Kami ulih mansut ke penerang ti madah ke adi indu Taib, ti benama Raziah Mahmud udah sekali agi ditemu ngerampas tanah ari rakyat Sarawak. Pansik-pansik kami udah ngayan ke Taib Mahmud empu pan bisi mega bekaul enggau penyalah tu.
Pengawa Raziah ti nguji ngelalai ke diri empu ti bisi kaul enggau perambu nukar status Tanah Kampong Galau di menoa Ensengei ngagai ladang sawit ti besai amat, ba pengunjong iya nganyan ke sebengkah agi kaul belalai (skandal) ti besai agi. Diatu kami ulih nerang ke chara ti dikena Raziah enggau mega menyadi iya Taib, ngulih ke beratus-ratus hektar tanah Nengeri Sarawak – ti dijangka bulih setengah ari pemesai menoa Brunei – nyau ka lebih sepuloh taun ti udah!
Pengawa nyukat enggau magi tanah ngena chara lama
Menoa di Ensengei nya sebengkah ari sekeda ari tanah ti baroh nyadi ke Tanah Kampong Galau. Kenyau ari dulu kelia tanah NCR nya endang enggi orang menoa nya lalu udah ditetap ke lalu dikemendar ke perintah British dalam taun 1947, tang ba taun 1984 Taib udah netap ke endor nya diambi perintah Sarawak lalu ditaga ke nyadi Tanah Kampong Galau. Taja pen bakanya, ba entara taun 2005 enggau 2008 Taib lalu nyerah ke kira-kira 20 ribu hektar tanah ti patut dijaga nya soh adi iya empu!
Baka ti suah dikereja sida sebilik di Sarawak, mula-mula orang asal menoa nya baru nemu sebengkah pengawa bejual-bebeli bisi dikereja leboh maia kompeni batang masok lalu nebang semoa kayu ba kandang NCR ti endang endor orang asal nya ngasu-beburu, berikan enggau bekebun ke buah. Kompeni-kompeni nya datai lalu ngereja pengawa ngulih ke batang dia laban keno ko sida, sida iya belalau lisin konsesi ti diayan ke sida soh orang asal di menoa nya.
Taja pan bakanya, terima kasih, laban dalam taun 2008 siko lawyer penjaga pengelantang mensia, baka ketuai PKR Baru Bian ti kala menang bechara ngelaban Taib ti berampas ke tanah NCR dalam court. Raban Baru Bian udah ngalah ke maioh kes ngelaban kompeni-kompeni nya lalu pia mega ngelaban Perintah Sarawak, ti udah ditemu bejual ke tanah enggau ngeluar ke lisi-lisin kampong. Nyentok ke penyarut tu padam ila, kompeni-kompeni ti ngulih ke batang ari menoa nya diasoh ngetu dulu.
Raziah besalam tang iya cherida enggau utai ti ka dilamun iya
Senutok enggau nya pansik-pansik kami ngayan ke sapa bagi orang siko-siko ti ari belakang pechara-pechara nya, lalu baka ti ditemu orang asal menoa nya enggau bala lawyer sida iya, iya nya Taib empu enggau adi indu iya, Raziah Mahmud. Raziah ukai semina bekaul manah enggau kompeni-kompeni ladang sawit ti pengambis besai ti debri lisi dikena ngeliti ke kampong menoa Ensengei, ianya nya Lambang Sinar Mas enggau Usaha Jasamaju, tang kami mega bisi bulih rekod yang terang amat ngayan ke Raziah bisi nyimpan semua pala tanah sida.
Kami ulih ngayan ke pengamat berita ti madah ke Lambang Sinar Mas nya diempu sida Yu sebilik di bempu kompeni Hock Seng Lee Bhd (HSL), sebengkah kompeni kroni dagang Taib, lalu kompeni Usaha jasamaju diempu beberapa buah kompeni ti endor pemegai share ti pengambis maioh iya nya Hamid Sepawi. Hamid Sepawi tu petunggal Taib ti pengambis kaya, ti udah bulih maioh tanah ari perintah Menoa Sarawak, ti mega siko ari orang menoa Malaysia ti pengambis kaya.
