Leboh maia orang ulu undor ke nengeri!
Bala sida tu enda dikiboh ke penulis-penulis suratkabar ti dikemata ke perintah, lalu sida mutus ke runding enggau ati diri undor ari Ulu Baram lalu nuju KL. Sida tu ngenatai ke jako bantah sida soh perambu Taib Mahmud ti deka ngaga Tekat Baram, ti deka ngerusak rampa menoa ti besai di menoa sarawak ti deka ngujong ke maioh amat orang asal deka dientap ke baru laban diasoh ninggal ke menoa asal sida ti deka ampoh laban projek tekat ai nya.
Bala orang ti bejalai ke pengawa ngayan ke pengeringat diri nya bisi 30 iko semoa iya, nyengkaum sekeda anak mit. Bisi di entara bala sida nya udah sanggup ngeluar ke tambang diri empu ti maioh ngambi ke sida ulih ngundor ke diri ari kandang menoa Long San di emperan Baram. Siko ari pengari sida, Willie Kayan, bebansa Berawan, mansut ke penerang ti madah ke raban sida ti betuboh mimit nya undor ngari ke raban bansa sida empu.
“Bala kami tu orang ti merinsa pendiau. Kami tu ngari ke raban bansa Kenyah, Kayan, Berawan, Melayu enggau Iban. Kami sinu amat ati laban kami enda ulih nyangkong nambang ke pengari bansa Penan undor enggau kami” pia ko iya madah ke Sarawak Report.
Bala orang tu, ti udah enggau naka ulih ngenatai ke jako bantah ke luar kandang menoa sida. Sida nepan trak-trak sepengelama 8 jam nengah jalai jai enggi kompeni kayu datai ke pasar Miri, lalu udah nya nepan bilun ke Kuala Lumpur, ti endor sida bejalai dalam kandang 3 hari din, mai tambai enggau pelekat. Sida mandang ke diri ringat ba padang bilun, Chinatown enggau di sebelah tisi-tisi jalairaya lalu terus nuju ke Central Market. Bisi bala orang ti meda sida nya, tang sida nadai betemu enggau sebarang pengarang berita suratkabar.
Pengasar bala polis
Tang, baka ti endang disadang sida, raban sida ti mit nya endang udah diperati ke raban polis ari Cawangan Khas enggau bala polis ti bepekaian periman. Bisi sekali seraban pemberita ari TV Selangor (sebengkah nengeri ti dipegai parti penyakal PKR diatu) ti nguji deka ngambi gambar raban ari Baram nya udah ditagang polis tekala nya. Semoa bala raban ti ngayan ke diri ringat sereta enggau raban ari TV Selangor nya bela diburu bala polis.
“Bala mensia maioh ba Central Market bisi ngayan ke pengerindu diri deka nemu nama tuju kami datai ba endor nya, sida beambi ke gambar kami, lalu betanya ke maioh macham pekara ba kami, lalu sida mega bisi diberi kami surat-surat penerang bekaul enggau pengawa kami nya” pia ko Kayan “tang enda mukai-mukai kami dipejal diasoh mindah ari endor nya”.
Pemerani raban ti mit nya enda tau dikira pekara mudah. Tang pengawa sida nya udah nyadi ke sebengkah kelai bekaul enggau ubah ti besai udah nyadi di Sarawak. Sida nya, ngelama tu, ditemu orang baka sebengkah bansa ti malu sereta imun, diatu udah ngayan ke pengeringat diri udah bekau ti napi pemedis dalam pengidup sida bekaul enggau pengawa Taib Mahmud ti ngerampas tanah-tanah asal sida. Takat Ai baram enda diguna, lalu 12 iti da agi tekat ti baka nya udah diperambu deka digaga Taib ngena duit injau US$11 billion baka ti udah dipesetuju ke menoa China, ti mega deka nyali sida ngena pengelanding pengereja pengawa enggau raban engineer sida.
Sarawak Report bisi bendar pengarap pengawa orang ari Long San nya, ti ngayan ke diri ringat sebengkah kelai dikena ngelaban Taib. Nyentok ke diatu, Taib endang seruran majak berampas ke tanah-tanah ti besai ti endang enggi orang asal menoa iya empu dikena nambah ke pengeraja iya empu, tang projek-projek ti besai-besai baka nya dikena iya ngayan ke pengamu diri empu ti enda ulih tagang iya agi.
Udah nyadi kelalu amu – lalu ditemu orang maioh
Taib Mahmud enggau sida sebilik enggau bala kroni iya, baka ti udah ditemu orang diatu, deka bulih penguntong bebilion-bilion ringgit ari projek-projek tekat ti besai-besai nya. Nya kebuah sida majak ke diri nudok ke projek “gajah putih” ti enda diguna rakyat ti mega lalu dikena ngerusak rampa menoa di menoa Sarawak tu. Ke bendar, udah tu ila rakyat Sarawak empu enggau peturun sida ila meh orang ti deka bebendar agi ngulih ke duit lalu dichukai perintah dikena melanja projek-projek nya.
Diatu rakyat Sarawak udah majak nemu sereta mereti nama utai ti udah dikereja Taib Mahmud ba sida enggau menoa sida, ti endor pengerangka enggau pengamu Taib nyau betambah balat agi jai. “Leboh sida ti enggau aku nya datai di nengeri KL, sida alit amat ati meda rumah-rumah tinggi nyau baka ke nyulok langit” pia ko Willie Kayan. “Sida betanya ba aku, ari ni penatai duit dikena perintah niri ke rumah tinggi begembar Petronas nya?” lalu aku nyaut sida, “rumah tinggi dua buah nya dipelanja ngena duit ari menoa Sarawak, asil ari minyak enggau gas menoa Sarawak. Sekeda sida bisi berupai tusah ati sereta ringat, lalu bisi sekeda sida beambi ke gambar”
Bala sida ti udah ngayan ke pengeringat ari Baram bisi mai penerang ngagai orang di KL, tang sida mega bisi mai pulai penerang ke ngagai kaban belayan sida ti nganti pemulai sida di Baram sin. Penerang bekaul enggau baka ni Taib Mahmud udah mai pengerusak ke pengidup enggau rampa menoa sida, ti ngujong ke sida idup dalam pemerinsa, lalu enda nemu kini penunga penguntong ari asil rampa menoa sida.