ANG PAU KE TAIB – BEJUTA-JUTA DALAM MATA DUIT TUNAI!
Ba maia pengerami Taun Baru China ti diintu orang ti bebansa China, berita ari orang dalam bisi meri kami penerang baka ni Abdul Taib Mahmud ti endang suah nguna peluang ninting taun ti endor iya ngenggam pada kroni dagang bansa China iya nya.
Kami bisi nerima beberapa iti penerang ti nyelai pasal Kepala Menteri ti rindu amat ngabang ngusong rumah-rumah besai bansa China di Sibu enggau di Miri ninting taun, selalu iya disempulang bala sida sebilik ti endor sida sebilik deka diberi bala Cina cek-cek duit ti maioh ari orang-orang ti empu rumah ti seruran berasal takut sereta kesal.
Duit tunai kena meli konsesi-konsesi
Bala bakih Taib ti bebansa China endang udah nemu, ba pengerami ti baka tu meh, sida dipinta mayar duit enti sida deka terus nerima konsesi dikena ngereja tanah enggau kampong orang asal.
Ba pasal konsesi, Sarawak Report bisi bulih penerang ari orang dalam, duit penulu ngagai Taib ti diperunding ke lalu udah nya dipasok ke dalam akaun bank iya di menoa tasik. Udah nya, share enggau pangkat sida sebilik dalam siti-siti kompeni ti deka bulih konsesi nebang kayu enggau muka kebun dandang besai mega diperunding ke. Udah nya ba pengawa ti deka ngulih ke kayu, Taib deka minta RM100 ke satu ton, ti tau digelumu ke nyadi bejuta-juta ringgit ninting taun. Udah nya lalu tebantai pengawa nipu ti endor bala pengeksport ti udah dipilih, dipinta mayar sepenyampau duit ti maioh.
Taja baka nya, bala taukey nya seruran diparit ngereja pengawa putar-belit sekumbang pengerami ang pow nya, sebengkah pengawa ti enda ngelantang ke ati enggau berupai rangka.
Sarong surat bechura mansau
Taun Baru endang maia bansa China beberi ke utai soh bala anak mit enggau bala pangan sida, lalu pengawa tu ngengkaum meri sampul mansau ti diisi ke duit. Leboh ti ngabang ngusong pangan diri, sida bisi ngembuan ati ti ngarap ke utai ti manah-manah deka diterima sida. Sampul mansau ti diisi enggau RM50 tau dikumbai pemeri ti mentas amat. Tang Taib enggau sida sebilik seruran ngarap ke pemeri nya jauh maioh ari RM50 nya!
Siko orang dagang bebansa China ti tampak nama bisi madah ke kami Taib nerima pemeri baka nya utai ti patut enggi iya, lalu bala orang ti empu rumah ti di dilawa iya enda tau enda nurut ke peminta iya. Pekara ti baka tu dipeda baka reti pengabang nyerang ngalah ke rumah orang lalu sida ti ngintu pengerami nadai pilih ti bukai.
Siko agi orang dagang ti tebilang ti lama amat enda lantang ati bisi mega madah ke kami, “tu sebengkah chara endor bala China diasoh nundok ke bansa Bumi, dikena nunjuk ke sapa ‘boss’ ti bendar. Pengawa ti baka nya berupai amat rangka lalu berupai mega kamah dipeda”.
Manang tukang minching beg – anang mimit ari satu juta, neh!
Kami mega diterang ke pasal manang ti kereja enggau Taib suba nya, Ahmad Su’ut udah nyadi pengurus dagang Kepala Menteri ba maia pengerami ti baka tu. Kami mega diterang ke manang nya deka ngasoh sekretari Taib betelefon ngagai taukey sari dulu ari Taib datai ngabang endor sida betanya penyampau isi ang pow ti deka diberi ke Taib. Suah amat orang ti empu rumah nadai pilih bukai, nunda ke siko agi pemeri penerang kami, tang nurut ke peminta ti endor “anang kurang ari sejuta ringgit” pan udah chukop!
“Iya (Taib) ukai semina datai ngabang ketegal pemakai enggau utai irup ti dinah ke kami” ko jako penerang didinga kami. Sida taukey sebilik dipinta nyedia ke duit tunai ti deka diberi soh Taib. Duit deka disimpan ke dalam beg dikena nganti penatai Taib sebilik.
“Taib datai ngabang lalu ‘bebasa ke’ rumah kami, lalu udah nya deka mulai ke diri ti endor manang iya deka tinggal enda lama. Udah Taib ngejang ke rumah nya, orang ti empu rumah lalu nyua ke beg ti diisi duit ti lalu mai duit nya ngagai Kepala Menteri!”
Terang amat meh, ulah ti jai ti enda patut diayan ke siko Kepala Menteri, ti endang udah nyadi siko multi-jutaan. Tang, nitih ke diperati ke orang, Taib nya siko orang ti rindu ngena sebarang peluang endor iya ngulih ke pengeraja.
Taib mega dipeda enda ulih ngetu nyambut duit suap lalu ari ulah ti baka nya diatu, rakyat Sarawak deka meda iya ngetu ari pengawa iya.
Pengawa ngundi urong tengan bulan March tu ila
Sekeda kelai ti mupok-mupok udah ayan iya nya endor Taib udah merambu deka ngator pengawa ngundi ba ujong bulan (Dua) tu, tang udah nya ngelanjar ke agi ngagai tengan bulan March. Dalam perambu iya, enti iya menang baru ila, iya deka mindah ke 600, 000 iko orang bansa asal ngagai endor pengentap pendiau ti baru laban menoa sida nya deka digaga iya 12 iti tekat ai. Ke terubah iya, iya merambu deka muka kebun dandang besai sawit dua kali lipat besai ari se-million hektar ti nyadi dua million hektar.
Pengamu enggau pengerangka Taib deka nyadi ke kelai orang bansa asal diatu nyau udah chukop sabar sereta tan nat ke pemerinsa diperintah Taib, lalu diau sida mupok-mupok ngayan ke pengangkat diri deka nyakal iya. Pakatan Rakyat ti betuai ke lawyer NCR ari PKR Baru Bian endang mutus ati deka ngemadu ke pengerusak, enti sema sida PKR nya diberi kuasa olih rakyat megai perintah. Sida PR deka ngari ke rakyat ngambi pulai semoa tanah NCR ti udah dirampas perintah Taib. PR mega besemaia deka ngerampas duit Taib dikena mayar bekal ai beresi, kuasa elektrik enggau dikena ngaga tau ke ngemanah ke agi jalai alun. Diatu bala pengundi nyau mupok-mupok mereti ke sapa-sapa bagi orang ti tau dipilih sida, lalu sida nyau enda takut agi dikeremba Taib dikena iya ngulih ke undi bala pengundi.