‘PENAMPAK’ TAIB DI TASMANIA
Beberapa iti ripot diatu udah dikeluarka ti nunjukka menua Australia diatu udah mereti bendarka ke ulah enggau pendiau Abdul Taib Mahmud ari menua Sarawak.
Ripot-ripot enggau sekeda klip video ba TV bisi udah ngayanka pengawa kasar ti dikereja bala tukang tumbang ti bisi datai lalu ngachau sebengkah aum ti diatur ba sebengkah palan mensia mayuh di nengeri Huonville, Tasmania, nya ngayanka sekeda ari bukti ke pengawa-pengawa ti enda ngelantangka ati.
http://www.abc.net.au/news/stories/2011/05/20/3222344.htm
Aum nya udah diatur seraban orang asal ba menua nya ti rinduka pemanah rampa menua, ti berasai enda lantang ati ketegal pengawa orang ngeruga kampung di kandang menua sida dia. Keruga nya dipejalaika kompeni Ta Ann enggi sida Abdul Taib Mahmud sebilik. Bala tukang tumbang kompeni nya diripot bisi ngereja pengasar lalu mansutka jaku kamah ngagai bala orang ti benung baum dia, lalu nambahka nya siku ari speaker indu udah disembur enggau jaku emba deka dipasung bala tukang tumbang.
Ba raban orang indu ti diau di menua pesisir di Sarawak tentu ulih meri penerang ti betul pasal penusah enti sida ninga jaku emba pasung nya. Bisi mayuh bendar ripot enggau serebana ngagai polis ti bekaul enggau kes masung orang indu udah dikenataika bala orang indu enggau nembiak indu ti benung besekula, ti kala dikeruga bala tukang tumbang, tang semina bala ari raban NGO aja ti deka kiruh mansik penusah nya. Abdul Taib Mahmud endang seruran nagang sebarang pengawa ti deka mansik tauka nyidi penyalah masung orang indu di menua Sarawak tu.
Baka ti kala didinga bala orang di Sarawak, emba, tauka jaku emba endang sebengkah chara ti suah dikereja bala tukang tumbang, ti bulih lisin ari Abdul Taib Mahmud, ba orang asal enggau raban orang ti empu tanah NCR. Penakut ke bala samseng ti endang diupah kompeni-kompeni kayu mayuh bendar udah nyadi di serata menua Sarawak.
Kami udah kala mansutka mayuh penerang ti ngayanka baka ni bala samseng nya tama lalu ngereja pengawa salah sida , ti endur sida nyerang orang ti empu menua, ngena kayu, duku, bom enggau senapang. Ripot suah agi ti enda dikibuhka bala polis enggau penerit undang-undang, laban sida nya endang ditagang ari asuh Abdul Taib Mahmud. Kepala Menteri, ti mega Menteri Pekara Belanja Menua, Menteri Perambu enggau Pengeraja Asal, ti mega Kepala Perbadanan Kemajuan Industri Pembalakan Sarawak, endang bulih penguntung ti mayuh bendar ari ti enchabut asil dagang kayu kampung di menua Sarawak tu sekumbang 30 taun tu udah.
Kompeni-kompeni ti endang ditumbuhka lalu nyadi kaya di menua Sarawak diatu ngerembaika pengawa sida ti ngulihka kayu ngagai menua bukai. Sida tu udah enggau naka ulih tama ngagai kampung di Indonesia, Papua, Gugus Pulau Solomon, Congo, Amazon lalu diatu, Tasmania.
Nambahka nya, bala pemayar chukai di menua Australia enda nemu diri dibai menua sida ngagihka belanja $10,000 dikena menua nya ngaga gudang dikena ngeluarka ramu sayat ba pulau nya. Sapa empu penemu nya? Kompeni Ta Ann ti dipejalaika Hamid Sepawi, iya nya petunggal lalu pia mega proksi dagang Taib empu, ti udah kala dipasukka nama dalam rintai raban orang ti pengabis kaya di Malaysia. Nama kebuah bala pemayar chukai di Tasmania dipinta melanja Hamid Sepawi ti tama menua nya lalu nebang kayu, laban ketegal semua kayu di Sarawak diatu udah majak pupus?
