Diatu Sarawak Report udah bulih surat-surat penerang ti tau dikena kami ngamat ke berita pasal Kepala Menteri ti ngerumpank tanah beskala besai ari orang bansa asal di menoa Sarawak. Nengah bala orang dalam ti beberi ke kami penerang, ketebal agi sida nya ti deka dilamun Taib, kami ulih ngayan ke penerang ti bekaul enggau pemaioh tanah NCR ti udah dirampas iya ke iya empu enggau sida sebilik sereta enggau penatai duit bukai ti ulih iya ari ti beduan rakyat iya empu.

Penyalah ‘makai suap’ ti kelalu balat sereta beskala besai enggau empas ngagai pengidup bansa Dayak enggau rampa menoa, ti enda ulih pada ke kami ba siti berita ditu. Taja baka nya kami ngaga pansik dikena kami ngabas pengamat bukti ba minggu-minggu ti ka datai ila bekaul enggau empas pengawa rangka Taib atas pengidup orang enggau rampa menoa di serata Sarawak.

Chara kereja ti nyata

Kami udah tetemu ke chara kereja tau ke ‘modus operandi’ ti dikena Taib salah guna kuasa iya dikena nulong iya empu enggau sida sebilik atas tanah-tanah Dayak. Nengah pengawa ti dipangku iya Menteri Perancangan dan Sumber, enggau Kepala Menteri, Taib udah ngaor polisi nyukat lalu ‘nyirap’ tanah-tanah NCR atas nama ‘pemansang’, siti pengawa ti udah ditetap ke salah ba court Federal.

Taja pan baka nya iya endang selalu enggau ulih ngelalai bala sida sebilik ti bulih penguntong ari polisi ti digaga iya nya! Penerang pasal kompeni-kompeni ti diasuh perintah menoa ngereja tanah-tanah Dayak sereta enggau penyampau chukai ti pulai ke perintah endang diayan ke ngagai mensia maioh, tang pekara bukai ti bekaul enggau pengawa kompeni-kompeni nya dilalai ke ba upis Rejisteri Tanah.

Sarawak Report diatu ulih ngamat ke penerang pasal kompeni-kompeni enggi sida Taib sebilik, tau ke enggi bala kaban politik enggau bala kaban dagang iya. Kami mega bisi penerang ti nunjok ke Kepala Menteri nya nyau udah riri meri tanah-tanah ngagai kompeni-kompeni enggi sida menyadi iya enggau regi ti mimit (tau ke nadai berega) ti udah nya lalu jampat-jampat nyual kompeni-kompeni sida nya ngagai bala kroni (suah agi dalam sari-dua aja) dikena ngulih ke untong ti belipat-lipat kali.

Udah nya tembu sida Taib sebilik lalu ngaga sempekat lalu ngambi share tau ke mangku pengawa-pengawa nyadi pengarah ba kompeni ti baru nya (suah agi penerang sida nya dilalai ke) ngambi ke sida majak bulih penguntong ari pengawa atas tanah nya.  ‘Pemansang’ tu udah ngerusak kandang endor ti alai ngulih ke kayu balak lalu udah nya ditanam ke kelapa sawit, ngujong ke bansa Dayak idup dalam pemerinsa, enda dipampas apa-nama enggau gaji ti mit.

Kes ti ngenyit ke ati

Sarawak Report mega bisi bulih penerang pasal pengawa salah ti dikereja perintah menoa atas tanah-tanah bansa asal ti benong charut diatu. Raban bansa Melanau di Pulau Beruit nya sebengkah raban bansa asal Sarawak, ti mega sama bansa enggau Kepala Menteri empu, ti benong idup dalam pemerinsa ti datai ari pengawa ‘pemansang’. Pulau nya pulau ti penudi di menoa ti ngundan pesaka asal (utan kayu bakau). Dalam taun 2004, Kepala Menteri nemu endur nya manah ‘dikemansang’ endur muka ladang sawit, taja pan mensia maioh serata dunya udah mandang ke bantah sida ngagai pengawa muka ladang ti baka nya ti ditemu balata mat empas ngagai rampa menoa. Dalam bulan Lima 2005, 10 ribu hektar tanah ba pulau nya diserah ke ngagai kompeni Eastern Eden SB, lalu 5 ribu hektar diserah ke ngagai kompeni Poh Zhen. Bala orang tin guan pulau nya endang enda nemu nama-nama nyentok ke maia kompeni ladang sawit nyau tama kia lalu ‘ngeliti’ kampung kayu bakau dia lalu nukar ngena pun-pun sawit. Kompeni semina mampas RM120 ke sehektar tanah sida orang asal dia, ti semina bepenyampau lebih RM1 juta aja dipebagi ke entara semoa orang ti diau dia.

Encik Bahrum, siko ari tuai raban bansa ti nguan menoa nya nerang ke baka ni iya dipadah ke pasal pengawa ‘pemansang’ leboh maia iya nurun berikan enggau ngiga pemakai. Di rantau jalai iya meda kandang rampa menoa ti luas amat udah di pensiang orang. Bahrum enggau bala anembiak-redak iya ti lama nguan menoa nya, madah ke kpmeni ladang sawit udah dulu besemaia madah ke sida mensiang endor nya laban dikena numboh ke skim bumai padi, tang iya ke bendar endor nya ditanam ke sawit. Bala raban NGO udah madah soh Sarawak Report pasal bala orang ti mandang ke pengeringat diri lalu kala ditangkap, dikelesay ke, lalu sida ke bukai enda ulih enda nyambut pampas (laban ketegal suntok lalu beguna ke belanja).

