MIRACLE HARVEST MAI PENGUNTONG ‘AJIH’ SOH RAZIAH ENGGAU ROBERT!

Kompeni Miracle Harvest S/B ti enggi Raziah Mahmud enggau laki ketiga iya, Robert Geneid endang ditemu mai untong baka ti diajih ke. Penguntong ti ajih nya ngalit ke ati kitai, laban kompeni nya endang bedau direjista tang udah tau bejalai ke pengawa, munyi ko penerang ari opis Pengerejista Kompeni-kompeni Malaysia!

Sebaka enggau kompeni-kompeni tanah ti bukai enggi Raziah, Miracle Harvest, ti dikorporat ke kena 15hb Jun 2005, endang bepalan ngena alamat opis kompeni indu Kumpulan Parabena S/B. Kumpulan Parabena nya dikemata ke sida Geneid sebilik lalu kami ulih madah ke ditu, Kepala Menteri bisi megai share iya nengah kompeni Mesti Bersatu. Nitih ke pansik-pansik kami ba atas pala-pala tanah ti udah diserah ke ngagai maioh kompeni ti bepalan ba alamat nya, pemesai semoa tanah enti dipegulai ke nya jauh besai ari pulau Singapura!

Rekod-rekod kompeni

Ba kes enggi sida Miracle Harvest, pemendar bekereja udah diberi opis Pengerejista Tanah ba tanah ti 12,000 hektar pemesai dikena numboh ke kebun sawit bedandang besai, semina tiga minggu sebedau kompeni nya di korporat ke! Pala tanah ti diberi soh sebuah kompeni ti endang apin didudok ke!

Nya alai, ulih enda kitai ngasai ke bisi Jari Tuhan benong bekereja di belakang pemansang ti ngasoh kitai alit ati tu, tau ke nyangka nya Taib Mahmud ti nyadi Pengerusi ba Land Custody and Development Agency (LCDA)? LCDA udah ngambi tanah-tanah NCR ngena nama Perintah Menoa lalu udah nya nyerah ke tanah-tanah nya soh sida Taib sebilik ke lebih agi soh menyadi iya, Raziah enggau anak iya, Mahmud Abu Bekir Taib, enggau sida sebilik ke bukai.

Rekod-rekod ti bisi dipegai opis Pengerejista Tanah

Ba kompeni Miracle Harvest, nama Robert Geneid (laki Raziah Mahmud) ditulis ke nyadi orang ti tau endor betanya bekaul enggau pala-pala tanah ti disimpan opis Pengerejista Tanah. Iya mega udah ngengkah ke alamat enggau lumor telefon opis iya, ti sama bepalan ba alamat opis Kumpulan Parabena di Kuching, ti mega terang bendar ngayan ke Kepala Menteri nya endang bisi megai share ti pengambis besai dalam kompeni Kumpulan Parabena.

Premium ti dibayar mimit reti nya penguntong ti mimit pulai ngagai asil menoa

Pansik-pansik kami bisi nemu tanah-tanah ti diserah ke soh kompeni Miracle Harvest endang berega murah, tang udah tanah-tanah nya dijual baru rega tanah nya nyadi tinggi. Bisi 11 iti lot ti diserah ke soh Miracle Harvest enggau sebuah da agi kompeni enggi sida Geneid sebilik, Green Ace Resources, semina dalam sari aja (iya nya kena 25.5.2005). Semoa tanah nya bulih 20,000 hektar pemesai diserah ke enggau rega RM15 juta aja. Tanah-tanah nya tadi lalu ditanda “OPL” – “Oil Plantation” (tanah dikena ngebun sawit).

Premium ti murah reti nya penguntong ti mimit pulai ngagai tabung bala pemayar chukai menoa tu, tang meri penguntong ti maioh bendar soh sida Taib Mahmud sebilik. Bisi mega maya sida Taib sebilik enda dipinta mayar sebarang premium ba maya nyerah ke tanah-tanah nya – lalu nitih ke penerang ari orang dalam ti madah ke premium nya semina deka dibayar enggau chara pupok, tau ke dibayar udah tanah nya ulih jual.

