Latest Stories
Sections
Gaya maya lepa ari pengawa – CEO bank Falcon Eduardo Leemann lebuh ditanya ba jaku randau enggau pengarang berita The National ari menua Abu Dhabi, ti endur iya madahka diri “enda sepenemu enggau atur bank”
Pansik ba kompeni BVI, Tanore Finance Corporation (TFC) udah nunjukka baka ni ‘pemeri ari menua Timur Tengah’ Najib udah numbuhka siti cara dikena ngemasukka US$681 juta ke dalam akaun Menteri Besai nya, ngena atur pengawa bank Falcon enggi Aabar di Zurich.
Penerang nya nyungkak mayuh agi pengirau ati ti mar dikarapka ti madahka siku orang kaya udah mutuska penemu iya meri duit ngemayuh nya lalu besenutuk enggau nya mindahka duit nya nengah sebuah akaun ba bank Falcon di Singapura, ti enggi bakih dagang ngagai akaun Najib.
Diatu kitai kitao ulih meda bank Falcon bekereja dalam atur pengawa sida ba tikas indu opis sida, nyadika penyukung ti ngarika TFC, ti patut ngarika ‘pemeri to gerah jari’.
Tu udah nyadika penyelai ‘pemeri US$681 juta’ nya nyadika pengari Najib enggau Aabar, dikena mansutka duit nya ari ‘dagang kunsi bestrategik’ ke dalam akaun Menteri Besai.
Dalam laman web Linked In – nama Natalie bisi dipeda dalam dokumen kompeni baka ti ditemu raban pemansik
Bala pemansik udah ngamatka TFC di BVI udah ditumbuhka bank Falcon nya empu ngena sukung kompeni di menua Zurich, iya nya Trident Corporate Services kena 19hb Oktober 2012.
Pemesai ti ngatur kaul enggau kompeni Trident pasal pekara nya siku peranak ari menua Switzerland, Natalie Schrade Grob, ti bekereja ba indu opis bank Falcon di Zurich.
Natalie betanggungpengawa ngagai CEP bank Falcon, Eduardo Leeman, ti udah nya ngeripot ngagai bos Aabar, Khadem Al-Qubaisi, nitihka penerang ti diterima kami.
Begambar maya bekereja – Leemann enggau Khadem Al-Qubaisi. Bank Falcon di Zurich udah bisi kaul dalam pemindah duit nengah pampang bank sida di Singapura. Leemann nyadika siku pemesai ti udah badu bekereja ba Goldman Sachs, patut bisi kaul terus dalam pekara nya
Natalie numbuhka TFC ngarika bank Falcon ngena kompeni Trident Corporate Services, ti mega bisi opis di menua iya empu, Zurich.
TCS bempu Trident Trust Company (BVI) Limited, ti endur TFC diregista di BVI.
Kompeni Trident di Zurich lalu landik ba atur numbuhka kompeni-kompeni di menua bukai, ti endur Natalie udah nguna pengelandik sida
Tu mai reti, pemeri ti nadai benama ti udah ngemasukka duit ke dalam akaunNajib nya al_Qubaisi ti nguasa bank Falcon enggau tuju numbuhka kompeni ti dikena meri ‘duit pemeri’ lima bulan sebedau Najib nerima duit nya lalu udah nya nutup kompeni lima bulan udah nya.
Enggau pengawa Aabar ti bisi kaul dalam pengawa dagang ti beresia enggau 1MDB, nyengkaum pengelenyau US$1.4 billion ari pengawa dagang kunsi ba pengawa ngeluarka bon ‘meli kuasa karan’ (2012) enggau pengelenyau US$1.4 billion ari ‘dagang kunsi strategik’ sida (2013), sapa-sapa pan deka ngumbai pekara nya baka ti besenutuk nyadi.
Dua iku pemesai dalam Falcon, Al-Husseiny enggau Al-Qubaisi (kiba) benung betabi ba sebengkah pengawa nanggam sempekat ‘dagang kunsi bestrategik’ enggau Najib enggau pengerusi dalam 1MDB, Lodin Wok Kamaruddin
Sapa-sapa aja diatu tau betanya sekali ke nadai sebarang penerang ti tegap ba penumbuh sebuah langkar kompeni dikena mindahka duit resia nya dulu ari pengawa dagang entara Aabar enggau 1MDB udah tu?
Nadai penyelai ti endur raban penerit undang-undang Switzerland diatu udah belabuh mansik bank-bank ti bisi kaul enggau 1MDB, baka ti dipadahka ngagai Sarawak Report ari pun berita ti tau dikarapka, lalu penerang tu mega nyengkaum penerang bekaul enggau bank Falcon di Zurich.
Jaku tanya ke terubah nya dikena ditujuka bala pemansik ngagai Natalie enggau bos iya, Eduardo Leemann, ti nyadika siti jaku tanya ti suah diseliahka Najib ngelama tu.
Iya nya, sapa nyadika klien ke bendar bank Falcon enggau orang ti bempu syer ari TFC –enggau leka jaku bukai, sapa mih ti nyadika ‘pemeri enda benama’ ari menua Timur Tengah nya?
Gaya maya lepa pengawa – Khadem Al-Qubaisi beperindang entara maya bekereja enggau 1MDB ke Aabar
Tang pengawa kamah nya enda lenyau baka nya aja ti enda ditemu bala pengarah dalam bank Falcon.
US$681 juta ti dipindahka nengah anak kompeni sida di Singapura nya semina 10% ari ke semua puku dagang sida dalam bank nya.
Pengawa dagang nya patut nyadika siti ari penyampau pemadu besai ti udah dipejalaika sida.
Enti sema Natalie enggau Eduardo tepejal ngaku sida enda ngelala sapa penerima pemeri ari TFC ti mega endur sida bekereja nitihka asuh bos sida Khadem (ti udah dibuai ari pengawa iya dalam Aabar di Abu Dhabi), seduai iya udah ngengkahka diri nyadi orang salah ti udah ngelanggar atur pekara bank.
Pekara tu enda ulih dilalaika raban penerit undang-undang di menua Switzerland.
Kelimpah ari nya, enti sida nemu, dia raban penerit undang-undang Switzerland deka bejalaika pengawa ngena undang-undang sida mantaika pun penatai duit nya sekali ke betul tauka salah.
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.