Sarawak Report ulih ngayan ke pengeraja enggau pengaya Kepala Menteri, Abdul Taib Mahmud, ti bisi kaul enggau Royal Mulu Resort ti kala udah bisi penanggul. Projek dikena ngaga palan endur temuai datai tu bisi ditemu bulih belanja ari perintah menua Sarawak. Tu mega mai reti Taib ti nyadi Kepala Menteri lalu pia mega Menteri Penatai Pemisi udah salah guna kuasa iya ngisi kandi iya ngena penatai pemisi menua tu.
Taib, ti mega nyadi Menteri Pengeraja Asal Sarawak bisi ditemu ngulihka tanah kampung ti besai bendar rapi ari menua orang bansa Berawan. Tanah kampung nya deka endur iya ngaga palan endur ngelantang ke ati, lalu orang bansa Berawan enda dipampas iya enggau patut. Pengamat enggau penerang pengawa iya tu dikereja iya ke penguntung iya empu.
Dagang kunsi iya tu ditemu beduduk dalam bulan November 2007 enggau sebengkah kompeni ti benama Mesti Bersatu Sdn. Bhd. Dagang kunsi tu meri iya awak 50% share ngagai kompeni Taib empu iya nya kompeni Kenyalang Cergas. Kenyalang Cergas tu pugu kompeni dalam kompeni Borsamulu Resorts Sdn. Bhd (BRSB). BRSB diberi tanggung pengawa bejalai ke kontrak ngemata ke National Park ti diempu perintah menua Sarawak tu. Terima kasih suh pemutus runding Taib ngasuh kompeni nya bejalai ke pengawa sida ngena duit rakyat enggau bala orang ti mayar cukai ngagai perintah iya, belabuh ari 1991.
Sekeda orang ti bulih penguntung ari pengawa ngaga palan Royal Mulu Resort tu iya bala sida sebilik, baka adi indu iya Raziah Mahmud enggau laki ketiga iya, Robert Geneid, sereta enggau kaban bini niang menyadi iya Arip Mahmud. Taib Mahmud kala mega didinga besalah bansa Berawan ketegal sida enggai ngelepas ke tanah kampung sida dikemansang ke atas nama ‘pemansang’. Orang bansa Berawan tu mega kala ngayan ke bantah diri dalam taun 1990 suba, lalu sida mega kala dirara bala polis enggau soldadu enggau chara ti kasar, lalu mega ngujung ke tuai bansa Berawan ditangkap, lalu ditutup dalam rumah pasung (jail). Diatu, orang bansa Berawan tu nadai agi kampung endur sida ngiga pemakai. Sekeda orang, kelimpah ari sida Taib sebilik lalu mengkang enda nemu sapa orang ti dituduh sida rangka ketegal nan ke menua asal diri empu.
Diatu, utai tu direkod
Sarawak Report udah nemu Taib suah belalai ke diri bisi bejalai ke pengawa bekunsi dagang enggau orang bukai iya nya ngena nama bala sida sebilik, laban dikena nyeliah ke diri kena tuduh makai suap ulih sapa-sapa. Ari nya nama sida sebilik endang bisi ayan dalam surat-surat penerang dagang kunsi, baka nama bala menyadi iya, ipar iya, anak menyadi iya, bekaul enggau dagang ti besai-besai di menua tu.
Sarawak Report mega bisi dipadah ke pasal Kepala Menteri tu suah bendar ngena chara bukai dikena iya ngulihka pengaya ari menua tu, lalu nyimpan pengaya nya di menua tasik. Taib mega bisi ditemu ngena chara pejal atas bala penama share iya nyain surat ngetu kereja ba sebarang maya nitih ke peneka iya. Udah nya Taib lalu ngambi orang bukai nganti penama share ti udah diketu ke iya nya.
Nyerumba nya mega, Sarawak Report bisi bulih salin surat-surat ari menua US ti bisi ngundan penerang ti silik pasal dagang kunsi sida Taib sebilik.
Nama Kepala Menteri empu bisi ditulis dalam surat-surat pengawa dagang ba opis pengerejister kompeni
Mesti Bersatu Sdn Bhd bisi penerang pasal kaul dagang sida enggau Taib, lalu nama iya empu bisi mega ditulis ke ba surat-surat dagang kunsi sida iya ti berejister enggau opis Company Register di Malaysia ditu. Pekara tu dijangka ke ari penyilap Taib empu ti seruran ngasai ke diri ulih ngereja sebarang pengawa dagang nitih ke peneka iya, lalu udah nya mai penguntung ulih iya ari pengawa dagang nya pansut ari menua tu.