Taja pan bakanya, penerang bukti-bukti ti ditemu kami dalam rekod Pengerejista Tanah ngayan ke kompeni ti enggau berunding ke pengawa ngeluar ke pala tanah di Ensengei dikereja enggau Kumpulan Parabena, ti diempu lalu dikemata ke Raziah empu. Pengawa mutar ke ngeluar ke pala tu ditemu bepelasar ke alamat ti bisi ba upis Pengerejista Tanah endang sebaka ba pala-pala tanah nya lalu ti bendar nya alamat Kumpulan Parabena – 154/56 Jalan Sungai, Padungan, Kuching – lalu ukai alamat kompeni-kompeni baka ti disebut (uji peda ba versyen jako English senentang entry Kumpulan Parabena dalam rekod Pengerejista Kompeni-Kompeni).
Sarawak Report ulih enggau jauh agi ngamat ke penerang ti madah ke ke dua-dua iko pengurus ti endor nama seduai ditulis ke dalam rekod Pengerejista Tanah nya enggau dua set pengawa jual-beli enggau Lambang Sinar Mas lalu enggau Usaha Jayamaju, ti bekereja terus ke Raziah. Chia Hon Thin seduai Paul Yu Chee disadang endang ngari ke kompeni sida empu, tang alamat kompeni sida nya sebaka amat enggau kompeni Kumpulan Parabena! Pia mega, lumor telefon upis Chia di Kuching ti belumor 082 41 3877, sebaka enggau lumor telefon Kumpulan Parabena baka ti bisi ditemu dalam bup direktori telefon.
Pekara ti gtau ngasoh ati irau iya nya pansik-pansik ti silik ti udah dikereja kami bisi ngayan ke Chia endang seruran ngena alamat enggau lumor telefon ri sebaka ba maioh pengawa mutar ke jual-beli ba upis Pengerejista Tanah. Kami deka ngayan ke penerang-penerang dalam repot kami ba maia bukai ila, tang pekara ti terang amat iya nya pala-pala tanah ti berega bejuta-juta Ringgit udah diserah ke soh beberapa buah kompeni ti enda sama, tang ke bendar iya diempu enggau lalu dikemata ke Raziah ngena chara ti besalam!
Sarawak Report pechaya ke, enggau endor ti sama pemesai enggau setengah menoa Brunei nya, diulih ke adi indu Kepala Menteri ari menoa tu ngena rega ti murah amat!
Taib empu ke endang bulih penguntong!
Pekara ti ngasoh ati tekenyit agi ari nya iya nya ba sebengkah penerang ti ditemu kami senentang orang ti megai share ti pengambis maioh dalam Kumpulan Parabena nya Taib Mahmud empu! Kami bisi bulih bukti ti ngayan ke iya megai maioh share dalam kompeni Mesti Bersatu, iya nya sebuah kompeni ti bisi share mega dalam kompeni Miri Properties, ti udah nya megai share-share dalam Kumpulan Parabena. Penerang ti bakatu ngenegap ke agi bukti kami nya ngayan ke iya bulih penguntong nengah jual-beli ti belalai sereta salah ba mata undang-undang menoa tu, lalu enggau tu kami deka nanya iya empu, nama kebuah iya enggai enda milih adi iya empu endor nyerah ke tanah-tanah nya.
