Baka Ni Tuai Tabung Baitulmal Nyerungkai Tabung Islam Sarawak – REPOT SILIK!

 

16 Sep 2013

 

Beratika rumah Baitulmal ti digaga enggau ungkus beratus-juta ringgit. Tabung dalam rumah nya ditagaka dikena mantu orang bepengarap Islam ti seranta

Sapit Menteri pekara Orang Islam Sarawak, Daud Abdul Rahman, ti nyadi Pengerusi semua duit ti digumpul lalu disadung ngagai raban orang Islam di menua Sarawak, ngena penuduk iya ti nyadi Pengerusi dalam Lembaga Baitulmal Sarawak.

Tabung tu nyengkaum asil chabut bayar Zakat, ti digumpul ari raban orang Islam ti endang meri enggau ati lurus sereta mentas ngambika dikena mantu raban orang Islam ti seranta.

Tang, nyau deka semua duit nya diatu udah diselampurka enggau pengawa ba projek-projek palan dagang lalu kami ulih nunjukka Daud nya udah buya ngulihka berjuta-juta ringgit ari tabung nya enggau chara nyalurka nengah projek besai-besai ngagai kompeni enggi iya empu, Eastbourne Corporation Berhad.

Sekali ke siku tuai tabung Islam nya udah salah-tuju penuduk iya empu dikena iya ngulihka bejuta-juta ringgit ti digumpul lalu ditagaka dikena mantu raban orang Islam ti seranta?

Nitihka asil pansik kami deka enchabar Daud Abdul Rahman ngambika ulih nerangka baka ni iya mudah bendar nyerahka kontrak nengah kompeni enggi iya empu?

Ari peneka Taib Mahmud, chukai ba atas orang Islam diatu dipejalaika atas orang Islam ulih Perintah Menua Sarawak enggau chara undang-undang lalu amaun nya besai bendar.

Tang diatu bisi pengirau ati bekaul enggau atur pengawa dipelalaika nya ti dikereja Daud enggau Lembaga Hal Ehwal Islam ti dipengerusika iya.

Parti penyakal DAP udah betanya ngagai Tabung Baitulmal Sarawak (TBS) ngambika ngeluarka repot pekara belanja sida, tang lalu nadai udah nerima sebarang saut ari TBS.

 

Rumah Baitul Makmur di Kuching nya nyadika pemun langgur sida ti deka ngaga mayuh agi rumah ngena duit Zakat

Diatu udah bisi didinga jaku bantah sekeda orang bepelasarka pemutus penemu bekenaka duit agih ti dikena mantu orang ti seranta dikena ngaga palan dagang ti besai-besai, lalu enda berat agi dikena mantu raban orang ti beguna agi ke belanja, mayuh sida nya udah serebana madahka duit bantu sida udah berupai bisi dikurangka tauka diketuka sekali.

Daud Abdul Rahman empu udah didinga mansutka penerang ba suratberita ti madahka wang turu nya udah ngeluarka belanja RM2 juta setaun dikena sida mantu orang ti seranta, lalu nambahka nya “tiap taun, kami melanjaka enda kurang ari RM30 juta ngagai RM40 juta dikena mantu raban ti patut nerima bantu ti baka nya.”

Tang batang pengawa ti mantu raban orang ti seranta nya udah diagihka ba penyampau beratus-juta ringgit dikena ngaga ‘palan dagang Islam’, ti udah tembu di Kuching, Sibu enggau Miri.

Rumah Baitulmal di Kuching ti udah tembu nya beungkus RM90 juta lalu ngembuan sebuah menara ba peninggi 17 tingkat lalu dua tingkat ari menara nya bisi ruang endur bedagang ti muat endur 74 iti lot dagang.

Kompeni Naim Candera enggi petunggal Kepala Menteri, Hamed Sepawi, udah dipilih Daud enggau Lemabaga Baitulmal nyadika kontraktor ngaga projek ti udah dipenyadi kena hari Sati 16 September tu tadi.

 

Ba kontrak ti ngemesai tu, Hamed Sepawi pengerusi Naim Candera ti mega petunggal Taib dipeda ketawa rakah-rakah gaga ati

Projek ti bukai nya berega RM100 juta mega udah dikomisyenka Lembaga Baitulmal di Sibu enggau di Miri.

 

Projek ti nyadika tambai pengawa pengasih, tauka endang ditagaka dikena bejalaika pengawa dagang?

Tang diatu udah bisi projek ti besai agi digaga didirika di Kuching, iya nya palan Baitul Makmur II di Petra jaya, ti diumum dalam bulan Mei nyin kemari, sereta tembu bepilihbesai ke-13 ti udah endur BN ‘menang’.

Baitul Makmur II endang digaga nyadika sebengkah palan opis enggau palan dagang 18 tingkat, ti disadang deka endur ngengkahka mayuh opis menteri udah iya tembu ila.