Ba kompeni Mesti Bersatu nya, Taib direjister nyadi Pengarah (Director) sereta mega bisi megai 400,000 iti share, ari semua 2,300,000 iti share ti dikeluarka kompeni nya. Bala orang ke bukai ti bisi megai share ba kompeni nya iya tiga iku bini niang menyadi iya, Arif (ti udah masuk pengarap Islam), lalu pia mega dipegai dua iku anak sida ti udah chukup umur megai share. Enggau rega RM1.00 ke siti-siti share, reti nya semua ungkus share enggi Taib aja sebaka enggau RM400,000.
Kompeni nya direjister “no operation (enda dipejalai ke)” laban address opis kompeni nya di Kuching. Tang iya ti bendar, kompeni nya bisi setengah ari penyampau semua share ba kompeni Kenyalang Cergas, ti ditumbuhka dalam taun 1992 lalu nyadi ke pemegai shareholder ba projek Royal Mulu Resort. Bala pengarah-pengarah ti bukai enggau orang ti megai share ba Kenyalang Cergas iya nya adi Taib empu, Raziah Mahmud, enggau ipar iya, Robert Geneid. Penemu ti deka numbuh ke palan endur ngelantang ke ati di Mulu nya diperambu Raziah Mahmud enggau laki iya nya. Seduai iya mega mangku pengawa nyadi pengarah ba kompeni nya. Orang bukai ti bisi bekunsi dagang dalam projek tu iya baka taukey kayu balak iya nya sida Yaw sebilik, ti mega bempu kompeni Samling. Projek tu mega bisi bekunsi enggau arkitek ari menua Singapura. Perintah menua Sarawak tu mega dibai ngereja projek tu ngambi ke bisi melanja ungkus projek tu, ngena duit ari chukai ti datai ari rakyat empu betaun-taun ti udah. Terima kasih ke nuan, Taib Mahmud.
Raziah Mahmud enggau laki iya, Robert Geneid ti ditemu kala nerus ke projek tu ti dipermabu Raziah lebuh iya agi begulai enggau laki iya ti ke dua. Dalam taun 1991, perintah menua Sarawak udah mutus ke runding nyukat semua tanah ti diambi lalu dikena nuduk ke projek tu, taja pan bisi sekeda ari tanah nya diserangkung kampung galau perintah (National Park). Tuai Kampung orang di menua nya semina dibayar pampas RM80 seekar. Bala sida Geneid sebilik endang ukai orang diri sebilik ti beduit, lalu pia mega ukai orang dagang lalu nadai pengelandik ba dagang hotel, tau ke dagang temuai. Tang menyadi Taib ti benama Arif Mahmud ti endang benung ngulih ke pengaya ba dagang pengawa kapal Archipelago (diatu kaul dagang pengangkut kayu balak tu udah bisi penanggul lalu nyadi siti skandal dagang ti beungkus bejuta-juta ringgit).
Udah Taib ngemendar ke adi iya, enggau ipar iya ngemansang ke semua tanah ti udah disukat, taja pan dibayar ukai enggau rega patut, projek nya lalu belabuh dikereja, tang ngena chara makai suap (corrupt). Perintah Sarawak empu disuap awak ke nyukung lalu melanja projek nya. Nengah sukung ari Sarawak Economic Development Corporation (SEDC), pejalai projek nya, lama agi dipeda kurang meri penguntung, lalu semina meri penguntung ngagai bala sida Geneid aja. Atas nama “ngemansang ke dagang temuai’ SEDC udah melanja semua macham ungkus ti nadai temu tuku enggau tuju ngagai sida Geneid sebilik.
Pemurah ati perintah Sarawak melanja projek tu lalu betukar nyadi dagang kunsi ti mai pengerugi ti besai ngagai menua Sarawak, tang udah meri penguntung ti mayuh ngagai Raziah enggau laki iya, Robert Geneid (anak orang bumai kebun buah ari menua Australia). Pekara pasal palan tu udah diayan ke ba laman Facebook sida Geneid tu, lalu palan tu enda nyalah-nyalah baka palan ti semina dikena sida sebilik aja. Siku dua bala temuai bisi ditemu nemuai ngagai palan nya, tang suah agi raban orang to bekereja ngulu ke bala temuai bejalai ba endur madah ke mayuh bendar bansa jelu udah punas ketegal kampung ti ngelingi palan nya nyau udah ditebang lalu kusi.