Bala orang bukai ti megai share dalam Kumpulan Parabena nya bala sida Taib sebilik, lalu Sarawak Report deka ngeluar ke semoa bukti ti bisi bekaul enggau kontrak ti besai-besai Menoa Sarawak tu, enggau projek ti besai-besai mega ti datai ari Perintah Persekutuan, suah udah diserah ke soh kompeni tu. Tu mai reti Taib udah ngemasok ke duit agih belanja ti maioh amat ke dalam kompeni iya empu! Ukai tu ti disebut Sekretari Politik iya, Abdul Karim Hamza, ti kala direkod madah ke enda pulai nyadi ke penyalah enti sebarang orang politik ngena ‘peluang bedagang’ enti peluang nya tak datai ba kaki tangga diri empu?
More proof
Maioh agi bukti ti terang sereta tampak
Tu ukai sebengkah aja bukti ti ngayan ke Raziah bisi bekaul ba pala-pala tanah di Ensengei. Kami ulih ngayan ke pengawa iya ti nguji deka ngelamun semoa macham penerang pasal jual-beli tanah enggau chara belalai, ti selalu dikereja sida sebilik ngelamatu, nengah sebuah kompeni ti mit sereta enda tampak rita lalu udah nya, enggau jampat-jampat nyual kompeni nya soh orang ti ketiga sereta tau dikarap ke sida dikena ngulih ke penguntong belipat-lipat. Ngena chara tu, Raziah pechaya ke diri ulig ngelamun diri bulih pala-pala tanah nya! (Kami bisi udah ngayan ke chara nya ba repot-repot kami ti dulu ari tu). Pansik-pansik kami ba upis Pengerejista Kompeni-Kompeni bisi tetemu ke, kelimpah ari Lambang Sinar Mas kompeni enggi sida Yu sebilik ti dipasok ke dalam rintai kompeni, serimbai enggau nya mega semoa pala tanah nya diempu adi indu Taib enggau laki iya, Robert Geneid! Rekod-rekod ti ditemu kami bisi ngayan ke ba mula-mula iya kompeni nya, ti dikorporat ke kena 25 haribulan Disember 2003, udah diambi Raziah kena 24 haribulan Januari 2004, ti maia nya ngayan ke alamat kompeni nya udah ditukar ngagai alamat Kumpulan Parabena.
Repot Taun ari bala Pengarah ti difail ke dalam taun 2005 mega ngayan ke pengawa bala Pengarah kompeni nya betukar ngagai Raziah enggau laki iya, Robert, kena bulan Januari 2004 sama enggau anak seduai, Eliah Abas, sebedau kompeni nya betukar ngagai jari sida Yu sebilik ba bulan Januari 2005 (uji peda ba gambarajah dalam versyen jako English).
Bepelesar ke pansik kami ba upis Pengerejista Tanah, kami udah tetemu ke tanah-tanah sebesai 16 ribu hektar udah dikeluar ke ngagai kompeni Lambang Sinar Mas kena 21 haribulan Mei 2004 ba rega RM11.5 juta.
Maia nya, bala orang ti megai share nya Raziah Mahmud ti megai 70% share ba kompeni nya, lalu 28% da agi dipega sebuah agi kompeni, Mahligai Naluri Sdn Bhd. Mahligai Naluri nya diempu Raziah enggau laki ketiga iya Robert Geneid, ti mega pengurus ba kompeni Lambang Sinar Mas!
Sereta Lambang Sinar Mas udah bulih pala-pala tanah nya, kami ulih nyidi Raziah udah nyerah ke pegai iya ba pala-pala tanah nya ti diserah ke iya soh Yu sebilik kena 25 haribulan Januari 2005. Pengawa nyual tanah nya dikereja enggau naka penyampat dikena ngelamun Taib ti udah nyerah ke tanah-tanah nya soh adi iya empu, lalu ba maia nya mega iya bulih penguntong ti belipat-lipat. Takah maia kenyau ari ti ngulih ke tanah-tanah nya nyentok ngagai maia dijual, kompeni nya udah ngeluar ke repot taun iya ti nyebut pasal semoa reta tengkira kompeni nya kena 31 haribulan Disember 2004 (iya nya beberapa hari aja sebedau pengawa jual-beli dikereja) udah niki ari kusong Ringgit ngagai RM13.8 juta ba rega semoa tanah nya tadi. Nadai sapa tau nyangka pengawa tu dikereja ba maia orang nyambut Taun Baru laban sehari nya orang endang belepa lalu orang mega kiruh, ti endor sida betukar ke nama ba pala-pala tanah Menoa nya!
