ELIA GENEID NYADI KE CHUNTO ke RABAN ANemBIAK SARAWAK TI TAU NYADI KAYA ARI TI NGERAMPAS TANAH orang bukai!
[Sebengkah asil tulis ti diinjau ari majalah Asian Tatler]
Kitai maioh tu sama-sama ingin ka nyadi kaya-raja baka siku anembiak indu, Elia Abas/Geneid! Enti dipeda kitai baka nya aja, Elia baka indu ti bukai ti rindu begulu ngagai pengerami, tang leboh iya baru manggai umor 20 taun suba iya udah teulih ke ikas sosial tin tinggi sereta nama ti tampak ketegal iya ti bisi kaul enggau industri kebun bedandang besai sawit lalu ngembuan konsesi ti berega bejuta-juta ringgit!
Tang, indu ti dipeda kitai manah gamal tu nya anak menyadi Kepala Menteri Taib Mahmud, ti mega ngembuan pendiau enggau perangai (enti baka iya dipeda) ti ngalit ke ati kitai. Sida Taib sebilik endang dikelala bisi raban anembiak ti patut ditunda anembiak bukai, laban sida ngayan ke kitai chara berebut ke ‘peluang sama rata’ baka ti diberi ke sida nengah projek-projek perintah!
Leboh maya Taib bejako nyebut ngagai raban anembiak ti ngasoh sida bebendar agi bekereja awak ke ulih pansut ari tanggam pengidup merinsa, iya patut berasai gaga sereta temegah laban bala raban anak menyadi iya udah mujor amat nuju jalai ngiga pengeraja.
Elia, nuan deka lelengau ke pengerami-pengerami!
Kitai nyangka bisi berasai alit ati laban Elia ulih ngangkat ke diri empu nyadi siko indu ti kaya raja, lalu beserimbai enggau nya agi bisi endor iya begulu bebala maioh ngusung sebarang pengerami dini-dini endor, ke lebih agi begulai enggau bala pangan lelaki iya! Elia udah belaki kedua kali lalu udah betunang kali ketiga dalam kandang dua taun, lalu tu meh pekara ti nyelai ditapi siko indu ti agi biak baka iya!
Patut, tau ke enda, Elia disebut kitai siko orang ti bidik laban iya ngembuan pengaya? “Bekereja bebendar ke, lalu berami meh naka ulih” nya endang rambaijako ti dipesu ke Taib soh bala anak menyadi iya leboh sida agi biak! Nama utai ti ditemu kitai pasal pengawa dagang Elia, lalu baka ni chara iya bebendar beguna ke peluang ti diterima iya baka bala pangan dagang iya ti bukai? Dalam taun 2008 Elia udah mujor nanggap sempekat enggau LCDA ti endang betuai ke madi indai iya empu, Taib Mahmud. Maya nya kitai tau nyangka Elia bulih peluang ti baka nya tang orang bukai nyangka nya lubah mimit ti ngujong ke sida bukai nyaenda nemu bisi enggau nadai tanah-tanah ti deka dikereja!
Iya ti bendar nya, Elia ti bemata menaul nya udah enggau mujor mutar ke pengawa nyukat lalu magi tanah NCR 10, 000 enggi orang asal ba pelilih menoa Tatau di Bintulu lalu enda ditemu sapa-sapa sida ti diau di menoa nya! Elia udah ngereja nya enggau jampat (lalu tau disadang nadai siko orang deka kiroh ke tanah-tanah) ti ngujong ke iya bulih penguntong RM5.5 juta ari rega tanah nya. Rega ti nyampau nya jauh amat mimit ari rega ti bendar lalu Elia udah dikemendar ke maya rega nya enggau chara pupok-pupok. Peda kita pemandai Elia bedagang!
Bala Iban ti ‘paloi’ laban enda nemu diri kena kelakar!