Tang tanah-tanah nya terus bepindah ari pegai sida Taib Mahmud sebilik. Ba taun 2006 sebuah kompeni awam kebun sawit bedandang besai, Kwants untuk ngeluar ke penerang ti madah ke sida bisi megai 70% share dalam Miracle Harvest, lalu mega megai 70% share dalam Green Ace Resources, ke dua-dua kompeni ti bepalan ngena alamat kompeni Kumpulan Parabena. Ba sebengkah tanggam sempekat dia Green Ace Resources udah nerima siti kandang endor ti bulih 7,000 hektar pemesai di pelilih menoa Mukah, ba sebuah kandang Kampong Galau Sungai Narub ba hari ti sama dalam taun 2005 ti endor Miracle Harvest lalu bulih pala ke semoa tanah nya dia

Kwantas bisi ngeluar ke penerang iya udah mayar RM17 juta ke bagi 70% share iya soh dua buah kompeni nya tadi, lalu premium asal ke semoa tanah dulu udah dipinta ari Parabena nya kira-kira RM15 juta.

Sarawak Report deka nanya, soh sapa meh Kwantas mayar duit dikena ngulih ke tanah-tanah nya beberapa bulan udah Miracle Harvest bulih pala tanah nya? Udah enda kini bayar nya diberi soh Miracle Harvest taja pan kompeni nya apin direjista, nitih ke penerang ari opis Pengerejista Kompeni-kompeni? Kami mega deka nemu nama kebuah kompeni Miracle Harvest agi mengkang bepalan ba alamat Kumpulan Parabena ti diari ke Robert Geneid, taja pan kompeni Kwantas udah bulih semoa share dia.

Ke dijual!

Diatu kami ulih ngayan ke kompeni Kwantas nya udah belaboh ngelepas ke pegai iya ba pala-pala tanah nya ti tau meri kitai gambar rega pasaran ti bendar ke tanah-tanah nya! Ba pun iya Perintah Menoa Sarawak semina nerima RM5 juta ke bayar 7,000 hektar ti diserah ke soh Green Ace Resources, tang ba ujong bulan sigi nyin kemari Kwantas udah ngaga pemutus nyual 70% share sida ngena rega RM32 juta! Tu mega tau meri reti ngagai kitai 30% share ti dipegai sida Geneid sebilik nya sebaka enggau setengah ari rega nya tadi – rega ti sebaka dibayar ke semoa 20,000 hektar portfolio reta-tengkira ti diserah soh sida ulih menyadi Raziah ti mega pangan dagang iya, iya nya Kepala Menteri Taib mahmud, dalam taun 2005.

Tanah-tanah NCR?

Perkara ti ngirau ke ati kitai iya nya ikas tanah nya. Nitih ke penerang ari Kwantas, semoa pala tanah nya ba ikas sementara aja. Reti nya tanggam sempekat enda tau enda dipejalai ke sebedau tanah tau dikereja.

Baka ti suah dikereja ngelama tu, pekara bekaul enggau ‘ikas sementara’ lisin-lisin enda dikiboh ke di menoa Sarawak, laban kompeni-kompeni kebun sawit bedandang besai endang nadai bebasa ke tanah orang bansa asal. Laban sida udah ngasai ke udah mayar ngena rega tinggi soh Kepala Menteri, nya siti ari kebuah sida enda bebasa ke orang bansa asal ti bempu tanah dia. Ba kes mahkamah ti apin lama tu udah, tuan akim endang besalah ke perintah menoa laban udah ngeluar ke pala-pala tanah nya. Diatu berupai bendar meh kes-kes tanah majak dimenang bala orang bansa asal, lalu bala orang ti deka meli tanah-tanah ari sida Taib sebilik diatu pan nyau majak mimit-semimit!

Penanggol ti baka nya sebaka enggau penanggol ti nyadi ba Lot 1, Block 194 Oya-Dalat Land District ba Sungai Narub Mukah? Penyarut tanah NCR ti nyadi dia kini? Tau ke menoa nya sebagi ari Kampong Galau Sungai Narub? Tau ke dua-dua sekali?

Pengerusak ari “Greenwash”

Kompeni ti udah meli tanah-tanah nya benama Golden Agr Resources, sebengkah kompeni kebun sawir bedandang besai ari menoa Indonesia ti rangka, ti diempu kompeni ngulih ke kayu Sinar Mas. Golden Agri bisi udah ngeluar ke jako semaia sida deka bebasa ke pemeresi rampa menoa ba pun bulan February tu tadi, 9hb February, leboh maya sida madah ke diri badu agi betebang ke kayu kampong di menoa Indonesia. Ulih-enda kita pechaya ke jako sida Miracle Harvest enggi Raziah enggau Robert ti deka nyual tanah-tanah soh Golden Agri ti ngelulu ke diri udah nyadi pangan rampa menoa?