Terima kasih mega ngagai Taib laban kami kala ninga serebana orang asal menua nya ti kala kena pejal bala perintah enggau bala polis. Genap kali bala sida Geneid tu datai kia ngelantang ke diri (sida tu datai kia sangkai ba siti padang bilun ti endang digaga sida ba tuchung munggu ti udah ditarah. Ba orang bansa asal menua nya dia, tuchung munggu tu sebengkah endur sida miring sereta nampuk, tau ke beniat). Orang asal di menua nya lalu nadai bulih penyamai pengidup, taja pan lebuh maya kempen ba pengawa bepilih, leka jaku “pemansang” endang enda kala tinggal.
Diatu, bansa Berawan nyau belabuh minta saup court dikena sida ngelaban kompeni ti ngerampas menua ari sida. Terima kasih baru mega ngagai nuan, Taib, laban tanah NCR ti bekelingi dia mega majak dirampas endur deka ngemesai ke agi projek palan nya. Diatu, sebengkah kompeni ti enggi Marriot Hotel ari menua US udah ditemu deka bekunsi dagang ngemesai ke projek dia. Ngagai ke diatu, raban bansa asal menua nya lalu apin dipampas, taja pan perintah ti dulu menya kala udah ngemendar ke bansa orang asal dia endang bempu tanah dia.
Marriot Hotel baka ti nadai pemalu bekunsi dagang ba palan nya, taja pan bekunsi dagang enggau Raziah Mahmud. Dulu ari tu, Marriot Hotel enggau Raziah endang kala udah bekunsi ngaga hotel Marriot di Miri.
Ba taun 2002 gerempung UNESCO udah netap ke kampung galau Mulu, enggau palan projek nya nyadi ke siti palan pesaka dunya, lalu UNESCO udah ngayan ke pengirau ati sida. Dalam taun 2008 sebengkah report gerempung UNESCO pasal pengawa ngemata ke palan pesaka dunya ti bekaul enggau Mulu. Ba report sida nya, UNESCO nyebut Kepala Menteri merambu deka ngaga tekat ai di serata Sarawak, ti tau ngujung ke penanggul ngagai palan dagang temuai di Mulu nya. Report nya mega nyebut projek tekat ai deka lebih agi nadai nguntung ke orang asal menua nya. Ba taun 2010 tu, UNESCO mega benung nganti pemutus enggau saut ti meruan ari perintah Sarawak.
Taja pan Taib deka amat belandi ke leka jaku “pemansang” di menua Mulu nya, tang endang ulih disangka, pemansang ba menua nya nadai nguntung ke orang asal menua nya empu. Bansa Berawan ti enda udah betaun-taun nguan kampung nya enda mega diasuh bekereja ba palan ngelantang ke ati Mulu nya, taja pan bansa Berawan tu endang udah ngelala kuing utai dalam palan nya. Raban sida Geneid enggau perintah Sarawak endang enda mantu bansa Berwan tu ti udah dirampas tanah, lalu mayuh mega sida Berwan tu idup dalam pemerinsa.
Bansa Penan ti seruran mindah-mindah pendiau mega nyau lenyau kampung endur sida iya ngasu begiga ke pemakai. Penanggul tu ari ketegal pengawa Taib ti betebang ke kayu kampung di bekelingi enggau palan Mulu nya (kayu ti semak nya dia bansa kayu tanah tinggi lalu nadai adi kayu ti manah-manah). Bansa Penan diau ba langkau ti enda meruan ba tisau menua bansa Berawan. Jauh sida bansa Penan tu ulih ngasai ke pemansang dunya baru, lalu sida semina berindup ba rega bakul ti dianyam sida seraya ke diperati ke bala temuai ti ngusung palan Mulu nya. Laban penyinu meda penyai pendiau orang asal menua nya, dia sekali, bisi siku temuai nyau ngeluar ke belanja diri empu dikena meresi endur ti bepaya sereta endur nyamuk besarang. Baka nya meh gaya penyai rumah ti disedia ke sida Geneid, atas nama “pemansang, enggau pemaju”.
Ni penyampau udah dibayar perintah Sarawak ngagai Taib Mahmud sebilik dikena ngemansang ke Mulu?