Raban pemansik ari Sarawak Report udah mansut ke jako tanya lalu udah mega bulih penerang pasal tanah-tanah NCR enggi bala Iban di Tatau dia endang udah disukat lalu dibagi Taib dalam taun 1996. Kebuah ti ngumbai bala Iban di menoa nya beli, laban sida iya kelalu merinsa lalu enda ulih ngupah lawyer dikena sida mai kes nya ngagai court, nya alai nama kebuah kitai tau ngumbai sida enda nemu ngerebut peluang, baka ti disebut Taib ti madah ke peluang nya enda bisi ba kaki tangga diri empu? Ba minggu nyin kemari, Taib kala ngumbai bala pengkritik iya baka ‘ketam’ ti semina nemu mansut ke jako bantah lalu begedi ke orang ti ngerampas tanah orang bukai baka ti dikereja anak madi iya empu, lalu mega sida sebilik ti bukai. Iya ke bendar, Taib udah nimbal jako bantah bala orang ti mantah chara iya ngulih ke pengeraja enggau chara ti enda patut, lalu kami deka ngadang, Taib tentu deka bepelasar ke penemu tu dikena iya maya bejako ba mensia maioh rambau pengawa ngundi tu ila. Kitai bisi Kepala Menteri ti pintar – tabi puji ke nuan Taib ketegal pengeraja nuan, lalu kami deka ngelalau semoa orang pasal pekara tu lalu pia mega baka ni pemintar nuan bulih semua utai tu!
Udah bala Iban dia lenyau tanah, Taib lalu nyual konsesi ngulih ke kayu balak soh kompeni Borneo Pulp and Paper, ti ngujong ke semoa kayu kampong ti beumor lebih 150 taun dia (kampong ti pengambis tuai di dunya tu) lalu digaga nyadi abok kayu (pulp) enggau keretas (paper). Udah nya dalam taun 2008 Elia enggau jampat-jampat ngerebut peluang ti endor iya ngulih ke tanah dia enggau rega RM5.5 juta sebedau orang bukai nemu peluang nya. Ya! Endang nadai siko pan orang bukai nemu, laban ‘menoa (Sarawak tu) bisi utai sama-rata ke semoa orang’ ti endor Taib rindu agi meri konsesi-konsesi enggau chara belalai … soh sida sebilik aja.
Minda ari sitak menoa Sungai Anap (iya nya anak Pengulu Jipun) nyadi pengari ti bejako ngari ke rumah panjai sida ti udah lenyau tanah enggau kampong endor sida begiga ke pemakai ketegal menoa sida dipasok pemansang. Minda madah ke diri tekenyit amat udah iya nemu Elia ti agi biak amat tau bulih konsesi ngereja tanah di menoa sida dia. Ku Minda
“Kami nerima sepuchok surat ari perintah British ti ngeletak menoa kami tu kelia enggi kami, tang perintah ti diatu madah ke ator lama nya nadai relevan enggau rambau diatu. Maya sida baru datai, sida iya mayar 4 iko bala tuai-tuai menoa kami dikena sida nutup mulut, tang udah nya sida datai mai lori enggau kereta lipan sida, kami lalu ngeripot ngagai polis. Pekara tu agi benong diperunding ke”.
Kompeni Ikrar Bumi Sdn Bhd
Antara taun 2008 enggau 2009 Elia udah mujor bulih berapa iti ‘lisin sementara’ dikena nukar menoa nya ngagai kebun bedandang besai sawit – nengah siti sempekat ti ditanggam ba bulan March taun nyin kemari. Lisin-lisin nya agi sementara aja, laban ba chara teori bala orang asal ti bisi tanah NCR enda tau enda dibai nanggam sempekat. Tang nadai siko bala orang asal di menoa nya tin emu kuing pengawa – sekali ke bala orang asal dia nadai ati deka bedagang, tau mega disebut ke bala orang asal dia nya bansa orang ti ngelusu.
