‘PENGAWA DAGANG’ taib di miri – PENYALAH ‘MAKAI SUAP’ IYA DIKUSAI KE
Ba pengujong taun siti nyin kemari, rambau pengerami nasih tanah ngaga jalai baru Taman Tunku – Taman Jelita di Miri, Taib Mahmud udah bebula ke jako petenah enggau ‘ati kepapas’ sekeda orang ti mantah (kritik) iya. Munyi ti didinga siko ari orang ti bisi ngulu pengerami nya, Taib bisi nyebut:
“Bala orang di Sarawak patut nulak sebarang orang politik ti ngembuan runding ‘begedi ke orang kaya’ laban enggau chara nya sida ulih ngemuntan ke pemansang ti diator” [http://lifeisreallybeautiful.com]
Enggau jako Taib ti munyi nya, kitai tau ngaga simpul penemu ti nerang ke Kepala Menteri nya enda rindu ke sebarang orang ti mansut ke jako bantah ti betanya ke pasal pengeraja iya ti nyau udah ngelui ari patut! Baka ba pengerami-pengerami bukai, Taib endang rindu ke rambai jako iya “pengeraja kami, pemanah ke semoa orang” ti mai reti ikas pengeraja iya enggau sida sebilik endang manah ke semoa orang.
Sebengkah chunto ari Jalai Taman Tunku-Taman Jelita!
‘Pengawa dagang’ nya siti chunto ti endang manah dikena nerang ke baka ni chara sida Taib Mahmud sebilik tau nyadi kaya-raja. Tang, taja baka nya, ‘pengawa dagang’ ti ko Taib nya endang nadai bekaul enggau kereja bebendar, pengelandik, tau ke penemu nengkebang dalam perintah Taib Mahmud.
Projek ngaga jalai ti dirami ngena pengerami nasih tanah nya, baka ti bisi ditusoi Borneo Post, siti ari suratkabar ti nyadi dilah BN, madah ke “sebatang jalai anak ti beungkos RM18 juta ti digaga nisi padang bilun Miri deka digaga sebuah kompeni pemansang, ti mega kompeni ti bempu tanah ba endor nya, iya nya Kumpulan Parabena S/B”. Suratkabar Borneo Post nya mega bisi nusoi enggau lenak agi pasal Pengarah Urusan ke Kumpulan Parabena S/B nya, adik Kepala Menteri ti benama Raziah Mahmud. Diatu dunya betanya baka ni meh adik Kepala Menteri empu ti nyadi Pengarah dia tau bulih sebidang tanah menoa tu, lalu udah nya bulih kontrak ngaga jalai dia ti lalu dipelanja perintah menoa, lalu nadai pansut sebarang issue ‘konflik kepentingan’ pengawa Kepala Menteri. Tang suratkabar nya terus nusoi:
“Parabena merambu deka ngaga sebuah kampus universiti, poliklinik enggau perengka-perengka bukai ti diguna ba endor ti strategik nya dia”
Tu terang amat ngayan ke, enti Raziah deka nyambut belanja perintah dikena ngator projek-projek (tau ke ambis enda pan nyual projek-projek nya ngagai kompeni-kompeni pengereja pengawa ti bukai), iya endang bisi pemutus runding ke diri empu! Kes ti baka nya suah didinga kitai, ti endor Kumpulan Parabena endang seruran nerima maioh projek ti besai-besai dulu ari tu.
Parabena nya penatai pemisi ke menoa Miri
Sarawak Report udah ngeluar ke sekeda penerang ti bekaul enggau (surat-surat penerang pasal) Kumpulan Parabena ti nerima tanah-tanah NCR enggau tanah-tanah menoa ti berega beratus-juta ringgit, ti suah ‘nyarong diri’ ngena ‘front companies’ ti beopis ba alamat sida empu di Kuching. Tu mega nyengkaum tanah-tanah yang berimbai enggau padang bilun Miri, sebengkah menoa ti tebilang dikumbai orang Nengeri Minyak Sarawak.
