AI MATA JAGU!
Diatu Kepala Menteri, Abdul Taib Mahmud udah suntuk penemu lalu ngena suratkhabar The Borneo Post dikena iya meresi nama diri pasal penanggol ti nuntong raban orang ti nguan Pulai Bruit. Ke bendar berita-berita pasal pengirau ati iya ke pemerinsa orang di pulau nya meri kitai kelai iya nya, iya enggau sida sebilik endang kala ngerumpak tanah di menoa nya ti berega berjuta-juta ringgit, lalu orang dia enda dipampas iya. Tu mih penanggol ti nuntong iya empu!
Tambap kini orang di menoa nya, ko sida?
Taib enggau enda mukai-mukai ngayan ke pengirau ati diri ke bala orang ba Pulau Bruit, udah kami ti ngeluar ke berita pasal pengawa iya ba minggu nyin kemari. Iya udah ngenchuri tanah-tanah NCR di pulau nya, lalu nyerah ke tanah-tanah nya soh kompeni-kompeni enggi iya empu enggau enggi sida sebilik. Kami bisi ngeluar ke penerang baka ni chara bala menyadi iya bulih untong RM40 juta dalam 12 hari ari ti nyual baru tanah-tanah NCR nya. Udah nya kami ngeluar ke berita baka ni iya ngambi laloh tanah-tanah NCR ti agi tinggal ba pulau nya ti lalu diberi ia ngagai kompeni Delta Padi, ti dalam kompeni nya pan iya megai share ti pemadu besai.
Nya alai udah nya, nitih ke report ari Borneo Post, iya dipadah ke ngusong orang ba pulau nya beguai-guai. Suratkhabar nya madah ke Taib berasai sinu ati meda gaya penusah pengidup enggau pendiau orang ba pulai nya, tang iya lalu besemaia deka ngangkat ke pemanah perengka-perengka ti diguna ba pulau nya. Suratkhabar ti dikemata ke perintah nya, enggau naka bebendar miki semoa pengerusak ke nama Kepala Menteri, tang chara nya tau pulai ke buah kenang ti tau ngasoh kitai ketawa leboh iya ti udah amu nya ngayan ke penyinu ati soh orang ba pulau nya.
Kepala menteri bisi ga didinga ngutok musin landas ti mai penanggol-penanggol soh orang ba pulau nya, tang orang di serata Sarawak tu udah nemu, semoa penanggol nya enda bepun ari pengawa ti udah dikereja iya ba rampa menoa ba pulau nya. Enti sebagi mimit ari RM40 juta ti udah pulai ke bala menyadi iya diberi ke orang ba pulau nya, tentu sida dia enda merinsa baka ti ditemu diatu. Tang iya endang ngasoh orang dia seranta lalu mudah dikeduan awak ke majak ngundi iya enti udah ‘disuap’ iya ngena RN20.
Semaia ti kabur dikena mutar ke penanggol ti benong nyadi
Borneo Post bisi ga madah ke Kepala Menteri ngayan ke penyinu ati, tang iya enda kala nya ngeluar ke duit bantu, laban nya endang udah chara iya tiap kali iya bejalai nemuai soh kawasan iya (ti ke lebih agi udah iya tembu enggau projek di Tanjong Manis ti endor iya deka ngasoh diri empu kaya udah ti meresi semoa utan kayu bakau dia. Jako semaia iya tau amat ngasoh kitai ketawa, leboh iya direkod nyebut:
“Enti ulih, aku minta bala sida ari upis pengerai di Sarawak berengkah bejalai ke pengawa sida ba pulau nya”. Enti ulih?! Taib Mahmud bisi kuasa ngambi tanah sepeneka ati iya. Nama kebuah iya ngelulu ke diri enggau baroh ati minta bantu ari upis pengerai dikena ngangkat ke pengerai orang ba pulau nya! Enti orang di pulau nya endang ditemu dituntong penusah ketegal suntok pemakai ngelama tu, kereja mih utai ti patut, ukai semina bejako manis aja.
Minta bantu ari UN diatu?
Perintah ti menuku enggau bisi penyinu ke rakyat tentu deka beguai-guai mutar ke penanggol ti nuntong enggau enda disadang. Lapa Taib enda ngena bilun jet iya ti selalu dikena iya mindah kin-kitu nya, kena nganjong bantu barang pemakai soh orang di Pulau Bruit? Udah tentu chara nya ulih dikena ngangkat pemanah pengerai orang ba pulau nya ari penanggol ti endang dikereja iya empu. Tau ke, Sarawak, sebengkah menoa ti dikumbai siti ari menoa ti pemadu kaya di Malaysia nyau besak lalu minta bantu ari gerempong UN, laban Kepala Menteri endang enggai ngeluar ke sebarang duit bantu ngagai sapa-sapa kelimpah ari dikena iya empu enggau sida sebilik?
Maioh agi jako semaia enggau jako gerah bekaul enggau Pulau Bruit deka dipansut laban pilihanraya pan nyau semak-sesemak. Bisi mega orang ngenang projek-projek beugkos beratus-ratus juta ringgit deka dikereja ba pulau nya, tang orang tentu enda tambap lalu ngumbai semoa penyampau duit nya deka nguntong ke orang ti enda maioh nguan pulau nya. Taja sejuta ringgit udah chukop manah enti diberi baka nya aja ke semoa orang dia, tang Taib deka agi ngaga sebarang projek ti besai-besai ti tau nguntong ke kompeni sida sebilik!
Kami ba Sarawak Report tu deka berasai gaga ati enti orang di Pulau Bruit nerima sebarang utai ti manah-manah. Laban Kepala Menteri udah mujor ngambi tanah-tanah orang dia ti ngujong ke orang dia seranta, semadi kami nyau ngayan ke penusah nya. Nyangka nya enggai enda baka tu mih chara ti dikedeka ke iya, awak ke iya dikelala agi olih rakyat iya empu.