mega enda ngelantangka ati sida tuai-tuai di menua nya.
Sehari tu bala orang bisi begempuru ba luar Downing Street, ti endur Najib dijangka deka dijamu merarau begulai enggau Menteri Besai UK, tentu deka ngasuh ati bala temuai ti bejalai mansa endur nya enda lantang ati.
Polis menua UK enggai meri sukung ke BN
Bala orang ti begempuru ba endur nya madahka sida enggai mindah ari endur nya lalu sida mega ringat ngagai perintah BN, lalu polis UK mega enda ulih ngaga apa-apa dikena madamka pengeringat ati bala orang ti begempuru dia.
Ke bendar bala poilis Westminter udah nerangka ngagai bala orang ti begempuru dia sida suah bendar dipinta Opis Duta Malaysia di London, pasal penerang-penerang dini endur pengawa orang ti begempuru deka diatur lalu sapa ti ngatur iya. Bisi udah ditemu sekeda raban orang di Malaysia minta polis Britain nagang pengawa orang ti begempuru nya!
Taja baka nya, menua UK nya sebengkah menua ti nadai nagang sapa-sapa orang ti deka mansutka penemu diri pasal perintah sida, lalu polis UK udah madahka Najib sida enggai bekasar enggau sapa-sapa, ketegal ti deka ‘nutup malu bala temuai ti dibasa’ ari Malaysia nya, ti kala kasar ba rakyat iya empu di menua iya di Malaysia.
Pengawa begempuru nya udah mujur bendar diatur enggau nadai penganggul lalu penuh enggau basa di nengeri London, lalu udah tu ila, deka mayuh agi pengawa begempuru semanjai penemuai Najib ke menua UK nya.