Taja pan jual-beli udah dikereja, tang Raziah agi mengkang berejista nyadi orang ti tau endor betanya, baka ti bisi ayan ba rekod-rekod dalam upis Pengerejista Tanah! Tu ngayan ke, taja pan hak megai dikereja enggau ator ti betol, tang Raziah agi mengkang diguna ngemata ke semoa pekara ti bekaul enggau konsesi, lalu iya ke bendar mega iya nyadi pengurus ke regas ba pengawa ngulih ke batang atas tanah-tanah NCR di Ensengei!
Ari semoa bukti ti udah diayan ke ngagai mensia maioh, kempang tau ke enda Raziah bebula ke tudoh ti madah ke iya nadai bulih sebarang penguntong ari pengawa kunsi nya, ti endor iya ngari ke menyadi iya Kepala Menteri Sarawak nya?
Ari pengawa iya nguji deka ngelamun semoa bukti nya udah ngayan ke iya endang nemu pasal menyadi iya sigi enda tau peneka ati nyukat lalu magi tanah-tanah NCR, awak ke batang-batang ba tanah-tanah nya tau diulih ke, lalu dibuka nyadi ladang sawit – semoa pengawa tu dikereja enggau enda mampas orang asal menoa nya, tang semina mayar mimit aja soh Menoa Sarawak?
Ukai tu kebuah mensia maioh ngaga ensumbar Abdul Taib Mahmud nya ‘Kepala Pencuri’ lalu ukai ‘Kepala Menteri’?
Berapa penguntong ti bendar ulih Raziah?
Belalau ke penerang ari upis Pengerejista Tanah, perintah menoa udah ditemu nyerah ke Tanah Kampong Galau Ensengei ti enda kurang ari 20 ribu hektar soh dua buah kompeni Kumpulan Parabena ba rega ti udah ditawar RM13 juta. Enti ba pengawa jual-beli tanah ti bukai rega nya disadang tau manggai ngagai RM100 juta. Enggau tu, mar amat kitai arap ke pengawa jual-beli belalai tu ti dikereja Taib seduai adi iya nadai meri penguntong ti besai soh seduai iya.
Kami minta penerang ari sida Yu sebilik enggau mega ari semoa orang ti megai share dalam Usaha Jasamaju kena ngayan ke berapa rega ti bendar dibayar sida maia ti betukar pala-pala tanah, lalu pia mega, sekali ke Raziah agi mengkang nyadi pengemata ba pengawa betukar ke pala-pala tanah nya, baka ti bisi ditemu kami ba upis Pengerejista Tanah, ti belalau ke penerang iya nya nyentok ngagai ujong taun 2010 tu iya mengkang nyadi orang ti tau endor betanya ke sebarang pekara ngari-ngari ke orang ti megai konsesi-konsesi nya?
Siku orang ti benama Peter Runin, ti ngari ke 14 buah rumah panjai Iban ti nawa Perintah Menoa Sarawak enggau bala orang ti megai lisi ngagai court ti bekaul enggau rampas tanah enggau chara ti salah tu, madah ke orang-orang asal menoa nya ringat amat, lalu sida deka enda mudah dibeli ngena duit. Ko iya:
“Bala orang nya deka ngulih ke kayu ba menoa kami lalu udah nya deka muka ladang, tang kami mengkang ngetan ke tanah-tanah kami tu”. Pekara ti bakatu ulih amat dikena nyukong batang aum sida ti deka diator sida ba ujong minggu tu leboh ti berandau ke pasal sida ti ngelaban perintah dalam court.
