RM 78 JUTA NGAGA LUBANG TAI – PENGUNTUNG TAIB NGEREJA PENGAWA KAMAH!
Diatu udah dipeda kitai maioh Abdul Taib Mahmud enggau sida sebilik benung nyintak duit ti maioh amat ari tabung awam dikena ngaga sistem sarang tai. Kira-kira wang bisi ngayan ke RM530 juta ari duit bala pemayar chukai udah dikeluar ke dikena ngereja projek nya, lalu RM78 juta endang mata-mata udah disintak sida Taib sebilik enggau sebuah kmopeni kroni iya nya Nishimatsu Construction ari menoa Jepun (diatu indu kompeni Nishimatsu benung dipechara di menoa Jepun din ketegal penyalah ti bekaul enggau ‘makai suap’).
Tu mih siti ari chunto dikena meri banding baka ni chara sekeda ari duit nya disintak ngena chara meri sub-kontrak. Pengawa tu udah nyadi ke salah guna belanja awam ti standard di menoa Sarawak dipegai Taib. Bala penyakal balat amat mantah, laban tu mih chara ‘makai suap’ ti pengabis jai.
“Anembiak ti agi mit pan ngelala mih utai tu”, pia ko jako bantah sko ari kaban parti penyakal ba minggu nyin kemari, “siti ari kebuah ulih ngerari ke duit iya mechat sebarang penulis berita suratkhabar ti berani nulis sereta ngayan ke berita pasal utai ti nyadi. Laban, enti orang maioh nemu berita utai ti amat nyadi, iya pasal duit bejuta-juta ringgit ti diambi iya, tentu orang maioh deka ringat suh iya!”
Ngulih nengah sub-kontrak ti pelesu nya udah nyadi ke standard di menoa Sarawak
Chara ngenchuri duit baka tu mudah amat, lalu Kepala Menteri, Abdul Taib Mahmud, endang udah teleba amat ngereja tu sekumbang ti bekuasa mega perintah Sarawak 30 taun. Terubah, iya salah guna kuasa nyerah ke projek nya ngagai kompeni siko ari sida sebilik, tau ke kaban dagang iya. Udah nya projek nya di-sub-kontrak ngagai sebengkah kompeni ti endang teleba sereta landik ngereja pengawa, diagih ke ungkus ti jauh mimit ari ungkus asal iya. Tu mih chara muntang sida Taib ngisi duit ke dalam kandi sida.
Ba projek ngaga Sistem Sarang Tai di Kuching (Kuching Sewerage System) bisi utai ngasuh tekenyit mimit baka ti dikeluar ke kena 30hb September 2008. Kepala Menteri udah nyerah ke kontrak beungkus RM530 juta nya ngagai sebuah consortium tiga buah kompeni, ti nyengkaum Kumpulan Construction, ti dipejalai ke menyadi indu iya empu, Raziah Mahmud. Raziah enggau menyadi iya, Onn Mahmud, bisi 87.5% ari penyampau share ba kompeni nya.
Baka ni penemu enggau pengelandik Raziah ngaga sistem sarang tai orang awam?
Kumpulan Construction nadai perengka-perengka dikena ngaga, lalu Raziah Mahmud empu endang ukai orang ti ditemu landik ba pengawa ngaga sistem sarang tai orang awam ti moden. Semina pekara pasal iya ti ditemu iya nya pengawa bedagang bepun ari Taib Mahmud mangku pengawa nyadi Kepala Menteri. Sekumbang nya mega maioh amat kontrak awam datai-datai, lalu kompeni pan maioh agi ga ditumboh ke iya enggai sida sebilik
Bala orang ti berate ke pejalai kompeni Raziah bisi nyebut Raziah Mahmud semina ngembuan siti aja pengelandik, iya nya pengelandik meri sub-kontrak ngagai orang bukai tiap kali menyadi iya, Taib, nyerah ke projek suh iya.
Kaban dagang ti enda manah?