Kompeni ti dikena Elia ngulih ke tanah NCR ti besai amat nya benama Ikrar Bumi Sdn. Bhd., Seninjik-ninjik iya nya sebengkah kompeni ti berejista ngena alamat kompeni Parabena, sebengkah agi kompeni ti dikemata ke indai iya, Raziah Mahmud, madi indu Taib Mahmud. Nya pan, Taib bisi ga megai share ti maioh dalam Parabena lalu kompeni nya udah nerima maioh bengkah projek perintah enggau konsesi di menoa tu. Kami ulih nganggar ke semoa tanah ti ulih Parabena, enti dipejantil ke, bulih mesai menoa Brunei! Peda kita chara Taib sebilik ngereja utai tu!
Elia, ti endang amat agi biak, lalu orang ti ngereja semoa pengawa ti mudah ngasoh leju ti bisi bekaul enggau tanah ngari ke iya, iya nya Joanna Kho, ti endang nyadi sekretari ke indai iya. Kho ngengkah ke lumor telefon iya ba semoa surat penerang kompeni nya. Pewaris ke semoa penguntong dagang kompeni endang ukai orang bukai. Elia nya anak kedua Raziah, ada maia Raziah agi jadi enggau laki ti ke terubah iya. Nya kebuah nama iya Elia Abas, laban ngena nama laki terubah Raziah. Elia Abas tu siko pengarah ba Ikrar Bumi, baka indai iya ti ngemata ke Parabena. Elia bisi 998 iti ari 1,000 share dalam kompeni iya empu nya!
Pengawa dagang Elia terus diayan ke iya taja pan kompeni nya bisi 1,000 iti share modal bebayar, tang Elia mujor mujok madi indai iya, Taib Mahmud, laban ngena modal bebayar ti nyampau nya iya ulih meli aset menoa ti berega RM5.5 juta nya lalu besemaia deka mayar pulai rega enggau chara pupok-pupok. Nama kebuah raban nembiak Sarawak ti bukai enda ulih nitih ke singkang Elia? Kitai tu patut berasai malu laban kitai tu suntok lalu enda sebaka enggau Elia ti tau nyadi kaya raja enggau chara iya empu!
Ari ni penatai duit iya?
Taja pan baka nya Elia enda tau enda nanggam sempekat enggau chara ti mindah ke tanah-tanah ti baru nya dikena ngulih ke untong bejuta-juta ringgit soh sebengkah agi kompeni ti tulin-tulih ulih muka kebun bedandang besai sawit, lalu pia mega mutar ke penyarut enggau bala orang ti ‘ragak’. Kita pan enda ulih ngarap ke Elia nya sanggop ngamah ke jari iya bekebun sawit!
Baka ti suah dikereja, sebarang bantah ari orang ba ‘lisin sementara’ ti dijual orang baka ti dikereja Elia nya mudah agi diputar ke orang ti kedua. Sida nya semina mantai ke pemula. Bala orang asal ba sebengkah-sebengkah menoa deka dipadah ke sida nya nadai agi hak atas tanah NCR diri empu laban lisi ti dikena sida bekereja dia endang lisin penuh, ukai sementara, ti ulih dikena sida nebang kayu enggau muka kebun dandang besai. Orang ti empu menoa dia pan nadai jako, nyengkaum enda ulih minta sebarang pampas ke tanah diri ti dikereja orang bukai! Enti pekara udah diteju ke baka nya aja, bala apek bayat pan lalu tama ngagai menoa nya lalu raban polis pan pejam mata aja nyentok ngagai maia penyarut padam.
Ba kita, baka nya meh chara bedagang, lalu baka nya meh chara sida Taib sebilik ngerebut sebarang peluang ti bisi ayan. Kita ngumbai pandai sereta pintar amat meh sida nya? Tang diatu kitai ngari ke tudah Elia nyau bisi pengirau ati. Diatu iya enda tau enda masu jari diri empu lalu nyual lisin iya nya soh sebarang sapa bala penerit adat dikena iya ngulih ke untong ti maioh.