Lebuh raban orang ari upis kayu kampung Tasmania bejalaika pansik sida ba keberterusan enggau ba rekod-rekod pengawa ngulihka kayu ti dikereja sida Taib nya sebilik, kala tauka enda sida meresa empas pengawa ngulihka kayu kampung nya ngagai rampa menua di Sarawak? Kami benung numpuka tinjau kami ba siku orang ti udah 30 taun tu ngerusak kandang rampa menua di Sarawak tu (iya nya sebengkah kandang rampa menua ti enda kurang ari 130 juta taun penuai).
Tuju ti bendar Abdul Taib Mahmud nganjung kompeni-kompeni kayu iya ke menua Tasmania nya laban, dalam pengelama 30 taun, iya udah mujur bendar ngemunaska rampa menua ti pemadu besai di dunya tu. Sarawak diatu nyau udah nadai agi kayu kampung ti berega tinggi.
Bala pemacha enda dipinta bepanggai ba berita dalam Sarawak Report tu aja, tang patut ngambi sebengkah petisyen taun 2006 dikena minta lisin nanam kayu kampung baka ti kala ditulis Hamid Sepawi empu, ti ngarika kompeni Ta Ann! Dalam petisyen iya nya Hamid udah didinga mansutka penerang
“ke tebal agi rampa kampung di menua Sarawak udah kala ditebang lebih ari sekali” [Hamid Sepawi, 2006]
Bala orang di Tasmania bisi hak angkat ngelaban
Sebengkah pekara ti belabuh muka mata kitai iya nya pengerembai pengawa orang ti angkat ngelaban pengawa ngulihka kayu kampung di menua Tasmania. Bala orang di serata dunya mega bisi mansutka pengirau ati sida ba penanggul ti datai ari pengusut kandang rampa menua ti bekampung, lalu kompeni-kompeni enggi sida Taib sebilik nya ti seruran bulih kontrak ari pengawa ngulihka kayu enggau chara ti enda besekat nya.
Bala orang Tasmania ti ngayanka pengeringat diri udah enda dikibuhka bala pemesai di menua nya empu. Raban sida nya udah ditangkap ketegal ti mantah pengawa Ta Ann ba kandang endur sida, taja pan ba menua bukai, pengawa ti ngayanka pengeringat diri nya endang dikemendarka.
Orang di menua Tasmania nya empu patut bisi hak ngenanka rampa menua sida empu ari ti dikeruga orang bukai ti tama kia.
Semina beberapa bengkah raban orang aja ti ngumbai kampung di menua Tasmania nya tau ditebang dikena ngulihka penguntung. Enggau nya, baka ni ku sida tau bulih penguntung ba timpuh ti enda lama lebuh maya kampung nyau udah abis? Baka ni ku endur-endur bukai di Australia enggau kandang endur pengawa gudang tau bulih penguntung enti rampa kampung udah abis ditebang?
Semua raban orang ti bekuasa endang nemu, kitai enda tau enda bejalaika atur keberterusan lebuh kitai ngatur pengeraja asal menua diri empu dikena kitai nentuka mensia deka terus idup lantang ba dunya tu. Tang semina raban orang ti rangka ngulihka pengaya enggau chara ti jampat nya, lalu enda ibuhka pengelantang orang bukai tauka raban rebak dudi hari ila, ti ngembuan penemu besibil ari penemu tu.
Enggau nya, bala raban orang ti rindu ke pemanah rampa menua enggau raban orang ti deka ngayanka pengeringat diri nya patut dikemendarka ngayanka diri ringat, enggau chara ti enda kasar, lalu enda besekat.
Raban orang ti baka tu mega patut dikemendarka mansutka jaku bantah sida ngagai bala pemerintah di Tasmania, ti udah ngemendarka Sultan Kayu Kampung ari Sarawak tu tama lalu ngeruga rampa menua sida.