Sereta Taib mangku pengawa ti nyadi Kepala Menteri iya nyerah ke 800 ekar tanah perdana nya soh kompeni sida sebilik, Concordance Holding dalam bulan November 1982 menya. Udah nya pala tanah perdana nya lalu dipindah ke nama ngagai nama Kumpulan Parabena, ti maya nya, semina anak kompeni aja, lalu udah nya, pemesai tanah nya lalu ditambah ke nyadi 2,000 ekar. 30 taun udah bulih penguntong ari projek ngaga rumah ba endor nya, ti udah nguntong ke iya bejuta-juta ringgit, lalu projek nya diatu nyau masok ngagai renggat kedua, lalu enggau nya projek nya beguna ke belanja ari perintah dikena ngaga jalai masuk.
Bala orang di menoa Miri ti bisi nyebut soh Sarawak Report ti bekaul enggau kebuah tanah dia diberi soh Raziah laban dikena besetuju ke penemu perintah ti deka mantu kompeni bumiputera tulen, ngambi ke bisi ngangkat ke pemansang bala orang asal menoa tu. Tang Raziah enda iboh ke ator ti baka nya, lalu iya ditemu nyual tanah nya dikena iya ngulih ke untong ti belipat-lipat soh sebengkah agi kompeni pengereja pengawa baka Hock Seng Lee – tau ke, ba pengawa ngaga jalai, Rich venture Construction S/B, ti diempu siko kroni perintah Taib Mahmud, ti benama Hii King Chiong!
Sapa bala waris Parabena?
Kitai anang enda ingat, Kumpulan Parabena ti udah bulih tanah perdana semesai 2,000 ekar enggau pechuma ba endor nya, dikemata ke orang-orang ti bisi megai share dia. Udah kami bejalai ke pansik, kami nemu orang ti pemadu maioh share dia iya nya Kepala Menteri empu, nengah share iya dalam kompeni iya empu Mesti Bersatu S/B, ti udah nya bisi share dalam Miri Properties enggau Dalam Development. Concordance Development, iya nya sebuah kompeni ti bisi share dalam Kumpulan Parabena, nya diempu kompeni besai CMS, ti endang enggi sida Taib Mahmud sebilik! Kompeni-kompeni ti bisi share semoa nya diempu sida sebilik, ke lebih agi Raziah enggau laki lumor tiga iya, Robert Geneid.
Mesti Bersatu (lalu enggau Kepala Menteri empu mega) endang orang ti megai share ti pemadu besai dalam Royal Mulu Resort ti benong bekontrovesi diatyu, ti udah bulih untong ari tanah-tanah pechuma ari tanah-tanah NCR ti udah disukat lalu dibagi Taib ari orang-orang asal di menoa Mulu, mega dipejalai ke ngena belanja perintah menoa ti besai amat, terima kasih ke pemutus Kepala Menteri ti mega Menteri Kewangan!
Enggau tu, kami ngasai ke kami endang patut betanya ba Kepala Menteri ti rindu amat nyemaka ke kompeni Kumpulan Parabena bejalai ke pengawa dagang sida ngena konsep ‘orang dagang ti beguna’, sebuah kompeni sida sebilik ti nyadi kaya-raja ukai ketegal ari bebendar kereja, tang ari ketegal bisi kaul dagang ti maioh enggau perintah ngulih ke tanah enggau kontrak ti besai-besai, ti udah nya lalu dijual soh orang bukai ngambi ke dikereja?
Kedua, nama penguntong ke bala orang maioh di Sarawak ti endor Kepala Menteri enggau sida sebilik aja ti bulih untong ti besai taja pan enda ngereja sebarang pengawa ba tanah-tanah ti dirampas nya?
Baka ni meh chara bulih pengaya ngena chara ‘makai suap’ nya tau meri penguntong soh orang bukai, lalu nama kebuah nya dikumbai salah tau ke ‘kepapas’ enti pekara baka nya ditanya? Baka ni ko kitai tu, enda tau kepapas ke pengeraja ti ulih siko perompak tau ke pencuri?
Agi maioh penyalah ‘makai suah’ di Miri
Penatai Taib ba pengerami nasih tanah projek menyadi iya nya sebengkah ari chunto kereja ‘dagang’ di menoa Sarawak. Sebengkah agi pengawa pemansang ti besai di nengeri Miri nya ulih ngayan ke pengamu sida Taib sebilik.