Sarawak Report deka nemu, nama kebuah RM78 juta ti dikumbai lenyau tang iya ke bendar udah dipedua entara Raziah Mahmud enggau kompeni Nishimatsu Construction ari Jepun?
Ba taun siti nyin kemari berita ti bekaul enggau Nishimatsu Construction bisi ayan ba suratkhabar di menoa Jepun. Dalam berita nya, chairman Nishimatsu ditemu udah ngena 1 juta Yen ti diaku dikena iya ‘nyuap’ kena ngulih ke kontrak di menoa luar, lalu pia mega dikena iya nyukong pengawa politik caha salah. Ba penyalah tu kepala parti penyakal, Ichiro Ozawa lalu diasuh badu agi mangku pengawa iya.
Nya alai manah kitai tu minta penerang pasal kaul entara Nishimatsu enggau sida Taib sebilik, lalu pia mega nanya sida nama pengawa udah dikereja Kumpulan enggau Nishimatsu dalam kandang tiga minggu ti ngujong ke sida nerima bayar USD25 juta?
Enti tanya ti baka tu udah ngujong taui politik di Jepun nya diasuh badu mangku pengawa, nama asil pansik ti menyana deka dipansut ke di menoa Sarawak?
Kaul Taib ti lama sereta manah enggau Nishimatsu
Pansik kami bisi ngayan ke projek Kuching Serwage nya siti ari projek-projek ti beskala besai ti udah diserah ke ngena chara ti sebaka amat, ngagai kompeni ti sebaka mega, baka Kumpulan Construction, Nishimatsu Construction enggau HSL.
Udah Raziah ngambi-alih Kumpulan Construction dalam bulan Enam 1986 (maia nya kompeni tu benung nadai utai dikereja) projek-projek ti diserah ke ngagai tiga buah kompeni ti sama nyengkaum projek ngaga rumah stadium tebuka 40,000 penudoh ba Petra Jaya ti beungkos RM105juta, enggau Palan Penyangkai Kapal Tasik Dalam Senari (Senari Deepsea Port) ti beungkos RM160 juta.
Tang enda mukai-mukai, ikas penguntung Kumpulan ti berejister ti ulih ari dagang kunsi iya ti besai-besai tu ditemu mimit amat, nitih ke pansik atas kira-kira wang ti bisi ba upis Pengerejister Kompeni-Kompeni. Ambi ke banding, dalam taun 1991 duit ti dikena RM8.5 juta tang semina ngenatai ke untung RM249,474, lalu ba taun 1991 puku RM5,811,443 semina meri penguntung RM23,451 aja. Iya ke nyata, entara taun 1986 enggau 1998 kompeni nya endang dituntong pengerugi ba chukai.
Berapa ulih Taib empu?
Sarawak Report ulih belaba ke sida Taib sebilik ti ngena chara belalai ngereja pengawa dagang laban ti beterabai ke nama enggau pangkat Kepala menteri, orang Sarawak ulih nyangka duit ti maioh amat ari projek ngaga sarang tai endang masuk ngagai akaun bank iya di menoa tasik.
Udah penguntung ari ti mutung ungkos projek nya, pekara tu tau mai reti rakyat Sarawak udah ngeluar ke belanja RM78 juta lebih ke projek nya, tau ke duit diagih ngagai projek nya enda chukup.
Saut ti disadang deka didinga kitai, iya nya dua-dua, reti nya mensia maioh di Kuching udah ngeluar ke ungkos ti lebih dikena ngaga sistem sarang tai ti betaraf sub-standard ngambi ke sekeda ari duit nya ulih tama ngagai kuchik sida Taib sebilik.
Penanggol ti baka tu ulih diadu manah ke agi ngena chara tender tebuka, sebengkah chara ti dikena di serata dunya tu, laban dikena ngemunas ke penyalah ‘makai suap’, lalu sistem tender tebuka mega endang disukong semoa parti penyakal di Sarawak.