Sebengkah kes tipu?
Maia ti nyara k ekes tu dalam bulan Januari taun nyin kemari, Commissioner Hakim, Y.A. Puan Rhodzariah Bt. Bujang bulih sebengkah penerang ti nyebut:
“Mr. Baru Bian nya betol. Tanah NCR endang enda patut disukat lalu dibagi-bagi.”
Tang, iya nyara lalu madah ke bala orang Ensengei patut ngelaban Perintah Menoa tang ukai bala orang ti megai pala-pala tanah ke udah bulih konsesi-konsesi dia, SEMADI MEH sida ulih ngayan ke penerang madah ke pengawa nipu bisi dikereja. Enggau nya iya madah ke:
“bala orang asal tin gaga ambu ba tanah NCR endang sigi dikemendar ke mantah sapa-sapa ti ngeluar ke pala-pala tanah nya; lalu ukai mantah orang ti megai pala-pala tanah, semadi meh sida ulih ngayan ke penerang ti madah ke tipu bisi dikereja baka ti bisi ditaga ke dalam seksyen 132(1) Undang-Undang Tanah”.
Ari berita ti udah diayan ke kami pasal orang ti megai pala-pala tanah nya endang adi indu ke orang ti ngeluar ke pala-pala tanah nya, lalu pia mega semoa orang nemu pasal penanggol nya, gaga amat meh ati kitai ninga berita, sekali ke court deka nentu ke pengawa tipu bisi nyadi dikereja. Enggau tu, pengawa nipu sigi bisi dikereja Kepala Menteri ba rakyat iya empu ari tulong adi indu iya enggau kompeni-kompeni kroni iya.Maioh agi penerang ti tegap!
Enti mensia maioh bedau tentu lenak nemu pasal bala sida Geneid sebilik ti bulih tanah ari Taib, diatu terang amat rekod-rekod ti bisi ba upis Pengerejista Tanah tau dijadi ke penerang. Laban NEYENTOK NGAGAI 2008 (ti endor maioh jako bantah soh bala sida Geneid enggau Lambang Sinar Mas nya udah diayan ke), nama Robert Geneid ENDANG MENGKANG dalam rintai nama orang ti tau endor betanya ngari ke kompeni nya! Tu mai reti, taja pan kompeni nya udah dijual kena bulan Januari 2005 soh sida Yu sebilik, tang Robert Geneid mengkang nyadi orang ti ngari ke kompeni nya ngator sebarang pengawa enggau Perintah Menoa nyentok ke ujong taun 2008, ti bisi bekaul enggau pala-pala tanah ba ladang sawit nya.
Enggau nya, pengawa ti deka ngelamun penerang pasal Raziah seduai Robert nya ditemu enda likun sereta kemas. Taja julok ati deka engkah nama Paul Yu dikena ngelamun nama Raziah seduai Robert, tang rekod-rekod ba upis Pengerejista Tanah, tang lumor telefon enggau alamat upis kompeni Kumpulan Parabena agi mengkang dikena! Enggau nya kami ulih ngayan ke pengawa ti deka ngelamun penyalah sida Geneid sebilik ba tanah-tanah bansa Iban enggau Bidayuh kelalu cherida sereta enda kemas.
Rekod ti bisi ba upis Pengerejista Tanah dalam taun 2008 – tu sebagi ari isi surat penerang ti ngayan ke Robert Geneid ti nyadi orang ti tau endor betanya ngari ke kompeni nya – iya semina nukar nama iya ngagai nama Yu dikena ngelalai ke identiti iya empu. Tang saru iya empu laban alamat enggau lumor telefon upis agi mengkang enggi Kumpulan Parabena!
Sereta Lambang Sinar Mas udah teulih ke pala-pala tanah nya, kami tetemu Raziah enggau chara beguai-guai nukar pegai ba pala-pala tanah nya soh sida Yu sebilik kena 25 haribulan …