Ba pun 1990-an suba, Taib udah nginau tanah perdana nya dia, iya nya tanah urong Taman Selera. Endor nya endang endor ngentap ke rumah Residen, Pegawai Daerah enggau Pegawai Kesihatan. Ketiga-tiga buah rumah nya udah ditaga ke nyadi rumah pesaka lama ti tau meri pemanah ngagai nengeri Miri nya.
Taib udah ngerampas 20 ekar tapak endor ngelantang ke diri nya ke guna iya empu dikena iya ngaga Hotel Marriot ti sereba baru. Tapak urong nya endang udah endor district council beranak ke puku ngator endor orang maioh ngengkah ke kereta, tang udah nya tapak nya diambi Raziah. Raziah ti nyadi pengarah projek dia udah besamaia enggau Mayor nengeri Miri deka mayar pampas ke endor ti diambi iya nya, tang udah 20 taun tu, nengeri Miri agi mengkang nganti pampas nya!
Kompeni ti bulih tapak ngena bayar ti pengambis murah nya benama Majupun S/B. Bala kaban Lembaga Pengarah dalam Majupun nya Raziah, laki iya Robert enggau siko agi anak Taib ti benama Hanifah. Taib empu megai share ti pengambis besai!
Penguntong ti besai amat
Enggau chara nya Taib Mahmud udah ngerampas tapak ti pengambis besai lalu pengambis tinggi rega di nengeri Miri ke iya empu enggau sida sebilik, ti endor Hotel Marriot tentu gaga amat ati, sebengkah kompeni hotel ti diasoh ngator pengawa ngemata ke Royal Mulu Resort ti korup, sebengkah palan pengelantang ti diketawa ke orang laban sida ngena nama “eco-tourism”.
Taib mega bulih penguntong ti besai udah iya nyual tapak dikena ngemansang ke Taman Selera – 4 ekar ti diambi iya dari perengka guna orang maioh enggau rega RM12 juta soh kompeni Shin Yang, ti diatu benong ngaga tiga buah rumah kondominium.
Enggau tu mega, Sarawak Report deka nanya kini penunga ‘daya idup pengawa dagang’ ti endor Taib diberi tempik jari enggau panjong ti inggar, lalu sapa orang ti bulih untong kelimpah ari iya empu?
Meri ngemalu
Ba pengerami nasih tanah projek Jalai Taman Tunku-Taman Jelita, raban orang ti ngayan ke Ajat Naga China enggau orang ti bengepan bansa asal di peda baka ti ngerami pengeraja Taib lalu ninga ke jako licha iya ngemaroh ke penemu orang ti mantah (kritik) pengeraja iya ti enda patut-patut nya.
Terang bendar meh, main asal maia ti ngambat Taib nya ngayan ke reti iya nya udah bulih pengeraja bedudok ari pengawa iya ti ngerampas tanah-tanah NCR orang asal lalu pia mega bekena ke belanja ari perintah!
Ba pengerami nasih tanah nya, dia Taib bisi besadong ke pemakai enggau utai irup dalam paket soh bala orang maioh ti ngulu pengerami nya, lalu sida dipeda baka ti berebut ke teda tau ke sedak pemakai ti belaloh ari pengeraja Kepala Menteri!
Kepala Menteri mega disebut ke bisi nabor ke RM50 soh tiap iko orang ti bisi datai ba pengerami nya, ti dipeda kami meli undi ngena duit iya ti diulih iya enggau chara ti salah. Enggau tu, Sarawak Report deka ngelalau bala orang maioh enda ngasoh undi sida nya dibeli enggau rega ti murah, laban Kepala Menteri nya meh orang ti udah ngasoh pengidup sida nya merinsa. Sarawak Report mega nangkan mensia maioh, Kepala Menteri nya benong nyimpan duit bebilion-bilion ringgit dalam bank di menoa tasik din, ti nitih ke patut, dikena iya begaga ke sekula, perengka-perengka ngintu pengerai, bekal kuasa elektrik, bekal ai beresi enggau jalairaya ti nyamai ditengah kulu-kili, ti endor semoa duit iya nya endang enda dipelanja Kepala Menteri!