Enggau chara belalai penulis karang tu ti diinjau Sarawak Report ari majalah Tatler diteju ke berunding, nama meh kebuah Raziah enggau laki iya Robert udah kelalu lama neju ke anak indu sida nya ngulih ke pengeraja, lalu udah nya tau tak ngenyauh ke diri empu?
Dulu suba, pengawa pengawa bejual-beli tanah dikereja semina dalam seminggu tau ke dua aja! Tau ke, nyangka nya Elia kelalu gagau diatu laban nyangka iya deka nyedia ke pengerami nikah iya ti ke tiga kali? Tau ke, nyangka sida sebilik diatu udah ngasai ke diri bisi dituntong penanggol?
Tau ke, nyangka sida sebilik diatu udah dituntong penanggol ngiga sapa orang ti deka meli tanah sida? Tang diatu kitai anang enda ingat, laban diatu sapa-sapa orang ti bisi ditemu ngachau tanah orang bukai deka betemu enggau penanggol, lalu enggau mudah deka dipechara orang dalam court.
Diatu, semoa utai berubah enggau jampat. Kes pasal tanah nyau betambah maioh, terima kasih ke pengawa bala lawyer ti ngari ke orang bansa asal, baka sida tuai PKR Baru Bian. Diatu Baru Bian benung nyaup orang bansa asal mutar ke lebih 200 iti kes pasal penyarut tanah, lalu semoa kes ti dipechara dikena ngelaban perintah Taib Mahmud pan udah menang magang!
Pengawa ti meli lisin-lisin sementara ari sida Taib sebilik ti tebilang raban orang diri sebilik ti pengambis jai di dunya tu, ukai pengawa ti manah dikereja. Iya semina manah ba report taun aja, tang sida enda tau enda meri maioh macham penerang ngagai orang ti deka meli share lalu mega meri penerang soh bala orang NGO. Manah agi kitai nyeliah ke diri ari ti bekaul ba pengawa dagang enggau sida sebilik tu! Peda kita, ba minggu-minggu ti udah, indai Elia, Raziah ti udah didawa ngerampas tanah di Simunjan, Sebangan, diatu benong ditagang court ngereja pengawa ba menoa orang asal dia. Tagang tu balat bendar nuntong Quality Concrete Sdn. Bhd ti udah kelanjor meli tanah di menoa nya ari Raziah. Kompeni nya pan udah kelanjor ga meri penudok ti tinggi ke Raziah ngambi ke dikena sida ngemujor ke pengawa nanggam sempekat bejual-beli nya!
Diatu pengawa ngeliti ke kampong ukai pengawa ti manah, laban orang do serata dunya diatu benong nyukong penemu ti deka nambah ke kayu kampong! Tu meh ti nekul-nanggol kompeni kebun bedandang sawit diatu.
Anang mantah pengaya orang baka pengaya Elia!
Semoa penanggol ti nuntong sida Kepala Menteri sebilik diatu nyau ngujong ke iya bebendar agi ngambi ati rakyat, lalu isi-isi jako iya deka ngasoh kita MERANSANG sapa-sapa ti deka ngulih ke pengeraja baka chara Raziah. Dini meh kitai tu enti nadai dipelanja iya? Kitai tu agi BEGUNA KE pengaya iya
Diatu Taib Mahmud udah irau amat ati sekali ke sida sebilik udah chukop kaya, iya enggau bini biak iya pan irau laban nyangka seduai melaki bini benong nganti pengada orang baru. Bedudok ari tu mega Taib diatu ditemu encabar bala akim ti benong ngator pechara kes-kes ti ngelaban iya. Tang taja baka nya, bala akim nya endang enda tau enda bejalai ke pengawa lalu mending ke pemutus court ti lebih tinggi agi.
Penanggol tu mega mai reti soh Elia ti enda tau enda ngetu belaki naka ke dua kali aja. Ukai baka indai iya ti ulih belaki ke tiga kali!