Bala rakyat enggau bala pemayar chukai endang bisi bagi diri enggau mayar sida Geneid sebilik, atas nama “pemansang dagang temuai” taja pan dagang nya enggi sida sebilik aja. Siti utai ti ditanya ditu: Berapa penyampau ti bendar ti dibayar perintah Sarawak dikena nanam puku dagang ba projek Mulu ti diatu dikemata ke Marriot? Sarawak Report udah bulih penerang ti silik, iya nya dalam taun 2007 suba, sama taun Taib Mahmud bulih share ba kompeni nya, kontrak ti baru pan lalu diayan ke. Perintah Sarawak lalu dipinta mayar enggau rega ti tinggi agi ngagai kompeni Borsamulu Resort, sebuah kompeni ti endang enggi Taib empu.
Sarawak Report udah mega dipadah ke ari siti pemeri berita ti tau dikarap ke, nyebut siti janji semaya udah ditanggam, lalu perintah Sarawak deka mayar anak kompeni Borsamulu RM50 juta setaun. Tu mai reti perintah Sarawak udah besetuju mayar bala sida Geneid sebilik, nyengkaum Taib Mahmud empu RM50 juta setaun dikena menua kitai tu melanja sida sebilik ba dagang sida empu nyentuk ke semua sida sebilik nya nadai agi di dunya tu! Enggau cherita ti baka tu, kami minta enggau basa penerang ti silik ari perintah Sarawak penyampau bayar ti bendar, lalu mega minta terang ke nama kebuah menua kitai tu patut ngereja pengawa makai suap ti enda patut-patut baka tu.
Enti nitih ke pematut iya, semua penyampau duit ti dikena bejalai ke projek tu ditemu semua orang Sarawak, laban duit ti dipelanja ke nya duit rakyat, tang dikena melanja palan pengelantang ati ti diempu sida Geneid sebilik enggau Taib Kediri, kenyau ari perambu projek tu ari taun 1993 suba.
Sarawak Report mega deka nemu penerang ti silik pasal Marriot Hotel ti dipelanja menua Sarawak ngena duit rakyat ketegal “pampas” ngambi bagi ba pengawa dagang kunsi enggau bala sida Geneid sebilik ba Borsamulu Resort, lalu mega deka nemu sekali ke kompeni nya bisi belalau ke standard senentang ngemata ke pengelantang mensia enggau pangka penanggul ngagai rampa menua ari ketegal pengawa dagang sida nya.
Kaban baru sida Marriot Hotel ti bekunsi dagang ngemansang ke Borsamulu Resort nya nyengkaum Kepala Menteri Sarawak enggau sida sebilik, perintah Sarawak enggau kompeni kayu ti besai di menua tu, iya nya Samling. Semua sida tu kala udah mantah pansik perintah menua Norway ti mansik pasal penyalah pengawa nebang kayu kampung. Marriot deka sekali agi bejadi penumbuh palan Borsamulu nya atas nama “eco-tourism”, lalu Kepala Menteri Sarawak enggai sida sebilik tau disebut ke raban orang ti pemadu jai ngerusak rampa menua ti kala udah ada lalu idup di dunya tu. Kami deka nemu nama kebuah Marriot agi majak deka bekunsi dagang enggau raban orang ti pemadu jai baka sida Taib Mahmud nya sebilik.
Kami mega deka nemu enggau silik enti Marriot ulih meri kami penerang pasal sebengkah kompeni ti bisi share ke besai, iya nya Widervale Assets Limited? Kami pechaya, baka pengawa Marriot ti rajin bendar dalam dagang kunsi bejalai ke dagang “eco-tourism” tu, kaban dagang iya nya enda dikelala, laban Widervale ukai sebuah kompeni ari Malaysia, taja pan share iya dipeda, lalu ditemu jauh besai ari pemegai share ke bukai.
Sarawak Report deka sekali agi nemu enggau silik nama criteria dikena Marriot ngeletak ikas “eco-tourism” ba dagang sida iya. Kaban dagang sida iya, iya nya Kepala Menteri Sarawak empu endang ditemu melanja pengawa dagang ti mai pengerusak ngagai rampa menua ti besai bendar ngelingi Mulu. Iya mega udah ngemendar ke pengawa ngulih ke kayu kampung ba kandang menua ti besai mega. Penusah tu nuntung orang bansa asal tin guan menua ngelingi nya, lalu pengerugi sida enda dipampas enggau betul sereta patut. Bantah sida tu mega seruran napi pengasar bala polis.
Enggau tu, kami deka nanya baka chara sida ulih nerang ke enggau silik juluk ati sida ti deka majak ngemansang ke “eco-tourism” sereta nerang ngagai raban gerempung UNESCO.