Pemerinsa ti diasai ke

Bahrum mega bisi nyebut pasal bala anebiak-redak iya diatu nyau majak suntok ba pemakai, laban utan kayu bakau enggau ikan udah lenyau. Sida mega ngena ai ti kamah bekau rachun enggau som ti dikena kompeni ladang sawit ti ngelingi pendiau sida. Semina dua-tiga iko ari sida dia ti bekereja enggau kompeni. Diatu ‘pemansang’ nyau ngelekai ngagai kandang menoa bansa Iban ti mai empas ngagai 8 buah genturong pendiau nebing Sungai Lengan. Sadia, sebengkah NGO, udah kala mai bejurai pasal Sustainable Palm Oil, lalu pengawa ngulih ke kayu balak mega tama ngagai kandang Taman Negara dia. Bala Iban dia madah ke ‘pemansang’ ti datai ke menoa sida nya mai pengerusak ke pengerai, pemakai, sereta ngamah ke ai sungai. Naka ke diatu, penusah ti ditapi sida dia lalu nadai dibayar sebarang ganti-rugi.

Diatu Sadia ti begulai enggau sebengkah kompeni guaman enggi tuai PKR, Baru Bian, benong ngari ke raban orang asal ngelindong tanah-tanah sida ti agi tinggal nya, lalu deka ngena undang-undang minta pampas ganti-rugi. Sida orang asal dia mega madah ke sida enda bulih sukong ari wakil rakyat sida dia, YB Norah Binti Abdul Rahman. Norah tu mega mangku pengawa nyadi Ketua Eksekutif ke projek ‘pemansang’ Tanjung Manis, sebengkah projek ti nerusak rampa menoa enggau pengidup mensia di endor nya. Norah mega anak menyadi Kepala Menteri, Abdul Taib Mahmud.

Norah, Taib enggau maioh pemesai-pemesai bukai ari menoa tut u nemuai ngagai Oxford University di UK laban dikena ngelaku ke dagang sida ke kandang menoa adap kitu, ba University Said Business Scgool. Ba pengerami tu Norah minta bantu belanja entarabansa ba pengawa ngulih ke kayu kampung dikena ngemansang ke “hab pemakai Halal”  ba menoa Kristian di Malaysia ditu. Apin lama tu udah Norah bisi mansut ke jako ti nyebut belanja ti besai deka diguna ngaga perengka-perengka ti diguna baka kuasa elektrik, ai ti beresi enggau jalai alun ngagai genturong pendiau bala orang ti apin bulih ‘pemansang’ udah menoa sida ti enduor orang ngurlih ke kayu balak. Diatu Norah beguna ke sukong ari pengundi. Bala pengundi Norah dipinta enda nyambut ‘duit suap’ RM60 ari Norah, taja pan iya tentu deka niki ke penyampau ‘duit suap’ nya. Tang taja baka nya, bala pengundi bisi hak nyambut duit ari Norah, tang udah nya ngundi pengari bukai.

Kami ngayan ke sapa orang ti bulih untong

Tu mih bagi dalam berita tu ti tau ngasuh kitai tekenyit laban ngelama tu berita tu selalu disalam. Pansik kami udah ngayan ke pemaioh duit untong ti ulih sida Norah sebilik ari tanah orang di Pulau Beruit. Udah bala orang di Pulau Beruit betanya ke sapa ti bempu ladang sawit dia, semoa nya di kereja Jaya Tiasa. Kompeni nya diempu Rimbunan Hijau. Ari nya, bala orang ti mantah nya lalu nuju ke bantah soh Rimbunan Hijau.

Sarawak Report diatu ulih ngayan ke orang ti bempu semoa kompeni nya, iya nya enggi Arip enggai Ali Mahmud. Seduai tu nerima pala-pala tanah ari perintah kena 19 haribulan Mei, 2004 ngena rega RM6 juta ke plot 10, 000 hektar Eastern Eden enggau RM3 juta ke plot 5,000 hektar Poh Zhen. 12 hari udah nya, kena 31 haribulan May seduai menyadi nya nyual tanah nya suh Rimbunan Hijau enggau rega RM33 juta enggau RM16 juta. Tu mai reti RM40 juta nya untong beresi pulai ngagai sida Taib sebilik dalam 12 hari aja!

Arip enggau sida sebilik majak bulih penguntong ti besai ari Jaya Tiasa, sebuah kompeni ti udah meli tanah baka ke disebut nya tadi (Arip mati dalam taun 2005). Bala sida Taib Mahmud sebilik mengkang bulih penguntong ari ladang sawit enggau rega kayu balak ari tanah orang asal di menoa nya ti diterumpak sida.

Sarawak Report deka mengkang ngayan ke berita-berita pasal pengawa sida Taib sebilik ti berampas ke tanah orang bansa asal di serata menoa Sarawak. Penusah ti diasai ke orang di Pulau Beruit nya siti ari penusah ti diasai orang bansa asal di menoa tu bekaul enggau pengawa sida Taib sebilik.