Kaul palan nya enggau pengawa jalai pengarap nya agi kabur. Taja pan baka nya, bank RHB udah ditemu ngamatka sida udah ngagihka RM300 juta dikena mantu ngaga palan opis nya ngena ‘chara Islam’.

Beserimbai enggau nya, nitihka asil pansik kami, kompeni pengawa berumah Hock Seng Lee disebut nyadika tukang ti mujur bulih kontrak ngaga kompleks ti beungkus RM228 juta. Tang kontrak nya ukai dikeluarka ari Lembaga Baitulmal, tang ari kompeni Eastbourne Corporation enggi Daud empu!

 

Kontrak dikeluarka ari kompeni Eastbourne Corporation ngagai HSL (enggau komisyen asal iya ti udah dikurangka ba penyampau RM25 juta)

Pansik ti dipejalaika ba laman web ofisyel CIDB udah nerangka kontrak asal nya bukai diberi ngagai HSL, tang ngagai Eastbourne Corporation Bhd ba rega RM253 juta sereta tembu PRU13 ba bulan Lima tu tadi.

Duit jali ari bank RHB nya dipansutka sebulan udah tembu PRU13 nya, iya nya kena 28 Jun ti berebak enggau HSL ti madahka sida udah mujur nanggam sempekat enggau Eastbourne Corporation dikena ngambi alih projek nya ba rega RM228 juta, iya RM25 juta kurang agi ari penyampau asal ti ditagaka Lembaga Baitulmal.

 

Laman web ofisyel CIDB bisi ngerekod Daud ari Baitulmal meri kompeni iya empu sebengkah projek ti besai beungkus RM253 juta, ti beberapa minggu udah nya diberi iya ngagai HSL ba rega RM25 juta kurang ari rega asal.

Nitihka rekod awam nya, kami deka ningka saut ari Daud, nama kebuah Lembaga Baitulmal meri projek ti besai nya ngagai kompeni iya empu ba rega RM253 juta, lalu udah nya diserahka ngagai HSL ba rega  RM228 juta?

Nama tuju enggau laluh duit RM25 jutam ti ulih ari pemeri orang mayuh ketegal ti deka bejalaika pengawa pengasih?

 

Daud ti nyadika orang kanan Taib udah dikarapka ngatur semua duit turu ke pengalantang orang Islam ti seranta di Sarawak lalu diumbaka enggau pemansang projek ngaga palan-palan pengawa dagang

Raban orang Islam ti bekereja begaji bisi udah mupuk irau ati, laban sida nemu sebagi ari gaji sida deka dichabut lalu dipasukka nyadi duit turu Zakat, ti dipejalaika Lembaga Baitulmal betuaika Daud Abdul Rahman.

Sarawak Report udah mansutka penerang pasal kompeni Eastbourne Corporation enggi Daud Abdul Rahman ba konteks ti bukai.

Menteri Pekara Islam Sarawak nya ti mega mangku pengawa ba Opis Menteri Pemansang Infrastruktur, ti endur iya nyadi pengerusi atas mayuh kontrak ti diberi-beri iya ngagai kompeni Eastbourne Corporation.

Ari gaya Daud ti nyadi siku orang ti dipilih lalu ditetapka mutuska penemu iya bekaul enggau sebarang projek infrastruktur, kami ulih madahka Perintah Menua Sarawak udah meri kompeni Eastbourne Corporation mayuh bengkah kontrak ti manggai beribu-juta ringgit.

Diatu chura pengawa kontrak udah berupai dipeda. Kitai tau meda siku menteri, ti enda malu ngena penuduk iya ngemasukka belanja ari tabung pengawa pengasih ke dalam pengawa dagang iya empu.

 

Konflik tuju pengawa? – Siku orang ti beranakka puku dalam Eastbourne ti mega nyadika penerima kontrak ari Baitulmal, Daud Abdul Rahman

Ba sebengkah kes bekaul enggau pengawa ngaga projek besai ti disukung Lembaga Baitulmal betuaika Daud lalu mega Lembaga Amanah Kebajikan Masjid Sarawak di Batu Lintang Kuching. Sekali agi, projek nya meri penguntung ngagai bos politik iya, kompeni Naim Candera.

Kandang endur kuarters perintah ti dulu suba di jalai Batu Lintang nya diatu udah nyadika sebengkah palan pengawa dagang ti besai, lalu 70% ari palan nya diempu Naim Candera.

Hock Seng Lee mega sebengkah kompeni ti tegap laban nyadika kompeni tetap ke sida Taib sebilik ti seruran bulih projek.

Enggau gaya Idris Buang ti nyadi pengerusi dalam HSL, kaul politik sida enggau Taib udah ngenegapka agi pengawa dagang sida ari ti nerima mayuh agi projek dalam sebengkah menua ti udu bejalaika atur makai suap baka di Sarawak.

 

Sebuah agi kompeni kroni – Pengerusi Lembaga Pengarah dalam HSL, Idris Buang nyadika kompeni ti dikerinduka Taib

 

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments